Хъинну чIявусса агьлугу бавтIун, бюхттулсса даражалий хьунни Дагъусттаннал лайкь хьусса артистка Халисат Батырбековал юбилейрал мажлис – бенефис.
Зулайхат Тахакьаева
[dropcap]Т[/dropcap]ачIав бакъачIин тIааьнсса хIахI бия га хьхьуну театрданул залдануву. Ттул цукунчIавсса щак бакъассия Халисатлул савлугърал мажлис гьамин укунсса даражалий хьунтIишиврийн. Цанчирча, театрданул коллективращал ци шяравун, цумур шагьрулийн аьрххи багьарчагу, даин на мукIру шара Халисат тамашачитуран цуксса ххирасса буссарив. Гьарца кIани-кIанттай бикIайссар ванил лагма лавгун. Навагу архсса ххуллия най буна мажлисрайн бувкIссияв, ттула буза ликкан бансса мажалвагу бакъа. Халисатлул бенефисрайн къабучIансса чарагу бакъассия. Балайчи хIисаврайгу, актриса хIисаврайгу, инсан хIисаврайгу ттун Халисат хъинну ххирассар. На даингу хIайран бара ванил дакIнил хъиншиврул ва аьчухшиврул.
Мажлис бачин бувну бия Дагъусттаннал Халкьуннал артистал Аслан МахIаммадов ва Саният Рамазанова.
А. Къапиевлул цIанийсса Лакрал музыкалул ва драмалул театрданул ца хьхьичIунсса актриса ва ца язимур балайчи хIисаврай, Халисатлул бивтсса творчествалул ххуллия гьарза-гьартану бувсунни Аьрасатнал магьирлугърал ишккакку Гулизар Султановал. Ванил дургьусса роллая аьщуйн щуну буслай, Халисатлул яла бюхттулмур гьунарну Гулизардул кIицI лавгунни халкьуннал балайрду учаврил ляличIисса чIу ва такьва.
Аслийсса халкьуннал балайрдах мякьминнал дакIру ххари дуллай, ххуллу битаврихлу Халисатлухь барчаллагь тIисса ихтилатру бунни
Уручуллал шяраваллил бакIчи Салман Ниъматуллаевлул, Мариян Илиясовал цIанийсса «Дараччи» клубрал хъунмур Гульшан Хасаевал, ДР-лул Культуралул зузалтрал профсоюзрал хъунмур Марзижат Буттаевал, Лакрал радиолул редактор Тамара Закарьяевал, ЦIуссалакрал райондалул Культуралул управлениялул каялувчи ХIабибат Буттаевал, Ккуллал райондалул Культуралул управлениялул каялувчи Марина Ибрагьимовал.
Лакрал миллатрал чиваркIуннал цIания Халисат барча бунни ДР-лул Хъунисриннал советрал хъунаманал хъиривчу Сиражуттин Илиясовлул, Жяматийсса Палаталул хъунаманал хъиривчу Ссапар Аьбдуллаевлул, «Дагестан» ГТРК-лул директорнал хъиривчу Ссалам Хавчаевлул ва ишбажаранчи ХIасанхIусайн Камаловлул.
Залдануву щябивкIминнавагу чансса бакъая, сахIналийн буклай, Халисатлухь барчаллагь тIутIими.
Халисатлул юбилейрал савлугъран балайрдайну мажлис чIюлу бунни ванил пишалул уртакьтурал, Лакрал театрданул балайчитурал. Ччергъилттухун цилагу увкунни цимил баярчагу мякь къалиххайсса халкьуннал балайрду.
Ахирданий, тамашачитурал тавакъюрайн бувну, сахIналийн бувккун, ХалисатлуцIун балай увкунни ванил ссурваврал.
Цила кьини хъун дан бувкIсса тамашачитурахь барчаллагь тIий: «Ттул щала оьрмугу, кулпатгу, оьрчIругу, талихIгу театр хьуссар. Кулпатрангу, оьрчIангу дулунсса ччаву на зун, ттула балайрдал кьимат кIулсса тамашачитуран, дуллуссар»,- куну, залданувуцири хъювусул буккан бувна Халисатлул.
Халисат бунияла тамашачитурал дакIурдиву дахIалай чинсса кIану бувгьусса балайчи, актриса бушиву буслай бия, мажлис къуртал хьуну махъ цукссагу хIаллай лавай бивзун, хъатру ришлай, вания ябуцан къахъанахъисса инсантурал.
Барча, Халисат, вил кьини! ЛичIаннав ина вания тихунмайгу, уттинин кунма, халкьуннан бусравну, цIу-цIанпир буну.