[dropcap]М[/dropcap]едициналул маскарду дириллай дакъашиврун ца чаран лякъин, МахIачкъалаллал Кировский райондалул БакIчи СалихI Сагидовлул сипталийну,
му райондалийсса цаппара ательерттаву маскарду дурухлай байбивхьунни. Даву щириркIуну дур. АцIва ателье хIала бувххун бур ва давривух, хъиндайдихьу дурсса кьинира сайки азарда маска дурурххуну дур.
П. Рамазанова
— Ва къабигьасса ппурттуву маскарду дурухлан бакIрайн лавсъсса дарзитурайн барчаллагьрай буру, — увкунни СалихI Сагидовлул маскарду дурухлахисса ательелувун увхсса кIанай. — Предпринимательтурал хIая дакъа укун захIматсса ппурттуву маскардал багьри лахъ бунни, укунмагу маэшат кIюласса агьалинай цIими къабувну.
Ванал бувсунни маскарду цува каялувшиву дуллалисса райондалул агьалинайх укра дачIлантIишиву, цIу бутIуй интернатирттайминнан, мюхтажминнан дулунтIишиву.
ХIатта аптекардайх ва супермаркетирттайхгума укра дачIинтIишиву. Бувсунни 50 азарунниха лирчусса маскарду дуруххансса ният душиву ва вайва гьантрай дуки- хIачIиялул кьуцурттащал маскардугу дачIлай бушиву. ДакIнийн бутанну, Кировский райондалул администрациялул дуллалисса ххуйсса даву – ахIвал кIюласса ужагъирттайн дукиялул продуктылул кьуцуртту бачIлачIаву уттигу найнна душиву.
