«Цифровой прорыв» тIисса конкурсрал региондалул ятIапрай ххув хьуну махъ финалданийн дурккунни ДГТУ-рал 2 команда. Финал хьунни сентябрьданул 27-29-нний «Казань Экспо» тIисса Дунияллул халкьуннал выставкарттал центрданий.
«Цифровой прорыв» тIисса конкурсрал экспертътурал советравун ва жюрилувун бувххунни «Росатом» тIисса паччахIлугърал корпорация, «Майл.ру Групп», «Мегафон», «МТС».
Хакатондалий конкурсрал жюрилул членталну гьуртту хьунни ДГТУ-рал ректорнал буржру чIумуйну бартбигьлагьисса НурмахIаммад Суракьатов, хакатондалул модераторну гьуртту хьунни ДГТУ-рал ПОВТ и АС-рал кафедралул хъунама Тимур Айгунов.
«Цифровой прорыв» тIисса проектрал каялувчи Олег Мансуровлул чулуха ДГТУ-рал ректорнайнсса барчаллагьрал чагъарданий кIицI бувну бур ДГТУ-рал вакилтурал профессионалшиврул даража ва сиптачишиву, хаснува Тимур Айгуновлулсса.
Барчаллагьрал чагъарданий тIий бур: «Цифровой прорыв» тIисса щалвагу Аьрасатнал конкурс баврин кумаг баврихлу барчаллагь тIий ура муний гьуртту хьуминнахь. Зул зузала ХIажинал арс Тимур Айгунов – хIисаврттал техникалул ва автомат системарттал программартту щаллу даврил кафедралул хъунама – гьуртту хьунни конкурсрал финалданий ва дунияллий яла хъунмур хакатон хIисаврай увххунни «Гинесслул рекордирттал луттиравун».
Тимур ХIажиевичлул профессионализм, сиптачишиву, командалувух гьуртту хьуминнащал бюхъу-бажар буну сакин дурсса даву сававну командалул хьхьичIунсса хIасиллу ккаккан дунни. Уттигу цал барчаллагь тIий ура ва умуд бур ва хIала-гьурттушиву ттинияр тихуннайгу лахъи лаганшиврийн».
ХIадур бувссар
ХI. Аьдиловлул
