[dropcap]Щ[/dropcap]алла дуниял гьулусан дунни коронавирусрал. Дунияллийциригу къазразан бунни. Вакссава инсантал къагъ-байтурман шаврил сававгу циятура вирусраятунияр муницIун бавхIусса варсагъру, ляхъан бувсса хаварду хьунни.

---

ПатIимат Рамазанова
[dropcap]И[/dropcap]нтернетрал, смартфоннал, соцсетирттал бияла ялтту буклакисса чIун дур хIакьину. Укун хьхьичIунмай итххявхсса замана бакъания, (ихтилат техникалул каширдаяр) хIатти ция инсантал вакссава укун гьалак бу­ккан буван! Цивппа чIарав бусса кунма, буссар усттарну къакру ляхъан буллай, вайксса-тайксса ливтIуну бур, авай, багьайкун коронавирусрал ххутIахьхьун биривну буру тIий цавай, дурагу дакъасса азарди, хIиллакарсса политикалул аьмаллур тIий цайми. Сагъмагума сакъат уван­сса авлия хаварду хьхьу-кьини.

ТIайламур бусан, телевидениялулгу биялсса бутIа ххи бунни аваралул ялун, циняв каналлай кIюрххия гьанттайннин цава ца аваза гьаз буллай. ХIакинтурал, экономистътурал пикрирду бикIанссар, ссаву ци буссарив бувчIин буванссар. Амма хьхьугу, кьинигу щалва билаятрал агьлу шаппа-шаппа бусса ппур­ттуву, цинявнная коронавирусрал экспертътал къабуллай, къабучIиссарив ххуйсса, тяхъа­сса киносуратру ккаккан дуллан, дакIру тирх учин дувансса передачартту сакин дуллан? Цинярда машгьурсса телепередачарттай зумату щяв къабишаймур махъ бия байтурмансса коронавирус.

[dropcap]У[/dropcap]тти бакIрай бавцIунуккар, телевидениялул программалийн баргъ щунуккар. Жуллами дакIурдивунгу баргъ буруган бувансса ишру жучIавагу хъанай бур, гьай-гьай. КьатIаллил билаятирттайсса миллиардертал гацIана сукку хьуну бия, инсантал мусиватсса азардануща хха­ссал буван кумагру буллай, медициналул оборудование, аьркинмур машан ларсун азарханардайн гьан дуллай. Билл Гейтслул, Марк Цукерберглул биял­сса кумагру бунни, Сильвио Берлусконил 850 миллион буллунни Ломбардиянал медучреждениярттан. Американал балайчи Рианнал 5 миллион доллардал буллунни.
Мяйжанссар, тайнналму­ничIа ца ххуттай дишинсса сахаватшиву дувансса бувккунни жучIавагу. Телеведущий ва артист Дмитрий Нагиевлул 10 миллион буллунни ИВЛ аппаратру ласун. Шиккува бусанну ванал ччянира хIасул дуршиву ятинтуран ва мушакъатсса оьрчIру ябуллалисса кулпатирттан кумагру буллалисса «Анна» тIисса фонд. Амма ванал тIалавшинна дусса дур кумаг ашкара къабувансса.

Аьрасатналми олигархтуран ккаккиялунсса даву дурунни сенатор Сулайман Каримовлул, дяъвилул ветерантуран ца-ца миллионгу буллуну, миллиард ва бачIиннунсса оборудование Дагъусттаннал азарханардангу машан ларсун. Бувккунни цаймигу бизнесментал, предпринимательтал кумагру буллалисса.
Инсантурангу бувчIлай бур цума уссарив, аьтIи мишангу дурну, цалва бакI ххассал буванмуних хьума.

[dropcap]И[/dropcap]нсантуран дуки-хIачIия диян дуллалисса акциярттугу хIат- хIисав дакъа чIярур, валлагь. Нава личIаннин, циняв бугьараминначIан ва мюх­таж­минначIан биявай бур тIисса пикригума бухлай бур. Амма, бугьарасса инсантал буруччин кIанай, дастта-дасттарду дурну минначIан ичIунмай заназими, хъямала багьлагьими (ца сертификат дулун 10 инсан ссан аьркинссар!) ва дуки-хIачIиялул кьуцуртту биян буллалини цив­ппа цукун хъинсса агьлу бурив ккаккан буллалими вирттал бакъар. Вирттал, цIуцIаврил бас буллалиминнал къювурду лагь дуванмур буллай, хьхьу-кьини къакуну, азарханардай зузимири. Вирттал итталун къабагьанну , паракьатну ка- кумагру буллалимири.