Ххуй-хъиншиврийсса батIавуртту
КIия лачIурча кьун бутайссар. Гьамин, муна мукунсса иш хьунни ванияр шанна шинал хьхьичI, Шахьуйннал шяравасса шама жагьил, Аьбдуллагь Аьлиев, Зураб Аьлиев ва Руслан Жяъпаров, лагма лавгун, шяравалу хьхьичIуннай дуллалавриха зунсса «Шахьуйми» тIисса цIанилусса фонд сакин бувну. Вайннал лагма лавгунни шяраваллил цайми жагьилталгу. Шайнал шаймур буллай, жагьилтурал чIарав мудангу бур оьрмулул хъунимигу. Ларгсса нюжмардул ахирданий вай жагьилтурал МахIачкъалалив «Башня в горах» тIисса кафелувун бавтIунни шяраваллил агьлу, фондрал ва ларгсса шинал дурсса давурттая бусаншиврул, цIусса шинал дуванмунил хIакъи-хIисавртту дуваншиврул.
Ва батIаврин цIагу жагьилтурал дирзун дия «Ренессансрал шанна шин» тIисса. Мяйжаннугу, вай шаннагу шинал дянив Шахьуйннал шяравалу диялну цIу дурккунни, вай жагьилтурал кумаграйну цикссагу давуртту щаллу хьунни, шяраваллил тарихраву уттинин къакIулну бивкIсса затру ялун ливчунни. Вайннах бурувгун къуццу тIий бур шяраваллил махъсса жагьилталгу. Фондрал жагьилтурал чIарах бацIлай бур шяраваллил Адам Аьлиевлул каялувшиндарайсса Жяматийсса советрал членталгу.
Ва ххуллункьинисса батIаврий жагьилтурал бувсунни ларгсса шинал лахъишиврий дурсса ва, пандемия ва цаймигу багьантту сававну, дуван къархьуну лирчIсса давурттая. Укуннасса батIаву хьуссия дурусну шинал хьхьичIгу.
![](https://ilchi.info/wp-content/uploads/2021/02/vzdhfgvsryxu_2.jpg)
Муния шиннай фондрал хъун бакъасса бюджетрацIух, цалва хIарачатрацIух жагьилтурал дурну дур итталун дагьансса давуртту: карантин баян бувну, инсантураща давурттайн буккан къабюхълахъисса ппурттуву вайннал шяраваллил 20 инсаннайх бавчIуссар дуки-хIачIиялул кьуцуртту (цIанасса чIумалгу фондрал къулагъасрай ур 4 инсан), шяраву буллалисса мизитран кумагран Рамазан-зурул гьантрай дартIунни 400-азаллийсса къурушру, Кьурбан-байрандалул чIумал шяраваллил ахIвал-хIал кIюласса кулпатирттайх дарчIунни дикI, шяраву шамийлла дурунни субботник, Шяраваллил кьини, личIи-личIисса оьрмулул шиннал гьурттучиталгу (яла чIивиманан – 3 шин, яла хъунаманан – 53 шин) кIункIу бувну, бунни спортрал бяст-ччаллу, хьхьичIун ливчуминнан фондрал чулуха грамотартту ва бахшишругу дурну. Дурми давурттая буслай, миннул сияхIрай кIицI лаган ччива ларгсса шинал фондрал жагьилтурал ва цIа дурксса журналист, блогер Руслан Кьурбановлул дянив хьусса хьунабакьавугу, шяраваллил сайтран, архивран тIий, вайннал тарихийсса, хъиривлаявурттал журалийсса диялсса материал салкьи даву, шяраваллил махъсса зунттуйсса кьунттай-ххяллай петроглифру лякъавугу.
«Год в цифрах» тIисса ххаллилсса цIагу дирзун, жагьилтурал бувсунни ларгсса шинал спортраву дурми хьхьичIуннайшивурттая, хъунмурчIиннив – «Кубок Лакии» ва «Лига Лакии» тIисса футболданул турнирдай шяраваллил командалул дурсса гьурттушиндарая.
Жагьилтурал дурминнуяр дуванми давуртту чIярусса дур. Миннувугу мудангу чIарав бацIлантIишиву, цащава шаймур буллантIишиву кIицI лаглагисса бия шяраваллил Жяматийсса советрал вакилтурал – Адам Аьлиевлул, МахIаммада Сагидовлул, Кирамуттин Аьлиевлул, АбутIалиб Маммаевлул ихтилатругу. БавтIминнал дакIру ххари дувансса хавар бувсуна Адам Аьлиевлул – ва шинал, паччахIлугърал пландалийнгу лавсун, аьраххуллия байбивхьуну, шяравун бияннинсса ххуллу багьайкун бакьин бувантIишиву.
![](https://ilchi.info/wp-content/uploads/2021/02/vzdhfgvsryxu_3.jpg)
БатIаврил ахирданий фондрал жагьилтурал ларгсса шинал цалла дуллалисса давурттаву чIарав бавцIусса, спортраву, медициналуву, жяматийсса оьрмулуву хьхьичIуннайшивуртту ккаккан дурсса шяравучутуран буллунни Барчаллагьрал чагъарду, бавтIминнайх дарчIунни дувансса давурттал сияхIгу чирчусса, шяраваллил шанна журалул суратирттащалсса 2021-ку шиналсса календарьду.
Гихунмайсса яхши-хаш, ихтилатру хьуна нахIу-нацIусса ссупралух.
Щак бакъа, укунсса батIавурттал, хьунабакьавурттал цIакь буллалиссар жулва мархри, шяраваллил инсантурал дянивсса дусшиву.
![](https://ilchi.info/wp-content/uploads/2021/02/7d4ec61c-ae0b-4518-aefb-da7.jpg)