Ккуллал райондалул шяраваллаву бур ряхва оьрчIал багъ: Хъусрахь, Ккулув, Ваччав, ЧIяв, Хъювхъив, Вихьлив. ЧIяйннал ва Хъювхъиял шяраваллавусса багъру школардацIун бавхIуну бур, гайми хасъсса, цайва цивппасса бур.

Ттун, Ккуллал оьрчIал багъравун лавгун, оьрчIащал ва миннал тарбиячитуращал кIул хьун ччай бия. ТIайлассар, на цакьнивагу кIикку оьрчIал тарбиячитурал дянив шайсса конкурсирттах ябитан, макьала чичин лавгссияв.
Ккуллал шяраваллил оьрчIал багъ бур шяраваллил дянихсса ххуллул лултту чулий, «гьазтIи ламул» чIарав. Шичча чIалай ду­ссар бунияласса зунттал тIабиаьтгу, урувгнал я буччин буллалисса.

Арх дакъа нанисса Хъуннеххал макьандалулгу дакI тирххандарал дуцIин дуллай дуссар. ОьрчIал багърал хIаятравун ша ласайхтува, янилун дагьлай дия тIуркIурду байсса личIи-личIисса чIярусса чIюлусса затру. Ва оьрчIал багърал хIаят на лащан давияв магьрал луттирдаву бакIрайн дагьайсса ххуйшивруха.
На цал бакIрая ихтилат був­ссия оьрчIал багърал каялувчи Исакьова ПатIимат Оьмардул душнищал.

— ПатIимат, буси чанну-ххину зулла даврия.
— Ккуллал шяраву оьрчIал багъ тIивтIуну бур 1970-ку шиннардий. Ва уттисса оьрчIал багъ бусса къат­раву хьхьичIава шяраваллил азархана бивкIун бур. ОьрчIал багъгу шиккун бизаннин цамур кIанттай бивкIссар. Яла, азарханалун хасъсса, кIира зивулийсса къатри дайхту, шивун бивзссар. Уттигъанну вай къатраву хIукуматрал итадаркьусса арцух гьануцIасса ремонт дуварду.

Виннагу чIалай дур, сий дуркIун, яруннин тIааьн дизлай, дакI ххари хъанай душаврийну. ЖучIан оьрчIал багъравун кьамул байссар 2 шинава лавайсса оьрчIру. Цинявппагу бур 4 группа, аьмну ур 80 оьрчI. Гьарца группалуву бу­ссар ца-ца тарбиячи ва мунал кумагчи. Бур мукунма жучIа педагог-психологгу.
Ттун ччива вай жула оьрчIру тарбия буллалисса зузалтрал цIарду кIицI дан. Хъунмур группалул тарбиячину бур ХIусайнова Иза, дянивмур группалул тарбиячину бур АхIмадова Разият, кIилчинмур мюрщи оьрчIал группалул тарбиячину бур МахIаммадова Динаят, цалчинмур мюрщи оьрчIал группалул тарбиячину бур Оьмариева Жавагьи.

Вайннал кумагчиталну буссар: Абакарова Лида, Курбидаева Саида, ХIамзаева Динаят, Аьлиева Ххадижат. Педагог-психологну бур Лукьманова ТIутIи. Ялагу бур кIива тарбиячи: Шяпиева Пазират, Шамхалова Милана.
На кIицI бувми бакъагу, уссар ялагу ххюя зузала: къаралчи, пачлахъу, дукрадуву ва бухгалтер.
ОьрчIру жучIан бувцуну бучIайссар кIюрххил ссят мяйннил дачIинний. Кьунниялай ссят ххюра хьуннин бикIайссар. Биян бангу, буцингу чара бакъа нину-ппу бучIан аьркинссар. Дукра дулайссар мукьийлла. Ца оьрчIан кьинилун итадаркьуну дуссар 50 къуруш. Вайннунсса менюгу жура дувайссар.

— Ци кIулшиву дусса бур тарбиячитал? Инава ци къуртал був­ссар?
— Циняв тарбиячитал педагогнал кIулшивуртту дусса бур – лахъссагу, дянивссагу. На нава къуртал бувссар Дагъусттаннал университетрал Дагъусттаннал мазурдил филологиялул факультет 1994-ку шинал. Шикку зий бура 2004-ку шиная шинмай. БакIрайва, 2009-ку шинайн бияннин, зий буссияв педагог-психологну, муния махъ зий бура каялувчину. КIицI бан ччива жул цинявппагу зузалт цала касму ххирасса инсантал бушиву. Райондалий шайсса конкурсир­ттавух гьуртту хьунигу, жул тарбиячитурал хьхьичIунсса кIанттурду бугьайссар. ДукIу, 2018-ку шинал, АхIмадова Разиятлул цалчинмур кIану бувгьуссар. Ва гьуртту хьу­ссар мукунма республикалул лаг­рулиймур конкурсрайгу.

[dropcap]Я[/dropcap]ла жу ялтту бувкссияв ва шакиллу рирщуссия. ОьрчIру, кув тIуркIу тIий, кув суратру дихьлай, кувгу чагъарду кьукьлай, яла ча­гъиравусса чIун дия. На, тавакъюгу бувну, бувсъссия ПатIиматлухь, цинявппа вайми зузалтгу кьатIув бувккун, сурат рищун ччай ушиву. Мугу щаллу хьуна.
ОьрчIал багърал дарвазалий пиш тIисса бургъил сурат­ралгу буслай бия жувагу мюрщи оьрчIал чIарав жагьилну чIалан бикIайшиву. ТIуркIу тIутIияра мюрщи оьрчIащал!

ХI. ХIусайнов