Декабрь зурул 17-нний «Дагестан» РИА-лий хьунни Да­гъусттаннал Госжилинспекциялул каялувчи Аьли Жабраиловлул конференция.

Андриана Аьбдуллаева
[dropcap]В[/dropcap]анал бувсунни цала каялувшиннаралусса къуллугърал шинал лажиндарай дурсса давурттая.
Дагъусттаннал Госжилинспекциялул сакин дурну дур 2019-2020 шиннардий ссутнил ва кIинтнил чIумуйн хIадурну бикIаву мурадрайсса давурттал план. ХIасул бувну бур ми давурттал ялув бацIансса оператив штаб. Ккаккан бувну бур газпромрал идарарттащал цачIуну щаллу буллансса масъалартту.

Цалчинма-цалчин – чIявусса квартирарду бусса къатраву нигьачIаву къадикIансса куццуй газ ишла баврил масъала. Мукунма, пуркIу буккайсса, гьава нани­сса (вентиляция) каналлу саргъунну зузи даврил ва цаймигу масъалартту.
2019 шинал Дагъусттаннал Госжилинспекциялийн чIявусса квартирарду бусса къатраву ялапар хъанахъиминная бувкIун бур 4493 аьрза. Миннува 2906 аьрза бур МахIачкъалаллал агьалинаясса, 788 – Каспийскалиясса, 207 – Дарбантлиясса, 78 – Избербашлиясса, 76 – Къизилюртлиясса, 54 – Хасаврая­сса, 53 – Буйнакскалиясса, 41 – Къизлардаясса, 35 – ДагОгнилия­сса, 18 – Южно-Сухокумскалиясса. КIантту-кIанттурдайн бивну, ялун ливчуну бур ялапаршиндарал законодательствалул тIалавшиннарду щаллу къадурсса 4071 иш.
Ххалбигьавурттайн бувну сукку дурну дур 2538 дело, дирхьуну дур 4 млн. ва 800 азарда къурушрайн дирсса аькIри.

Ялун лирчусса диялда­къа­шивуртту дукьан дансса 2664 тIалавшинна дурну дур. Миннул 95% щаллу бувну бур, чивчуну бур 1101 протокол.
Госжилинспекциялул тIалав­шиннардайн бувну, мировой судьятурал ТСЖ-лий ва каялувшиннардал компаниярттай (УК) 7 миллион ва 282 къурушрайн дирсса аькIри дирхьуну дур, зана дурну дур агьалиная тIайла дакъа ххишалану ларсъсса (1 миллион ва 686 азарда къуруш) арцу.
Аьли Жабраиловлул бувсунни Инспекциялий мудан зий душиву «Горячая линия» — 63-09-37.
Апрель зуруй зузи дурну дур маз къакIулсса, чIу ххуйну къабаяйсса инсантурансса «Горячая линиягу». Укунсса дагъусттанлувтураща гьан дан бюхъайссар sms-сообщенияртту ва номерданий: 8(928)546-16-59 ягу WhatsApp-райхчин. ХIакьинусса кьининин укун 20 аьрза бувкIун бур, 10 аьрзалул хIакъираву хъирив лавну, чаран лякъинсса тIалавшинна дурну дур администрациялия, вайминнул хIакъираву дурну дур бувчIин бавуртту.

Шинал лажиндарай чIявусса квартирарду бусса къатраву ялапар хъанахъиминнал отоплениялул хIакъираву Госжилинспекциялийн бувкIун бур 165 аьрза, вентиляциялул хIакъираву – 244, электричествалул хIакъираву – 273, дяркъу­сса щинал хIакъираву – 151, гъили­сса щинал хIакъираву – 92. Мукунма 207 аьрза бувкIун бур газрал оборудованиялул хIакъиравугу.
Аьли Жабраиловлул бусласимунийн бувну, Госжилинспекциялул судрайн буллуну, республикалул 18 каялувшиннарал компаниялуща (УК) зерххуну дур лицензияртту. Мукьра компаниялул цала къазунсса хIукму бувну бур. Лицензияртту дуллуну дур 32 организациялухьхьун. Вай бакъассагу, 32 организациялуща бюхълай бур, конкурсрал хIасиллайн бувну, цала каялувшиндарайн ласун щилчIав биялалий бакъасса чIявусса квартирарду бусса къатри. Укунсса 31 къатта бур хIакьинусса кьини республикалий.

Аьли Жабраиловлул мукунма бувсунни 2014 шиная шихунмай Дагъусттаннал Госжилинспекциялий зий бушиву жяматийсса инспектортурал институт, 2014 шиная 2019 шинайн бияннин жяматийсса инспектортурал кьюкьравун 43 инсан увхшиву.
Аьмну, ларгсса шинах бурувгун, ЖКХ-лул агьалинансса хIаллихшиннарду ххуй хьуну дур.
Журналистурал суаллахьхьун жавабру дуллай, Аьли Жабраиловлул бувсунни агьали цала УК-лий рязину бакъахьурча, миннаща, цаламур компания кьариртун, цайминнал каялувшиндарайн бучIан бюхъайшиву.