[dropcap]Ш[/dropcap]яраваллил библиотекалул ва культуралул къатлул зузалтрал , мукунма «Ккурккуллал ккурчIа» группалул сипталий, Ккурккуллал шяраву лахъа-хъунну кIицI ларгунни Учительнал кьини.
Андриана Аьбдуллаева
[dropcap]Ш[/dropcap]яраваллил библиотека чIюлу бувну бия байрандалун хасну. Ккаккиялун дирхьуну дия школалул лайкь дурсса наградартту, шикку зий бивкIсса учительтуран хас бувсса альбом ва школалул аьрали музейравасса цаппара экспонатру. Мероприятиялийн оьвкуну бия Ккурккуллал школалий дарсру дихьлай бивкIсса учительтурайн-ветерантурайн. Мажлис тIивтIуну махъ ихтилат бунни чIярусса шиннардий Ккурккуллал школалий каялувшиву дуллай ивкIсса , цIанасса чIумал райондалул Хъунисриннал советрал председательнал къуллугърайсса Даниял Магьдиевлул. Ванал бувсунни школалул тарихрая ва ккаккиярттая, хьхьичIунсса учительтурая ва выпускниктурая, бувсунни тай шиннардий шикку зий бивкIсса оьрус учительтураягу.
![](https://ilchi.info/wp-content/uploads/2020/10/d-17.jpg)
— Ккурккуллал школа мудан райондалий ца яла хьхьичIунмур школалун ккаллину бивкIссар. Спортрал ва художествалул самодеятельностьрал бяст-ччаллаву, дарсирдал олимпиадарттай школалул райондалий ва республикалий хьхьичIунсса кIанттурду бугьайссия. ЦIанагу Ккурккуллал школалул дуклаки оьрчIру ва учительтал чялишну гьуртту шайссар цинярдагу райондалул мероприятиярттай. Ккурккуллал школалул выпускниктурава увккун ур 8 элмурдал доктор, 42 элмурдал кандидат. 24 инсаннал къуртал бувну бур школа мусил медальданий. Ккурккуллал школа лайкь хьуссар «Шинал школа- 1999», «Ттуршукулул школа» тIисса дипломирттан ва цаймигу наградарттан. Вай ккаккияртту хIакьину жува барча буллалисса учительтурал захIматрайнур хьусса. Цала даву ххуйну кIулсса , хьхьичIунсса учительтал жула школалий мудангу бивкIссар,-увкунни ванал.
Бигьа бакъасса учительнал пиша язи бувгьуну, щала цала оьрму оьрчIру тарбия баврин ва миннан кIулшивуртту дулаврин хас бувсса учительтурахь барчаллагь тIисса бюххансса ихтилат бунни ва школалул выпускница, цIана цуппа учительница Гульнара Магьдиевал. Учительтурал даврин лавайсса кьимат бишлашисса, цала дуклакисса чIунну дакIнийн дичлачисса ихтилатру бунни библиотекалул ва культуралул къатлул зузалтралгу. Учительтуралгу барчаллагь увкунни цивппа. хъама къабивтун, укун лахъа- хъунну барча бан дакIнийн багьминнахь.
Хъирив «Ккурккуллал ккурчIа» группалул чулуха бахшишран лавсун бувкIсса тортру группалул вакилтурал-администратор Анжелика Мусаевалгу, нагу, барчаллагьгу увкуну, буларду жула ххирасса учительтуран. Шадлугърайн бучIан къавхьуминначIан биян барду шаппа-шаппай. Гихунмайсса цала дуклакисса ва зузисса чIунну дакIнийн дичлачисса аьчухсса ихтилатру хьунни авадансса ссупралух. Ттунгу хъинну тIааьнну бия цал ттигу ттула учительтуращал щябикIан, школалий дуклай ва зий бивкIсса чIунну дакIнийн дичин.
Цал ттигу зун барчаллагь, хIурмат бусса учительтал. Зул захIматран багьа бищун къашайссар. ЦIуллушиву дулуннав, оьрмурду лахъи баннав.