[dropcap]В[/dropcap]ай гьантрай МахIачкъалалив щалвагу Аьрасатнал учительтурал профессионал конкурсрал «Учитель года – 2020» муниципал
ятIапрал хIасиллу дунни. Ххув хьунни 30-мур лицейрал учительница Шихбабаева Лариса.
ПатIимат Рамазанова
Ванил ингилис мазрал дарс дишайсса дур. Гьашину ва конкурсрай гьуртту хьуну ур 29 учитель. Лариса Шихбабаева республикалул конкурсрайгу хьхьичIун буккантIишиврий дакI дарцIуну бур ванил коллегахъулгу, шагьрулул кIулшиву дулаврил управлениялул вакилталгу.
— Ларисал учениктурал Аьрасатнал ва дунияллул халкьуннал лагрулийсса конкурсирттайгу хьхьичIунсса кIантту бугьай, дуклаки оьрчIал хIасиллайнугур учительнал даврин кьимат бищайсса. Ва цила даву ххуйну кIулсса, дуклаки оьрчIругу ххирасса педагог бур. Республикалул ятIапрайгу ххув хьуну, Аьрасатнал конкурсрайнгу букканссар, миккугу тIайлабацIу хьунтIиссар тIисса хьул-умудрай ура, — тIий ур МахIачкъалаллал кIулшиву дулаврил управлениялул хъунама Вадим Дибияев.
Лариса Шихбабаева Дагъусттаннал кIулшиву дулаврил отличник бур, 2018 шинал ва 2010 шинал ххув хьуну бур «Самый классный классный» тIисса республикалул конкурсирттайгу. 2013 шинал тIурча, ххув хьуну бур Аьрасатнал хьхьичIунми учительтурал конкурсрай. Ялув кIицI лавгсса лицейрай ва зий бур 2006 шиная шинмай, 4 зуруйсса тIурча, Американаву ингилис мазрал кIулшивуртту магьир дуллай бивкIун бур.