![](https://ilchi.info/wp-content/uploads/2020/12/llabnukh_1.jpg)
Къара Къараев, МахIаммадрасул Товкаев
ХIХ ттуршукулул ахирданий СунбатIлиясса Манаплул арс Адам зий ивкIун ур Гъази-Гъумучиял Хъун мизитраву – цал кьадину, яла имамну сайки 20 шинай. Мунал арс МахIаммад (Адам-МахIу) Буттал кIанттул цIанийсса дяъви байбишиннин 10 шинай зий ивкIссар Гъуниннал, Ахттиял районнал МВД-лул начальникну, аьрая зана къавхьуссар.
Граждан дяъвилул Виричунал цIа ларсъссар Оьмаров Гъази Оьмардул арснал (Ттугъи-Гъазил).
Совет хIукумат дишиннингу, дирхьуну мукьахгу, хIакьинусса кьининин муххал ххуллу сунбатIуллахь бур. ПаччахIнал заманнай Владикавказрай муххал ххуллул Реал.училищагу къуртал бувну, Владикавказрая Дарбантлив дияннинсса дистанциялул начальникну зий ивкIссар Ибрагьимов Ибрагьим (Къуннил Ирбу), яла махъ МахIачкъалалив ххуллул мастерну зий ивкIссар Аьбдуллаев Аьбдуллагь (Къибан Аьду).
Кьура шинал мутталий Ухссавнил Ккавкказуллал муххал ххуллул МахIачкъалаллал дистанциялул хъунаману зий ивкIссар Закарижанал арс СутIаев Рамазан. ЦIанакул Дагъусттаннал муххал ххуллул хъунаману зий ур АьбдурахIманнул арс Адамов Захар. 16 сунбатIличунал ларсъссар Лениннул орден, 7-ннал ЗахIматрал ЯтIул ттугълил орден, 14-ннан дуллуссар «ХIурмат бусса муххал ххуллучи» тIисса цIа.
![](https://ilchi.info/wp-content/uploads/2020/12/llabnukh_2.jpg)
Къаяккантуллал, РутIуллал райкомпартиялул ВКП (б) -лул, Дарбантуллал шагьрулул партиялул комитетрал 1-ма секретарьну, Дагъусттаннал наркомземрал ччатIулсса байсса отделданул хъунаману зий ивкIссар Магьдил арс Магьдиев МахIаммад. Яла махъ — Лакрал окружкомрал исполкомрал председательну, райкомрал 1-ма секретарьну.
Му чIумал бувну бур Лакрал театрданул къатри, ШавкIрату Щарав бияннинсса ТIулизуннал ххуллу ва ламу. Ленинградрай дахху-ласулул институт ва лавайми кооперациялул курсругу бувккуну, ХIажибуттал арс Манапов Камил зий ивкIссар «Дагпотребсоюзрал» председательну, Дагъусттаннал Совнаркомрал председательнал хъиривчуну, 1940- 1947 ш.ш. – Дагъусттаннал обкомрал секретарьну, Лакрал райкомрал 1-ма секретарьну, Ростовуллал, Курскаллал областирдал потребсоюзрал председательну. 1943-кусса шинал Камиллун дуллуну дур Лениннул орден.
1964-1967-кусса шиннардий КПСС-рал Ккуллал райкомрал 1-ма секретарьну зий ивкIссар Закарижанал арс СутIаев СултIи. Яла зий ивкIссар обкомпартиялул инструкторну, Дагъусттаннал «СКОТО-промрал» председательну.
Ккуллал райкомрал 2-мур секретарьну зий бивкIссар Хизриева ПатIимат Хизрил душ. Мура даврий зий ивкIссар Амуттинов МахIаммада (Михаил) Амучил арс. Бабаюртуллал райкомрал 2-ма секретарьну зий ивкIссар Узайлиев Рамазан Оьзайлил арс.
Ккуллал райкомрал 3-ма секретарьну бивкIссар Мутталлаев Аьбдул МутIаллил арс, Аьбдуллаева Жамилат Аьбдуллагьлул душ, МахIаммадова Асият Садикьлул душ.
Ккуллал райкомрал ВЛКСМ-рал 1-мур секретарьну 2 шинай зий бивкIссар Манапова Тамара Камиллул душ.
Цал ВКП (б)-лул, яла КПСС-рал Дагъусттаннал обкомрал Промышленно-транспортный отделданул хъунаману зий ивкIссар Оьмаров Садикь. Дагъусттаннал обкомрал хъаннилсса байсса отделданул хъунмурну зий бивкIссар17 шинай Хизриева ПатIимат Хизрил душ. Мунил лас Аьлилов Нураттин Аьлиллул арс 20 шинай зий ивкIссар Дагъусттаннал Верховный Советрал сакиншиндарал отделданул хъунаману.
Ибрагьимов АхIмади Ирбагьиннул арс зий ивкIссар «Дагсовпрофрал» 1-ма секретарьну.
Ккуллал райсоветрал исполкомрал председательну зий ивкIссар 3 адимина: Салманов НухI Салманнул арс, Ибрагьимов Муслим Ирбагьиннул арс, Амуттинов МахIаммада Амучил арс. Исполкомрал председательнал хъиривчуну зий бивкIссар МахIаммадова Асият Садикьлул душ. Райондалул администрациялул бакIчинал хъиривчуну зий бивкIссар Мирзаева Жамилат МахIаммадлул душ.
![](https://ilchi.info/wp-content/uploads/2020/12/llabnukh_3.jpg)
Ккуллал РАЙПО-рал председательталну зий бивкIссар Салманов НухI Салманнул арс ва Аьлилов АхIмади Аьлиллул арс.
ЦIуссалакрал райондалул военкомну зий ивкIссар Узайлиев Рамазан Оьзайлил арс. Ккуллал райондалул военкомну – Аьлимов ТIажиб СалихIлул арс.
Республикалий лайкьсса къуллугъру бувгьуссар Амуттинов Амучи Михаиллул арснал. Ростоврай Муххал ххуллул институт бувккуну мукьах му зий ивкIссар цаннияр ца хьхьичIунсса давурттай: МахIачкъалаллал УМС-рал хъунама инженерну, начальникну, Дагъусттаннал Госсоветрал членну, ДР-лул экономикалул министрну ва ХIукуматрал Председательнал хъиривчуну, Пенсионный фондрал хъунаману. Амучил тамансса давуртту дурссар СунбатIуллал агьалинал социал-культуралул оьрму ххуй-хъин баврил ялув.
![](https://ilchi.info/wp-content/uploads/2020/12/llabnukh_4.jpg)
Амучил уссу Амуттинов Артур Михаиллул арс, Ленинградрай Хьхьирил академиягу бувккуну, зий ивкIссар Лакрал ва Ккуллал районнал КГБ-лул начальникну, Дагъусттаннал ФСБ-лул отделданул начальникну, ванал дуссар полковникнал чин. ЦIанасса чIумал Артур зий уссар Ухссавнил Федерал округрал Роспотребнадзорданул министрнал хъиривчуну, Дагъусттаннал Роспотребнадзорданул хъунаману. Амучил ва Артурдул ппу МахIаммада (Михаил) зий ивкIссар цала сакин бувсса «Ххяххабаргъ» кказитрал 1-ма редакторну.
Дагъусттаннал Композитортурал союзрал хъунаману зий уссар Фаталиев Рамазан АбутIалиблул арс.
1992-ку шиная шинмай, цал Ккуллал райондалул Культуралул къатлул директорну, яла Культуралул управлениялул каялувчину хIакьинунин зий буссар ДР-лул культуралул лайкь хьусса зузала Ибрагьимова (Исрапилова) Марина МахIаммадлул душ.
ЦIуссалакрал райондалул Культуралул къатлул «корифей» ва Дагъусттаннал ва Аьрасатнал лайкь хьусса артист Аьлимов Аьбдулхаликь СалихIлул арс оьрмулухун зий ивкIссар Халкьуннал театрданул урчIа кану.
ЧIирисса СунбатIуллал шярава увкссар 25 элмурдал кандидат ва 3 доктор.
ЦIана МахIачкъалалив зий буссар цIа дурксса архитектортал: ХIажикьурбанов ХIажикьурбан Илларкьадинал арс ва Оьмаров Оьмар Мусал арс.
МахIмуд Аьлилов,
пенсионер, ш. СунбатIул