ХIатта вай на кIицI буллалисса махъру чIявусса макьаларттаву хьунабакьайсса бухьурчагу, ттунгу ччай бур вай цал уттигу кIицI бан.
Гьай-гьай, цавагу кулпат къавхьуссар Хъун дяъвилул щавщи къабивсса. Дяъвилул цIаравун къабагьарчагу, къинттуллухсса давурттай зий бивкIссар, Ххувшаврил кьини гъан дуллай, жула ниттихъул, ссурвал, хъунбавахъул.
ХIажимурад ХIусайнов
Вихьуллал МахIатIулавхъал тухумрая дяъвилийн лавгссар ттул бутта Шяъван, буттауссурвал Аьвдурашид, Чарин, Аьйшат тIисса буттарссил лас Калла, ванал уссу Жамалуттин, Ххадижат тIисса буттарссил цалчинма лас Аьлил, кIилчинма лас ХIасан, ПатIимат тIисса буттарссил лас МахIаммад. Вайннаяту зана къавхьуссар Аьвдурашид, Аьлил, Калла, Жамалуттин. Ттул ниттиуссу КIуруххъал КIурух, 1926-ку шинал увсса, дяъвилул шиннардий Каспийск шагьрулий дуклай ивкIссар ФЗУ-луву. Гичча ва гьан увну ивкIссар, цайми оьрчIащал, Нижний Тагиллайн аьралий заводрайн, дяъвилун аьркинсса сурсатру дуллан. Тих ва къашавай хьуну, шавайн увкIссар.
Аьмну лавсъсса чIумал, Вихьуллал жямат хьхьичIава мукссава кьатIух бивщусса бивкIун бакъар. Яни, чанну бакъа, хIалтIилухун къалагайсса бивкIун бур. Ва иширан багьана шавугу диркIун дур Вихьуллал жяматрал хъу-лухччи инсантурал бакI буккан буван бюхъайсса лагрулул дикIавугу. Хъун дяъви къуртал хьусса шиннардийгума, на оьрчIсса чIумал, чачIав нанисса цичIав дакъанагума, къатта-къушлинсса аьркинлугъ шиччара дузал шайва. Улу, арамтурал лаххиягума шяравура щаршсса янналия дувайсса иш бикIайва. Мунийн Вихьуллал чухъа учайва.
Ватан дуруччин шярава лавгун ивкIссар 183 вихьличу. Вайннавату зана къавхьуссар 113, зана хьуссар буттал шяравун увагу 70 адамина, мигу – кув мушакъат хьуну, кувгу цIуцIавурттал бувгьуну. ЧIявусса чиваркIуннал дяъвилул цIараву ккаккан дурссар чувшивуртту, лайкь хьуссар чIярусса орденнан ва медаллан.
Ттул буттарссил Ххадижатлул кIилчинма лас (цалчинма Кьадиров Аьлил дяъвилия зана къавхьуссар) БиштIаев ХIасан кIийла лайкь хьуссар Славалул ордендалун. Ванал ца мутталий немецнал шанна танк ччуччин дурссар. МахIаммадов ХIусайннул ххассал бувну бивкIссар частрал ттугъ. Ванал цал, немецнал шалклувун лавгун унува, цала документру ца мурхьиралу бувччуну бивкIссар. Ванал цалалу кьатI увну ивкIссар 140 немецнал саллатI. Ва цувагу аьщуйн биту ивкIссар. Вай чувшивурттахлу ванал цIа дуллуну диркIун дур СССР-данул Виричу уван. Амма, кIай мурхьиралу бувччусса документру бакъа баврийн бувну, цIа къадуллунура лирчIун дур. Дяъвилул цIараву ка кьадиртун увкIсса МахIаммадиев МахIаммади лайкь хьуссар ЯтIул ттугълил ордендалун, ТIутIилаев Аьли хьуссар Буттал кIанттул цIанийсса дяъвилул шамилчинмур ва кIилчинмур даражалул орденнал кавалер. Цинявннал цIарду кIицI къадулларчагу, чувшиву къадурсса цаягу къавхьуссар.
Къинттуллух ливчIсса хъами-душру кув къанаврттайн лавгссар, кувгу, цащава шаймур буллай, колхозраву зий бивкIссар. Мукунма дяъвилул цIараву талатиминнан жуларду, ппалул гьухъри щашлай, гай, посылкарттаву дирхьуну, гьан дуллай бивкIссар. Ттул ниттиуссил, КIуруххъал Шяъваннул, кулпат Аьлиханова Сиянат буслан бикIайва, дяъвилул шиннардий комсомолтурал бригада бувну, хъуниминнангума эбратну зий бивкIшиву. Ялагу, аьпа бивул, бусайва цув колхозрал хъуниминнал, ящикIрайгу бацIан бувну (ва чурххал чIивисса бивкIун бур), дяъвилул иширттая бусласисса кказит бригадарттал хьхьичI ккалакки байссияв тIий.
Амма ттул буттал шяраваллийн биявай ливчIссар ца балагу. 1944-ку шинал Вихьуллал шяравалу, вайми лакрал шяраваллащал, Аухнавун дизан дансса хIукму бувну бивкIун бур. Яла га чIумал колхозрал председательну ивкIсса Аьшаев Аьлиллул, ца хьхьу-кьинилул мутталий Вихьулла ар чIатIрах диххан бувну, га ккаккан дурссар: «Вана жуннагу, дяъвилий талатиминнангу бакIлахъия дучIан дуван бюхъайсса аьрщи жучIа», — куну. Бивтссар тIар яла бизан къабувнува.
Дяъвилия зана хьусса дяъвилул гьурттучитурал шяраваллил ахIвал-хIал гьаз буван хъунмасса захIмат бивхьуссар. Гайнная хьуссар яла захIматми, яла жаваб дулун багьайми давурттал ялув бавцIусса пишакартал. Дяъвилул цIараву ка кьадиртсса МахIаммадиев МахIаммади, запIгу ивкIун, аьралий китилдануву занан икIайва, ххуллул бригадалул бригадирну зий. Хъинну тIалавшинна дусса адамина икIайва. Мусаев ХIасан дяъвилия увкIссар ччаннал мушакъат хьуну. Ва зий икIайссия почталул хъунаманугу, яла колхозрал экспедиторнугу. Итнайлаев Аьлилгу икIайва ванаяр хьхьичI экспедиторну колхозраву. МахIаммадов ХIасаннул бувгьуссар райондалий мадарасса къуллугъру. Ва шяраву парторгну, сельсоветрал, колхозрал бухгалтерну ва колхозрал председательнугу зий икIайссия. ЧIярусса шиннардий колхозрал яттил удаманну зий икIайссия дяъвилул гьурттучи, ттул ниттил ссурахъу, Сулайманов Оьмар. Ва буслан икIайва 1970-ку шиннардий яттища ттирзусса накIлия дурсса нис, колхозрал складрай дишинсса кIанугума бакъа, колхозниктурайх дарчIуну диркIшиву. Цирдагу ца къуруш ва 30 кIапIикIран килону.
ХIусайнов Хачилов ия щупир. Ванал цимилгу, Бажиганнайн, Бабаюртлив занай, колхозрал аьркиншин щаллу дурссар. Дяъвилул гьурттучитал Чаринов ХIасан, ХIанапиев МахIаммад зий бикIайва почталул хъунимину. Цинявннал цIарду кIицI къадуварчагу, дяъвилия зана хьусса къучагътурал шяраваллил тарихраву цан лавхьхьусса лайкьсса кIану бувгьуссар. Вайннал цIарду абадссар!
