Барчаллагь вин, къалмул ккуккуй!
Уттигъанну МахIачкъалалив лавгссияв ттула аьркинсса ишру щаллу буван. Яла ссайгъатру ласун увхссияв автостанциялул чIаравсса базаллувун. Ттун базаллуву дахлахисса дукиялий дакI даркьуна. Базаллувух занай унува, Гайдардул хIукуматрал инсантурахьхьун цанна ччиний дахху-ласу дуллан ихтияр дуллусса шиннугу дакIнийн дагьуна. Га чIумал ттун бавуна Хасаврайсса базаллуву атомный бомба бахлай бикIайссар тIисса хаваргума. На ялтту уклакисса базаллувугу дахлай дия инсантурал чурххал кьамул дуван бюхъайсса гьарца дуки-хIачIия. Духьунссия дахлай, ттунна бакIрайн къадагьарчагу, «чIелмуллул накIгума». ХIасил, базаллуву дия дахлахисса хъуслил аваданшиву. Нагу, ттуйнна аьркинмургу ларсун, ялунссаннун, дахханашиврун, оьрчIнийсса шинну дакIнийн дичин, инил ца чIивисса кьуцуригу лавсун, увкссияв базаллува.
Утти ихтилат буванну ва аваданшиврия. Дуссарив жула къатта-къушливу гукунсса аваданшиву? Хъанахъиссарив жущара гай хъус ласун? Инсантурал къаласлай диркIссания гай дуки-хIачIия, гьич, къадахланссия. Ссаяту бунугу ихтилат буллалийни чара бакъа дикIан багьай лащан бавуртту. Лащан бавуртту дакъахьурча ихтилат щаллу къашай.
Хъун дяъви къуртал хьуну махъ ларгсса 76 шинал аралуву жула ду-дакъашиврул даража личIи-личIисса лагрурдай бия. Хьунни вай шиннардий ххуйссагу, къаххуйссагу ишру. Ттун буван ччисса ихтилатгу гай циняв шинну завза дуллан ччишивриясса бакъар.
Телевизорданувух бикIайхха гайра-гай хъус ласияра, ххуйссар тIий, реклама дуллайнма. На бусласимургу бикIанхьуви Лакку билаятрал ххаллилшиврия, ххуйшиврия бусласисса рекламану.
Жунма кIулли хьхьичIра ттучанная ласайсса хъус кьюкьлуй къабавцIуну ласун къахъанай диркIшиву. Яла чарагьатсса чIун дикIайва Горбачевлул чIун. Анекдотгума бикIайва: «Хъус дишайсса дахиллу дакъа, ттучаннай цамур цичIар дакъар», – тIисса. Зу бялахъан буван кунма бусанна на зухь ттула оьрмулуву хьусса ца ишираягу. На та чIумал Дарбантлив яхъанай уссияв. Дия га Горбачевлул чIун. Ца ппурттуву къя бувккуна шагьрулуву Шуриннал Дарваза тIисса махIлалул чIаравсса ца ттучандалий дикI дахлантIиссар тIий. Нагу кIюрххицIунайва лавгссияв кIира къурушран кг дусса дикI ласун. Амма мяркьу хьуна: ссят кIюрхнил 8 хьуннин, ттуйн яржа биян ца-кIия инсан личIайхту, дикI къуртал хьуна. Нагу, ачIа шавай къагьаншиврул, хъирив хьуну лавгссияв Дарбантуллал Тахта-базаллувун дикI ласун. Га чIумал базаллуву дикI 5 къурушран дикIайва. ДикI даххайсса кIанайн ивсса чIумал, ттул хьхьичI дия кьункьуллу дусса нузру. Ялунгу лачIун бувну бия: «ДикI даххарду. Ххишала дакъар» тIисса чагъарданул кьютI. Гьай-гьай, на, ялуннай къадуварчагу, лакку зумуну дурссия Горбачевлуха ва га заманалуха аьнтсса ссугру. Миннул, ттул дакI паракьат дуварчагу, лякьамур дуччин къадуруна.
Уттигъанну ттучIанма Зумаритавал кьини зумарду кьамул дуваннав учин бувкIсса, шагьрулий яхъанахъисса, ттула гъансса инсантурал буллуна суал: «Ший хъиннив, шагьрулий хъиннив?»– тIисса. Укунсса суал ттухьхьун, вайннал бакъагу, цайминналгу булай. На нарагу хIисав дуллай уссияв, на акъа, Вихьуллал шяраву, шагьругу кьабивтун, шяравун яхъанан увкIсса цама инсан акъар. Бюхъай ва иширайн бувну укунсса суал ттухьхьун чIявуну буллай бикIангу. Щялмахъ къахьун, на цакьнира чирчусса ттула макьаларттавугу укун ттухьхьунма суал буллусса инсантурахьхьун цукунсса жаваб дуллуссияв бувсъссия. Уттигу тикрал баврия зарал къахьунссар тIисса умуд бур. Телевизорданувух бикIайхха гайра-гай хъус ласияра, ххуйссар тIий, реклама дуллайнма. На бусласимургу бикIанхьуви Лакку билаятрал ххаллилшиврия, ххуйшиврия бусласисса рекламану.
КIицI бан ччива, дунияллул дяркъу-гъилишиву даххана хьушиврия бусласисса аьлимтурал тIимур ттун Лакку билаятрайгу хIисав хьунни. Нава чIивиний диркIсса гужсса дяркъугу, гъинттул дикIайсса кIиришивугу утти ший къадикIайсса ххай ура. Бюхъай му хъявринсса ишну бикIангу. Дуниял кIукIлу хьуну дур. Учин бюхъанссар ва жула Ватандалул тIабиаьтрал суптропикалул чулийнмай ша ласласисса дайдихьу дур увкунугу. Чан хьуну бур Лаккуй яхъанахъисса инсанталгу.
Лирну ларгун дур шийсса шяраваллаву диркIсса колхозругу. Амма хIакьину ший яхъанахъисса инсантуран бигьашиву хьуну дур. Му бигьашивунугу хъанай дур ятту-гъаттара циксса лази-лакьи буван бюхълай бурив, миксса ябуван бюхълахъишиву.
Ятту-гъаттара ябавугу хъанахъиссар инсантурал аваданшивуну. Ва иш Лакку билаятрал ца ххуйшивуну хъанахъиссар. На ттучIанма Зумаритавал кьини бувкIминнан ккаккан дурссия ттула цIурихьулуву душиву дяркъусса ва гъилисса щин. Ва ишгу хъанахъиссар жула шяраваллавусса инсантурансса ца бигьашивуну.
Зунттаву яхъанахъисса инсантал бур цала «ччанналусса муси» ххал къахъанай, гай гьаз къадуллай, ялтту ччанну лавсун заназиссагу. Му иширал хъунмурну хъанай бур хъуру къадугьлагьаву. Цаппара шиннардил хьхьичI «Илчи» кказитрал зузала, Зулайхат Тахакьаевал бия чивчуну: «Инттухуннай шяраваллаву дайсса «хъарас щаву» щялусса, кьюлтI учин захIматсса хъалул гурглуха лахьлай дур», – тIий. Циван учирча, ва хъарас щаврил хъирив хъуру дугьлай бакъа буну тIий. Бакъаривла пикри бансса масъала?
Хъуру дугьларча, жува ваниярвагу авадан хьунтIиссару. Кроссвордирттай бикIай суал: «ЧчатIул мурхьирайн» ци учайссар, – тIисса. Ттун къакIулли бунияла мукунсса мурхь бикIайссарив, амма, ва суалданун жаваб дуллай, учивияв: «ЧчатIул мурхьирайн чIали учайссар», – куну.
Макьалалул ахирданий кIицI бан ччива, агрономтурал бусаврийн бувну, аьрщаравун бувтсса къалмул ккукку яла чанну ацIлийну зана шайсса бушиву. Барчаллагь вин, къалмул ккуккуй, жу авадан буллай тIий.
