Райондалул библиотекалий

[dropcap]М[/dropcap]арт зурул 4-нний Ккуллал, райондалул шяраваллавусса библиотекарттал зузалтрахь, 8-мур мартрал кьини барча дан бувк1ун бия ЧIяйннал школалул дуклаки оьрчIру.

ОьрчIащал бия учительница Шалласуева Луиза.
Мажлис тIивтIуну бия Ва­ччавсса райондалул библиотекалул къатраву. Шикку гьуртту хъанай бия Ваччиял шяраваллил администрациялул каялувчинал хъиривмур Мадаева Роза, Ва­ччиял ва райондалул культуралул зузалт.

[dropcap]О[/dropcap]ьрчIал бувккуна нитти­хъан хас бувсса лакку мазрай­сса ва оьрус мазрайсса шеърирду, дурккуна дикломацияртту, увкуна балайрду. Мажлисрайн бавтIминнан хъиннува ххуй бивзуна 9-мур классрал дуклаки оьрчI Рамазанов Расуллул, цала гармонгу бивщуну, увкусса балайрду. Хъаннинсса ссайгъат хIисаврай балай увкуна райондалул культуралул зузала Кьурбанов ХIабибуллагьлулгу. Хьуна мукунна ялагу барча бавуртту ва тирхханну чIа учавуртту. Тяхъасса ишну хьуна мажлисрайн бувкIминнайх оьрчIал дарчIусса чIапIай чирчусса чIа тIутIавурттугу.

Барча хъамий, зул байран!