1972 шинал, хар-хавар бакъа, оьрмулул 58 шинаву, МахIаммад дунияллия лавгунни цалла хIадурсса докторнал диссертациягу дурукъарччуна.
Бижаев МахIаммад увну ур 1914 шинал ГьунчIукьатIрал шяраву усттарнал кулпатраву. 1933 шинал Гъумучиял дянивмур даражалул школагу къуртал бувну, гава шинал увххун ур МахIачкъалалив Дагъусттаннал Педагогикалул институтрал естественный факультетрайн.
1937 шинал му марцIсса ххювардайнну къуртал бувну бур. 1937-1940 шиннардий зий ивкIун химиялул кафедралий ва естествознаниялул факультетрал деканну. 1940 шинал аьралуннавун увцуну, 1946 шинал зана хьуну ур, щалва дяъвилувухгу гьуртту хьуну, капитаннал чиндалуву, мадара наградарттугу ларсун.
1946-1948 шиннардий Дагъусттаннал пединститутрал естествознаниялул факультетрал деканну зий ивкIун ур. 1948 шинал декабрь зуруй Дагъусттаннай СССР-данул элмурдал Академиялул филиалдануву аспирантуралувун увххун ур. Диссертациялул хIадуршинна дуллай ивкIун ур Ураллал СССР-данул элмурдал Академиялул филиалданучIасса химиялул ва мах даврил институтраву. 1952 шинал апрельданий дурурччуну дур кандидатнал диссертация.
1952-1954 шиннардий зий ивкIун ур чIивима элмулул зузалану Дагъусттаннал Академиялул филиалдануву.
1956 шинал зана хьуну ур цува зий ивкIсса Дагъусттаннал пединститутравун. Шикку зий ивкIун ур 1958 шинайннин естествознаниялул факультетрал деканну. 1958-1961 шиннардий зий ивкIун ур ДГУ-рал элмулулсса байсса даврил ректорнал хъиривману. 1962-1969 шиннардий – деканну химико-технологический факультетрал.
МахIаммад ия ххишала акъа элмулухун агьсса, дуккаврил ва элмулул тагьар кIулсса, му цила тIайласса, мюнпат бусса ххуттайх дачин дуван кIулсса аьлимчу. Ва хъанай ия мукьцIалунния лирчусса элмурдал даву чирчусса автор. Ванал хIурмат Дагъусттаннал педуниверситетрал профессортурачIа, преподавательтурачIа ва студентътурачIа ххишала бакъа лавайсса бия. Оьрмулул чагъираву, дувансса хъунисса элмулул давурттал бакIгу бувцIуну буна, дунияллия лавгунни хъунасса аьлимчу.
Лавгунни жагьилнува неорганический ва аналитический химиялул кафедралул хъунама Бижаев МахIаммад Сайпуллагьлул арс. Лакрал миллатрал мяйжаннугу пахру бансса чув. Мискин хьунни ГьунчIукьатIрал шяравалугу ца аьлимчунал.
Бижаев МахIаммадлул цIа жулла хъирив нанисса никиран хъамакъадитантIиссар
