Хъусращиял шяраватусса ХIасайниева РахIимат хъунма хьуну бур шяраваллил жяматран эбратрансса, яхI-къириятрал цIакьсса кулпатраву, ялун нанисса никиран кIулшивуртту дуллай оьрму гьан бувсса учитель НурмахIаммадлул ва ужагърал ттарцI Марияннул къушлий.
Ряхва душнивасса РахIимат кIилчинмур бур. Вагу, ссурвал кунма, чIивинийва дарсирдал ва даврил бюхъу бусса, хIарачат буллалисса душ бивкIун бур.
–Тани шяраваллил кIанттай, ичIурагу, кьатIувгу, дулланмур чан къашайвахха, жулва нитти-буттахъал жу мудан дарсругу лархьхьуну, давугу дуван аьркинссар тIисса кьяйдалий тарбия бувайвав. ИчIаллил хъунмур хъар, гьай-гьай, хъунмур ссийн Анфисайн дагьайва. Амма жунмургу чан къашайва. Нину рязи дуванну къуццу тIунгу биялсса хIарачат бувайссия, – тIий бур РахIимат.
Нальчикрай Роспотребсоюзрал Технологический техникум къуртал бувайхту, ва 1982 шинал Ярославуллал областьрайн зун бувтун бур. Яла МахIачкъалалив зана хьуну, шагьрулул цалчинмур ччатI шахьай заводрай технологну зун бивкIун бур. Ванил бюхъу-хIарачат чIалай, кондитер цехрал хъунмурну бивтун бур. Перестройка дайдирхьусса ппурттуву ччатI шахьай завод лакьайхту, «Военторграй» хъунмур инженер-технологну зий бивкIун бур.
[dropcap]Ч[/dropcap]ув, ци даврий зурчагу, захIмат ххирашиврийну ва дакI-аьмал хъиншиврийну архIал зузиминнангу, кIулцириннангу бусрав хьусса инсан бур РахIимат. ХIакьинусса кьинигу ва, армиялийн буцлацисса жагьилтал гъилисса дукралулсса буваврил ялув бавцIуну, Военкоматрай яла узданмур ва бусравмур даврий зий буссар.
Ванил захIматран лайкьсса кьимат хъуниминналгу, хIукуматралгу бивщуну бур, барчаллагьрал чагъарду, хIурматрал лишанну тамансса дур. РахIиматлул цила оьрмулул дус Ссунгъурдущалсса ца арсгу, кIива душгу ххаллилну хъуни бувну бур. Арс Расул контрактрай аьраличуну ур, хъунмур душ Камила ХIукуматрал бухгалтериялий зий бур, чIивимур душ оьрчIалсса буллай шаппа бур.
Январь зурул 4-нний ванин 60 шин хьуссар. Ххаришивуртту духханнав вил ва Ссунгъурдул ужагърайн, РахIимат! Вила дакIнийхтунусса захIматрайну ва дакI хъиншиврийну ина ми лайкьгу дурссар, вин ми хIагу-хIалалссар. Барачат ва ччаву зул ужагърая хIура къахьуннав!
