![](https://ilchi.info/wp-content/uploads/2020/05/x600-1.jpg)
[dropcap]К[/dropcap]оронавирусрал къашавайсса инсантурал цIуллу-сагъшиврул цIаний захIматсса шартIирдай зий бур хIакьину цинявппагу хIакинтал. ЦIуссалакрал шяравасса жагьилсса хIакин, ХIабибуллагьлул арс Аьбдулбарин МахIаммадовгу миннавасса ца ур.
Андриана Аьбдуллаева
Аьбдулбарин мюрщи классирттаву дуклакисса чIумалва вайннал кулпат бивзун бур Москавлив. Ва дуккаврил гьунар бусса, итххявхсса оьрчI ивкIун ур. Школа къуртал байхту, чIивинийва хIакиннал пиша ххуй бизлазисса Аьбдулбарин увххун ур А.И. Евдокимовлул цIанийсса Москавуллал медициналул ва стоматологиялул университетравун (МГМСУ).
Ва къуртал байхту увххун ур И.М.Сеченовлул цIанийсса Цалчинмур Москавуллал медициналул университетрал ординатуралувун. Коронавирусрал инфекция сукку шайхту, Аьбдулбариннун пикри хьуну бур ва азаруннил къашавайми хъин буллалисса хIакинтуран кумаг буллан.
[dropcap]В[/dropcap]а цува рязину стажер хIисаврай зун ивкIун ур 4-мур Москавуллал университетрал азарханалий. Аьбдулбарин буслай ур азархана къашайшалтрал бувцIуну бушиву, цавай гьаннин, цавай букIлай бушиву. Укунсса тагьарданий хIакинтуран хьхьара къадурну зун багьлай бушиву.
— Жува мюхчан шайсса янналуву зун рахIатну бакъар, амма вай къаларххун пайда бакъар. Зий буру бригадарду бувну, цаннал ца баххана буллай. Жула шаппами жун, смена къуртал хьуну махъ, видеосвязьрайхчIин ккаклай бур. Ци чулийгу, цIанасса тагьарданий хIакинтуран махъаллил хьун бучIину бакъар ,- тIий ур Аьбдулбарин.