Октябрь зурул 8-нний МахIачкъалалий Расул ХIамзатовлул цIанийсса Миллатирттал библиотекалуву хьунни «Тарки-Тау – 2014» тIисса луттирдал ярмарка тIитIаврин хас бувсса пресс-конференция. Муний бувсунни луттирдал ярмарка даврил программалия, шикку гьурттушинна дувантIиминная ва бучIантIисса бусравсса хъамаллурая.

Имара Саидова
«Тарки-Тау – 2014» тIисса лу­ттирдал ярмарка гьашину жулла республикалий шамилчинни дуллалисса. Ярмаркалул сакиншинначитал хъанай бур ДР-лул Культуралул министерство, ДР-лул Информациялул ва печатьрал министерство, ДНЦ РАН-далул мазрал ва литературалул институт, «Кавказский дом переводов» тIисса Аьрасатнал Культуралул фондрал Дагъусттаннал филиал.
Ва ярмарка даврил проектрал агьаммур мурад ялун нанисса никиран кIулшивуртту дулаврил ва ми тарбия баврил тагьар къулай давур. Ярмарка нанисса шанмагу гьантлий республикалул ВУЗ-ирдал каялувчитуращал ва школардал директортуращал миву дуклакими ва проектравух гьуртту бансса кьутIирду дурну дуссар.
Пресс-конференциялий мукунма ихтилат бунни «Арбат» тIисса луттирдал ттучандалул хъунмур Светлана Рустамовал, «Мавраевъ» тIисса издательствалул директор Рабадан МахIаммадовлул, гьунар бусса, цIанихсса шаэр Миясат Муслимовал.
ДР-лул культуралул министрнал заместитель Елена Гьаруновал цила ихтилатраву кIицI лавгунни гьашинусса луттирдал ярмаркалуву гьуртту хъанахъими гьарза хьушиву ва ярмаркалул программагу хъинну авадансса душиву. Бувсунни мукунма жучIанма бучIантIишиву Аьрасатнавасса гьунар бусса шаэртал, художниктал ва мукунма цаймигу творчествалул интеллигенция.
«Выставкалийн бувкIминнащагу бюхъантIиссар Аьрасатнавасса машгьурсса чичултращал, культуралул ва искусствалул интеллигенциялущал кIул хьун, хьунабакьин», — увкунни Елена Гьаруновал.
ДР-лул информациялул ва печатьрал министрнал хъиривчу Миясат Муслимовал бувсунни ва ярмаркалий ляличIинува чIявусса гьунар бусса инсантал гьуртту хъанахъишиву.
«Ва даврил агьаммур мурадгу хъанахъиссар жагьилсса ник творчество ххирану тарбия даву. Инсаннал инсаннащал бувсса ихтилатраяр, яхши-хашраяр ххаллилсса цир дусса ва дунияллий. Жула дакIнива нанимур аьч бувну, муних вичIидирхьуну, лаласун цири жухунна дахчилачисса. Ярмарка дуллалисса вай шаннагу шинай жулва инсантурал луттирдал чулухунмайсса бургаву чIаланну даххана хьунни. Утти жула Дагъусттаннайгу культура хьхьичIххуттай дирхьуну душиву цинявннангу мяйжан хьунтIиссар», — увкунни Миясат Муслимовал.
Ярмарка най дикIантIиссар октябрь зурул 9-нния 11-ннийн дияннин. Луттирдал ярмаркалун хас дурсса мероприятиярду чIяруми дикIантIиссар Расул ХIамзатовлул цIанийсса Миллатрал библиотекалуву. Мукунма цаппара «ккуркки столлал» даву дикIантIиссар «Дом дружбылул» къатраву ва Дагъус­ттаннал паччахIлугърал университетрал ректоратраву.
Выставкалий бикIантIиссар Дагъусттаннал луттирду итабакьай издательствалул, «Мавраевъ», «Эпоха» ва цаймигу издательствардал луттирду. Ярмаркалул программалул даврил лагрулуву хьунтIиссар машгьурсса чичултращал, шаэртуращал, художниктуращал, музыкантътуращалсса хьунабакьавуртту. Луттирдал ярмаркалул шамилчинсса кьини щалла хас дурну дикIантIиссар оьрчIал творчествалун. Ва ярмаркалий ссигъану хьунтIиссар «К» цIанилусса литературалул ва художествалул проект. Ва проектрал презентация хьунтIиссар Расул ХIамзатовлул цIанийсса Миллатрал библиотекалуву 4-мур зивулий.
Ярмарка лакьлакьисса кьини баян бувантIиссар конкурсраву ххув хьуминнал цIарду. Му конкурсрай бикIантIиссар 2013-2014 шинал итабавкьусса луттирду.
Вара кьини Миллатрал биб­лиотекалуву тIиртIунни Москавлий ялапар хъанахъисса да­гъусттанлув, машгьурсса художник Олег Пирбудагъовлул выставка. Му хас дурну дия ДАССР-данул Юстициялул министерствалий каялувшиву дуллай ивкIсса цала бутта МахIаммад Пирбудагъовлул аьпалун.
Выставкалий Олег Пирбуда­гъовлул творчествалун лавайсса кьиматру бишлашисса ихтилатру бунни Жанна Колесниковал, Юрий Августовичлул, МахIаммад Къажлаевлул, Ибрагьимхалил Супияновлул, Апанди МахIаммадовлул, Марат ХIажиевлул.
ХIакьинусса кьини Олег Пирбудагъовлул дурсса суратру ядуллай дуссар ПаччахIлугърал Третьяковский галереялуву, Москавуллал выставкардал дирекциярдал фондирттаву, Дагъусттаннал изоб­разительный искусствардал музейраву, МахIачкъала шагьрулул краеведческий музейраву ва чил билаятирттайсса художниктурал коллекциярдаву.