Декабрь зурул 3-нний Республикалул Медициналул ва социал экспертизалул хъунмур бюрорал
зузалт хьунабавкьунни Каспийскалий ва МахIачкъалалий ялапар хъанахъисса цала аякьалийн лавсъсса цIуллу-сагъшиврул мушакъатшиву дусса инсантуращал. Вайннал кIул бунни цIуллу-сагъшиврул ссуссукьушиву дусса инсантурал цукунсса тIалавшиннарду дуссарив.
Имара Саидова
ЦIанасса чIумал Республикалул МСЭ-лул хъунмур бюрорал зузалтрал хъирив лавну ххал дуллай бур инвалидтурансса реабилитациялун ккаккан дурсса техникалул кьай-кьуйрдал дузалшинна. Масалдаран, хIакьинусса кьинигу бур кресло-коляскартту, дагьлай дунура, ласун къахъанай ливчIсса инвалидтал.
Республикалул МСЭ-лул бюрорал каялувчинал кIицI лавгунни, Дагъусттаннал БакIчи Владимир Васильевлул бувсса хIукмулийн бувну, ххал дигьлай бушиву инвалидтуран ккаккан дурсса реабилитациялул программартту цуксса щаллу дурну дуссарив. ЦIанасса чIумал хьусса дахханашиннардайн бувну хьхьичIара къадагъа дирхьуну диркIсса реабилитациялул техникалул кьай-кьуй утти дулун ккаккан бувну бур.
Ва даву щала Дагъусттаннай дуллай байбивхьуну бур ва хIакьинусса кьини тамансса инвалидтуран дулун ккаккан дунни кресло-коляскартту. Мукунма бюрорал зузалтрал хъуннасса къулагъасрайн лавсунни ахIвал-хIал кIюласса, захIматсса тагьарданухун багьсса инвалидталгу.
Заназин дан захIмат хъанахъисса ва бизан къашайсса инвалидтураща техникалул кьай-кьуй тIалав даврил ва реабилитациялул программа цIу дуккан даврил хIакъиравусса масъалартту дузал бан бюхъайссар ДР-лул МСЭ-лул хъунмур бюрорайхчIин.
МСЭ-лул бюрорал хIакинтал ва ххуллух хьунабавкьунни Каспийск шагьрулий ялапар хъанахъисса захIматсса тагьарданувун дагьсса оьрмулул дугьара хьусса хъамитайпалущал. Вайннал хъирив лавну кIул бунни ванин дагьайсса техникалул кьай-кьуй дузал даврил тагьар. Ва кьини 36-мур бюрорал зузалт бивунни чIярусса шиннардий шанухун агьсса МахIаммад ХIусмановлучIан. ЦIухху-бусу бувну, кIул бунни ци аьркинну дуссарив. Мукунма вайннал цала чулуха пишкаш бунни ванан кроватрачIа бишайсса чIивисса стол.
5-мур бюрорал зузалт бивунни оьрчIния шихунай цIуллу-сагъшиврул мушакъатшиву дусса Анвар АьлиевлучIан. ХIакинтурал цIухху-бусу бунни чIавасса оьрчIал кIулшивуртту итххяххан даву цукун дуллай буссарив. Бюрорал зузалтрал Анвардун пишкаш дунни планшет ва булун ккаккан бунни электроприводращалсса кресло-коляска.
