![](https://ilchi.info/wp-content/uploads/2020/04/IMG_0371.jpg)
[dropcap]Б[/dropcap]акуй ялапар хъанахъисса ГьунчIукьатIрал шяравасса Аьлиева СалихIал цIа жул буккултран кIулссар, личIи-личIисса шиннардий тих ялапаргу хъанай,
ххуй-ххуйсса къуллугъирттайгу зий бивкIсса жула лакрал хъами-чиваркIуннаясса макьаларттайну. Ва хъанахъиссар «Азейрбаджан- ТАСС» — агенствалул хьхьичIунсса журналист.
З.АьбдурахIманова
-Бакуйсса лак цукун бур? ЗучIа ци тагьар дур?» тIисса жул суалданухьхьун жаваб дуллай, СалихIал бувсунни тикку хъанахъимуния.
-ЖучIагу, гьар кIанай куннасса, мура къабигьасса тагьар дур. Карантин жучIа баян бувуна мартрал 24-нний. ХIакьинунин жучIа 1400-ннийн ивсса инсан къашавай ур, 19 инсан ивкIуну ур тIисса хавар бур.
Жу, шикку ялапар хъанахъисса лак, ва ишираву хъиннува цаннащал ца дахIаву дурну, гьар кьини цаннайн ца оьвтIий, чичлай, цума цукун урив ххал уллай буру.
Азирбижаннал дазурдугу, зулми кунна, ларкьуну дуссар. Апрельданул 20-нния тихунмай цайми хIукуматирттай, хаснува Аьрасатнаву, Туркнаву, ливчIсса жул агьали бувцуну букIлантIисса самолетру кьамул дуллай байбишинтIий бур. Мигу най буна кIира нюжмардийсса карантиндалий битантIиссар. Жу, шикку ялапар хъанахъисса лак, ва ишираву хъиннува цаннащал ца дахIаву дурну, гьар кьини цаннайн ца оьвтIий, чичлай, цума цукун урив ххал уллай, цаннах ца аякьалий буру. Цалсса шиккусса лакрал кулпатирттаву мукун къашавайсса, азарханалийн агьсса цучIав акъар.
[dropcap]Ш[/dropcap]агьрулий тIурча дуки-хIачIиялул ттучанну, аптекарду ва цаппара социал идарартту зий бур. Лавкьуну бур школарду ва вузру. Даврийн къалагара, цанчирча, оьрмулул шинну хIисавравун ларсун, нагу бура «нигьачIимур группалувун» багьлай. ХIукуматрал кьамул бувсса хIукмурдугу гьарца къуллугърал щаллу буллай бур цила низамрай. Халкь, вичIикъадихьлай, кIичIирттавун сайрданийн буклакисса ишру нажагьсса бакъа- бакъар. Дуки-хIачIиялул багьри лахъ-лагь бавуртту дакъар жучIа. Халкьгу паракьатну, карантиндалул чIун къуртал хьуннин, ссавурданий бур.