Ассаламу аьлайкум, ххирасса лакрал жямат! ХIакьинугу, гьар мудан кунма, ттун зухь бусан ччива «Лакку билаятрал рухI» группалувуминнал хьхьичIуннайшивурттая, бюхъу-тяхъалия.
Андриана Аьбдуллаева
[dropcap]Н[/dropcap]а хьхьичIвагу чивчуссия жула группалувусса дизайнер-модельер Индира Бадиярдуя. Ларгсса шинал ванил тIивтIуссия чIярусса шиннардий хияллай бивкIсса Мюрщи кутюрьетурал школа. Школа тIивтIуну хъунмасса хIал къавхьунугу, вай ччяни машгьур хьунни, вайннайн оьвтIун бивкIунни личIи-личIисса мероприятиярттайн.
Уттигъанну Мюрщи кутюрьетурал школа гьуртту хьунни Санкт-Петербурглив Сюзордул ЧIалъаьлуву хьусса Neva Fashion Week модалул нюжмардул лагрулийсса мероприятиярттай. Шикку мюрщи кутюрьетурал ккаккан дунни цала карунних дурурххусса авурсса янна ва аксессуарду – «Мюрщисса. ЛухIисса» цIанилусса коллекция. Санкт-Петербургливн оьрчIру бувкIун бия цала-цала нитти-буттащал, уссурссуннащал. Вай ххуйну кьамул бунни тамашачитурал. Шиккува бусан, мюрщи кутюрьетал буклай бивкIссар подиумрайн «Лакку билаятрал рухI» группалул администратор Разита Мушидовал душнил Камилла Меердул балайрдахун.
— Школалул каялувчи ва преподаватель хIисаврай, коллекциялул тема нара язи дугьара. Ученицахъал яла муницIун (темалуцIун) дархIусса ца-ца зат дуруххайссар цанна. Подиумрай цала дурурххумур цала ккаккан дайссар.
Ва зат хIисавравун лавсун, школалул программалуву дуссар макияжрал, бакI бакьин баврил, дефилелул кIулшивуртту ласайсса дарсру. Ми дихьлан, лахьлан бикIайссар мода ккаккан дан хIадур хъанахъисса чIумал. Мукунма, сурат рищун бацIан лахьхьайссар фотосессия буллан хьхьичI.
Ялагу, жу дурурххусса янна подиумрайнгу ларххун тиннай дукьайсса къадикIайссар, ми укуннасса чIумалгу лахлан шайсса дуссар, — буслай бур Индира. Утти мюрщи кутюрьетал Санкт-Петербургливсса аьрххилул хIасиллугу дурну, Москавлив хьунтIисса Модалул нюжмардийн хIадур хъанай бур.
[dropcap]М[/dropcap]унияр махъ цIусса шинал январь зуруй гьантIиссар Сочилийн, дунияллул халкьуннал дянивсса фестиваль – конкурсрайн.
ДакIнийн бутан, август зурул ахирданий мюрщи кутюрьетал гьуртту хьуссия XVII-мур прессалул фестивальданийгу. Танигу Бадиярдул учениктал гурну хъатру ришлай кьамул бувссия тамашачитурал.
ЧIа тIий буру жула лакку душнин ва ванил каялувшиннаралусса мюрщи кутюрьетуран ттиния тихунмайгу тIайлабацIурду ва хьхьичIуннайшивуртту.
