Лакрал райондалий хьунни школа къуртал бувминнан аттестатру буллалисса шадлугъ. Муний гьуртту хьунни райондалул хъуними, идарарттал каялувчитал, школарттал директортал ва оьрчIал нину-ппу.

[dropcap]Ш[/dropcap]адлугъ дайдишин хьхьичI школа къуртал бувминнал райондалул бакIчи Юсуп Ма­хIаммадовлущал тIутIив дирхьунни Буттал КIанттул цIанийсса Хъунмасса дяъвилия зана къавхьуминнал гьайкалдануцI ва Вирттаврал чIирацI.

Гьашину Лакрал райондалий школа къуртал бувну бур 37 оьрчIал. Вайннава 6-ннал – мусил медальданущал. Дуккавриву, спортраву ва жяматий­сса оьрмулуву чялишсса гьур­ттушинна дурсса оьрчIан Юсуп МахIаммадовлул буллунни Барчаллагьрал чагъарду.

[dropcap]Ш[/dropcap]кола къуртал бувминнахь ххуллухъин тIий, Юсуп МахIаммадовлул чIа увкунни тIайлабацIу, кIицI лавгунни оьрчIру, ларайсса кIулшивугу ларсун, бюхъавай райондалул цIаний зун ватандалийнмай зана хьуну ччай бушиву.

[dropcap]Ш[/dropcap]кола къуртал бувминнахь ххуллухъин увкунни КIулшиву дулаврил управлениялул каялувчи Тамерлан ХIажиевлул, Гъумучиял школалул директор Соня Макьаевал, администрациялул зузалтрал ва оьрчIал нитти-буттал.

[dropcap]М[/dropcap]уния махъ райондалул Жагьилтурал иширттал, спортрал ва туризмалул отделданул каялувчи Малик ХIусмановлул школа къуртал бувминнан дуллунни ГТО-лул кьараллу дулаврил лишанну.

Школа къуртал буллали­сса 37 оьрчIава ГТО-лул кьараллу дулаврил фестивальданий МахIачкъалалий гьуртту хьуну ур 20. Вайннава 10-ннал ми кьараллу дуллуну дур мусил лишандалунну: 7 – Гъумучиял школалул, 2 – Кьубиял школалул ва 1 – Щардал школалул. ЛивчIминнал ларсун дур арцул медаллу.

[dropcap]М[/dropcap]у бакъассагу, школа къуртал бувсса 30 оьрчIан Малик ХIусмановлул буллунни волонтертурал книжкарду.
Дагъусттаннай волонтертурал проектру щурущи бавриву чялишсса гьурттушинна дурминнан буллунни ДР-лул Жагьилтурал министерстволул чулухасса Барчаллагьрал чагъарду.