[dropcap]Ц[/dropcap]аппарасса гьантри личIлай бур цIусса шин дучIан. ЦIушинал байрандалул ца яла агьаммур лишандалун ккаллийсса елкарду бихьлай байбивхьунни инсантал.

Буванну цIушинал байрандалул гьантрай аьркин хьун кунмасса цаппара маслихIатру.

* * *
Ёлка, парх бивкIун, хъунману чIалан, му чIюлу буллалийни, къяртрал куртIний, елкалул тталлуйх кай-кай дурну, ишла дувара щюллисса рангирал мишура. Ёлка хъиннува ххуйну чIалантIиссар, му чIюлушинна цIай хIаласса духьурча.

* * *
Къяртрал вив куртIну лархъсса гирляндилул зул елка, магьлуву кунма, чанна лавхъун, ппер­ха тIий чIалачIи бувантIиссар.

* * *
Ёлкалийн лахъайсса игрушкарду къагъагъанну ядуван бучIину лякъинтIиссар пластик­рал стаканну. Мюршми игрушкарду тIурча, ядуван шайссар ккунукру бивкIсса лотокир­ттаву.
* * *
Ларзулун, балкондалийн ла­хъансса цIушинал чIюлушиннарду дуван хьунтIиссар эскимо морожнилия лирчIсса мюрщисса ттуршардия.

* * *
Духсса, яру бизар хьусса игрушкардай цIусса пар ххи хьунтIиссар, миннул ялтту ранг дакъасса лак дуккарча ва цIай-цIайлул мюрш бичирчан.

* * *
Байрандалийнсса чIюлу­шинна, ёлка бумур къатлуву дакъагу, вайми къатравугу дуван хьунтIиссар «дождикрайну» ва мишуралийну магъулу­сса люстрардайн ларчIсса елкалул игрушкардайну. Магьраву куннасса люстра хьунтIиссар му кьяйдалийну.

* * *
Искусственнаймур елка къаххирасса, амма вацIлува кьувкьумур елка бишинсса хIалу да­къаминнаща бюхъантIиссар, мукунсса елкалул цаппарасса кьяртив тIутIив дишайсса вазалуву дирхьуну, мюршсса игрушкар­ттайну авурну чIюлу дувангу.

* * *
ВацIлувамур елка бихьлахьийни ххилирчIсса хъархъайнугу къатри цIу буну чIюлу буван бюхъантIиссар. Ми ччяни къакьакьаншиврул, миннул цIайлул, кьункьал ва щюллишиврул зува шайссаксса хъунмасса хIаллай ххари булланшиврул, ухру кай-кай дара атил дурсса калихьулуву ва дишара пластикрал пакетраву.

* * *
ХьхьичIва жула амухъачIа бикIайва чатандалул дарвагру, хараллу. ЦIанарив ттучаннай дур гайннуха лархьхьусса янна дахлай (мешковина учай мунийн), личIи-личIисса утташиву дусса рулоннайну, бахшиш ду­сса коробкалийх тIий, цамунийх тIий, кай-кай дувайсса. Мунил кумаграйнугу елка цIу ва сий дуну чIюлу буван хьунтIиссар (суратрай).

ХIадур бувссар
Бадрижамал Аьлиевал