![](https://ilchi.info/wp-content/uploads/2021/07/dgrhtfftu.jpg)
Республикалул Ортопедиялул-травматологиялул центр
Ихтилат хIакинтурая багьайхту, жува чара бакъа дакIнийн бичлан бикIару, жуятувасса цу-унугу лахъину къашавай ивкIсса, хIатта дунияллия ка ларсун, хъин хьуншиврийнсса хьул-умудвагу бакъа ивкIсса ва яла, цакуну, ка сававсса хIакиннайн бакIрайн агьну, мунал ази лаган увсса лахIзарду. Мукунний цIуцIишаний ивкIссагума хъамабитай, цIуцIавугу дакIнива лагай, чурххава дуккаврищал. ДакIниву личIай жува хъин бувсса хIакиннал цIа.
ЦIаххуйл арс Наби ЦIаххаевлун гьашину 95 шин там хьунтIиссия. Ванал щалвагу яргсса оьрмугу медициналуцIун бавхIуну бур. Ва ттул учителъя. На навагу хъун хьуссара хIакинтурал кулпатраву. Мединститутгу къуртал бувну, 60 шинай зий бура ва институтраву преподавательну. Жул институт билаятрай ца яла хьхьичIунмуръя, жул преподавательталну хъунисса аьлимтал зий бикIайва, институтрал цIа сийлий дия.
![](https://ilchi.info/wp-content/uploads/2021/07/sfeybrtyfn.jpg)
2007 шинал дунияллийн бувкссия «Хьуриятусса доктор Наби ЦIаххаев» тIисса лу. Машгьурсса инсантурал хIакиннаятусса дакIнийн бичавуртту, академиктурал – Рашид Аскерхановлул, Рауф Мунчаевлул, МахIаммад Жамбулатовлул, ХIажи ХIамзатовлул, Султан-Мурад Оьмаровлул, генерал ХIажи Шайдаевлул, профессор Хайруттин ХIажиевлул, Саляуттин Атаевлул ва цайминнал. Наби ЦIаххаевлун хас бувну, шаэртурал чивчусса шеърирдугу бюххансса бур. Вава луттирай бур ттул ласнал, институтрал преподавательнал ва Дагъусттаннал Чичултрал союзрал член, ХIабибов Геннадийл очерк «Хирург». Ва цила чIумал ккалли дурну диркIссар хIакинтураясса яла ххуймур очеркран.
Репрессиялул щатIахьхьун иривсса буттал арснан лахъсса даражалийн гьаз хьуншиврул хъуннасса чувшивугу, гьунаргу аьркинну бивкIссар. Ва кьурчIи кьуру хIачIан багьминнан ххуйну кIулссар цукун къабигьану бивкIссарив репрессиярттахьхьун иривманал арсну зунгу, къуццу тIунгу. Яла махъату, мяйжанссар, Наби ЦIаххаевлул ппу, хъунасса аьрабист, къеппул бугьансса тахсир къалявкъуну реабилитироват увссар. Дунияллия лавгун махъ, гьай-гьай, Наби ЦIаххаевлул захIматрал ххуллугу ттул буттал, медициналул къуллугърал полковник , Аьлиметлул арс Ссапараьлиев Ярметлул оьрмулуцIун бавхIуну буссар. Дяъви байбивхьусса гьантрайва ттул буттал аьрали лаххия лархссар, санитар эвакопоездрал медициналул къуллугърал хъунаману ивтссар. Ванал гьанумур давугу диркIссар аьрай цIунцIияртту хьуми, щаву дирми къинттуллухун тIайла буклакисса.
1943 шиная тIайла хьуну, 1952 шинайн ияннин ппу Буйнакскалийсса, Каспийскалийсса, Грозналийсса ва МахIачкъалаливсса госпитальлал хъунаману зий ивкIссар. МахIачкъалалив ппу каялувшиву дуллалисса, дяъвилул инвалидтурансса госпитальданий (4653) зий бивкIссар ххаллилсса пишакартал: В.А. Лихтейнштейн, М. Т. Нагорный (яла махъ мединститутрал ректорну зий ивкIсса), М. С. Михайловский ва цаймигу цIанихсса хIакинтал. Дяъвилул ппурттуву госпитальлайн зун буцайсса бивкIун бур медициналул техникумру ва институтру къуртал бувми. Медициналул техникумрал выпускниктуравух ивкIун ур Наби ЦIаххаевгу. Ва цува хушрай аьрайн уцара тIий ивкIун ур, амма, ванан 16 шин дуну, къаувцуну ур. Чувшиву, аьрай дакъагу, къинттуллухгу аьркинну душиврийн мукIру увну, паракьат увну ур.
Щавурду дирми чIявусса бивкIун бур. Медициналул зузалтран хьхьу-кьини личIи дакъа зун багьлай бивкIун бур. Наби ЦIаххаев сайки увагу палаталува къауккайсса ивкIун ур. Уккансса чIунгу мунал къадиркIун дур. Кару, ччанну бакъасса, мушакъат хьусса аьралитуралсса буллай. Та заманнул суратру яхьуну дур альбомирттаву. Жун, хъуниминнан, бувчIуна Набиная ххуйсса хирург хьунтIишиву, маслихIат бувссия Медициналул институтравун дуклан уххан. МарцIну ххювардай Мединститутгу къуртал бувну, Наби лавгссия Ккуллал райондалул азарханалул хъунама хIакинну зун. ХIакьсса хирург, ххаллилсса преподаватель хIисаврай бусравгу хьуссия. ХIакьинугу, медициналул вузрал студентътурая, хIакинтурая, санитаркахъая тIайла хьуну, волонтёртурайн бияннин, зий буссар коронавирусращал талай, дяъвилул шиннардийсса ппухълу кунма.
Ва институтрал цIакь хьусса аьдатри. Танива бивзсса гьанулул хIасиллур. Утти, Наби ЦIаххаевлул цIанийсса Республикалул Ортопедиялул-травматологиялул центрданул чIарах нанийни, дяъвилул шиннардий зий ивкIсса, хIакьинусса кьинигу институтрал фасадрайсса суратрайн я бивний, ттун чара бакъа зумух ласун ччан бикIай шаэрнал махъру: «Учитель, вил цIанил хьхьичI ник ришлай бура хIурматрай…»,
(«Учитель, перед именем твоим позволь смиренно преклонить колени»).
Тамара ХIабибова-Ссапараьлиева,
Аьрасатнал ва Дагъусттаннал лайкь хьусса хIакин,
Таржума ПатIимат Рамазановал