Июнь зурул 12-нний, Аьрасатнал Кьини, Москавлив, Кремлилул чIальаьлувусса Георгиевский залдануву билаятрал Президент Владимир Путиннул ПаччахIлугърал премияртту ва «ЗахIматрал Виричу» тIисса мусил медаллу дуллунни хьхьичIунсса инсантуран. «ЗахIматрал Виричунал» цIукун лайкь хьуминнавух ия композитор, СССР-данул халкьуннал артист Мурад Къажлаевгу.
Лауреатътал барча буллалисса ихтилатраву Владимир Путиннул кIицI лавгунни Мурад Къажлаев ччянива хияллай ивкIшиву гьунар бусса оьрчIащал зун ва цIанихсса дирижёрнал, композиторнал, музыкантнал щаллагу дунияллул культура Дагъусттаннал музыкалийну авадан дуршиву, ванал симфонияртту, джазрал композицияртту, киносуратирттансса ва спектакллансса музыка агьалинан ххирану бушиву.
КIицI лавгунни, цукун бюхттулсса лахъазанну музыкалул дунияллий ласурчагу, маэстро цала агьаммур давуну ккалли дуллай ушиву ватандалий, МахIачкъалалив, гьунар бусса оьрчIан музыкалул кIулшивуртту дулаву ва мунал хIарачатрайну зий бушиву итххявхсса оьрчIацIун кабакьу буллалисса магьирлугърал школа. Ва кьини наградартту ласун шадлугърайн бучIан къавхьуминнан ми махъату дулунтIишиву баян бунни Кремлилул. Мурад КъажлаевлучIангу чIал къавхьуну диянтIиссар «ЗахIматрал Виричунал» мусил медаль. ЦIуллуну итаннав ина, маэстро!
