![](https://ilchi.info/wp-content/uploads/2020/08/paty_2.jpg)
[dropcap]В[/dropcap]а ппурттуву нава Москавлив гъирарай най бивкIра учирча, щялмахъри. ХIатта Москавуллал ХIукуматрал сипталийну хьусса федерал конкурсраву ххув хьуминнавух диплом ласун най бивкIхьурчагума. Коронавирусраясса нигь дуккан дурархха агьалинал дакIурдива, ттухьгу шаппами аэропортрихха вирусрал кюрувагу, чун най бура, шанма зуруй шаппасса дуснакьгу бувхIуну, тIий бия. Муданма лявкIуну, лабивкIунгу пайда цир?
ПатIимат Рамазанова
[dropcap]Н[/dropcap]ава Москавлив нанисса кьини оьвкуна аэропортрай зузисса жула вакил, «Илчилул» яла дакI тIайлама буккугу, критикгу Алексей ХIажиевлул. Бусав нава Москавлив най бушиву, регистрация дувай кIанай бушиву. УвкIунни гассят, регистрация дуллалисса душнищал щурщулий ихтилат бунни. Лахъи къабан, самолётрал салондалуву щябикIайхту, махIаттал хьуну бура ца ххюя- ряха пассажир акъа акъархха, тачIав укун дачIрасса самолётраву къавхьуссара, вирусрал иш бухьунссар тIий. Бувккун нанийни хIисав хьунни самолетрал бакIрайчул бачIва бунугу, кIийх махъ ца кIану бачIвасса бакъашиву. Ялагур къабувчIусса ттун, пакьирнан, нава бизнес-классрал пассажирка бивкIшиву. Билетру эконом-классралсса бунугу, Алексейл хIарачатрайну, бика кунма, къутI бивкIун бившиву Москавлив. Гьаннайсса, аьрххилул цалчинсса тIайлабацIу.
Хъирив кьини жун дустурал Москавливсса теплоходрай бялахъансса билетру лавсун бия. Москавуллал архитектура, ххуйшиву ва аргъ- кутак ккаккан ччарча, чара бакъа теплоходрай неххайх ккуруг дуван маслихIат бувавияв гьарцаннан. Хъамакъабитайсса яргсса асардал видуцIай дакI! Хаснува хьхьувай чанна лавхъсса Москав личIинува авурну чIалан бикIай. Учин мукъун, Москавуллал мэриялул шагьру чанна лахъан бавриву бюджетрал сахаватшиву дувайнуккар. Август зурул 6-мур кьини Аьрасатнал Торгово-промышленная палаталуву дия на Москавлив бучIаврил сававсса шадлугъ, «Хъамакъабивтсса дяъвилул хаварду» тIисса конкурсраву ххув хьуми барча буллалисса. Ва «ЧIявумиллатирттал Ххувшаву» ( «Многонациональная Победа») тIисса проектрал лагрулийсса конкурс бия, дяъвилул чIумал совет билаятрал агьлу дусшиврул бувгьуну бивкIшивриясса.
Цимилагу бавсса , хьхьичIун ласласисса хIучча бурхха, дяъвилул шиннардий агьалинал цIакьсса дусшиврул бутIагу бушиву ххувшавриву. Ттунгу Италиянал аьрщарай жан дуллусса, Италиянал Виричунал цIагу хIалал дурсса, Читтурдал шяраватусса ХIасан-ХIусайн Камаловлул оьрмулиягу, мунал цIа дирзсса ХIасан-ХIусайн Камаловлул гьалмахтуращал — Ссапарбаг Аьбдуллаевлущал, Султан ЦIаххаевлущал, Сайпуллагь Аьбдуллаевлущал Италиянавун лавгсса аьрххилия, тийхсса партизантуращалсса хьунабакьаврия бусан ччан бивкIуна. Дусшиврул тема цурда дурхха иттав ххяхлахисса. 1022 макьалалува 75 макьала язи дургьуну дия Аьрасатнал Вирттал хIаласса жюрилул. Миннувух -ттулмур текстгу.
[dropcap]М[/dropcap]и 75 макьала цачIун дурну, итабавкьуну бия ххуйсса альманах. Альманахругу, дипломругу ххув хьуминнан буллунни Аьрасатнал Вирттаврал. Ттун буллуна Совет Союзрал Виричу, бусалардавун агьсса разведчик, полковник Горовой Вдадимир Ильиннул. Лауреатътал барча буллай, проектрал хъунмур Эмма Рождественскаял кIицI лавгуна циняв макьалартту халкьуннал дусшиврул ххалуй дархIусса душиву, гьанумур мурадгу му бивкIшиву. Сант дагьнура, жу ихтилат бувссия Аьрасатнал Виричу, Аьрасатнал лайкь хьусса аьрали лётчик, генерал-майор Сергей Липовойщал. Ванал бувсуна цува Дагъусттаннал шанна шяравун ившиву, ттущал архIал Москавлив увкIсса ттул арснащалгу аьчухсса, ххуйсса ихтилат бувна. Москавуллал национал политикалул ва регионнал дянивсса дахIавуртталсса буллалисса департаментрал хъунама Виталий Сучковлущал сурат рищайни, на ганахь хъярчирай учав, кIилчинна вил чIарав бавцIуну сурат ришлашисса, ноябрь зуруй «СМИротворец» конкурсрайгу рирщуссия куну.
Ттул дакI хъиннура ххари хъанай дия ттулва дустал, Москавуллал культуралул центрданул ва Мариян Илиясовал цIанийсса «Дараччи» фондрал Москавливсса филиалданул хъунмур Мариян Кьаландароваяту тIайла хьуну, Басират Билалова (ва ца ппурттуву «Илчилул» редакциялийгу зий буссия) ва БатIи Оьмарова ттуярвагума ттул бахшишрая ххари хъанай бушивриягу, ттулла кьини хъун дан дипломру буллалисса шадлугърайн бучIавриятугу. Жу суратру рищарду Аьрасатнал Вирттавращал ва балайчи, композитор Алексей Хворостяннущалгу. Шадлугърай гьуртту хьуми барча бувна машгьурсса актер Александр Песковлул, телеведущая Юлианна Шаховал, Аьрасатнал телевидениялул ва радиолул оьрчIал хорданул.
Торгово-Промышленная палаталул жанахIравун буххайхтува, ттул я бавцIуна Совет Союзрал КIийла Виричу АхIмад-Хан Султ1аннул сурат дусса стендрай. ЛичIинура ххуйну чIалай дия тиннайсса стендрайсса Италиянал Виричу ХIасан- ХIусайн Камаловлулмур суратгу. Конкурсрайн дуркIсса циняр материаллу ва суратру ядуллан дуллунни Аьрасатнал ярагъуннил гужирдал Хъунмур храмрал музейравун (ва «Патриот» тIисса военно- патриотический паркравусса музейри тIий бия).
Ахирданий ттучIан гъан хьуна «Аргументы и факты» кказитрал журналистка, фамилия дакIний къалирчIунни суратру ришлашисса авазалуву. Танил увкунни: «Ттун цалчин бакъар «Илчи» кказитрал цIа баллалисса», — куну. КьюлтI къабанна, тIааьнну бия. Машгьурсса ТВЦ каналданул журналистналгу «Илчи» таржума бува увкунни, бусав «Вестник» бушиву. «Мудангу бахшишру ва ххуйсса хаварду агьалинахь буслансса тIайлабацIу»,-кунни коллегал. Нагу цал ттигу тикрал буванна, хьхьичIунминнавух ттулмур цIагу конкурсрай душиву- му федерал центрданул лакрал журналистикалун бивщусса кьиматри куну.