[dropcap]О[/dropcap]ктябрьданул 17-нний МахIачкъалалив Расул ХIамзатовлул цIанийсса Национал библиотекалий дунни Аьрасатнал теп­лицарттал выставка «Даг-Агро 2019». 

Му сакин дунни «Теплицы Дагестана» тIисса элмийсса ассоциациялул, «Дагестан-Экспо» тIисса выставкарттал центрданул ва ДР-лул Шяраваллил хозяйствалул ва бакIлахъиялул министерствалул.

---

[dropcap]В[/dropcap]ыставкалий цалла бакI­лахъия, теплицарттаву дугьаймур ва теплицартту байсса цIусса материаллу ккаккиялун дирхьунни билаятрал личIи-личIисса регионнаясса сайки 60-ксса компаниярттал. Дагъусттаннал ккаккияртту дия «Агромир», «Дагагрокомплекс» КФХ, «Теп­личный» ва цаймигу чIявучин кIулсса компаниярттал.

Выставкалул лагрулий хьунни Дагъусттаннай теплицар­ттаву ахънилсри дугьавриву лябуккулул хIакъиравусса батIаву. Муний махъ лавхъунни ДР-лул шяраваллил хозяйствалул министр Абзагьир ХIусайновлул. Мунал тIимунийну, республикалул ахънилссаннул жулва агьалигу щаллу бувну, 500-600 азарда тонна даххайссар республикалул кьатIувгу.

2018 шинал ларсъссар 1 млн. ва 438 азарда тонна ахънилссаннул бакIлахъиялул. Миннува теп­лицартталсса диркIссар 3,9%. ДукIу теплицартту бивкIссар 593 гектарданул лагрулийсса.
БатIаврий махъ лавхъунни «Теплицы России» ассоциациялул гендиректор Наталия Роговал. Мунил тIимунийну, чIявусса субъектирттай биял хъанай бакъар теплицарттаву зунсса пишакартал, мунияту билаятрал хьхьичIунми вузирдал итабакьлантIий бур микку зун­сса пишакартал.
Выставкалий хьунни ккур­кки столгу. Муний бувсунни теп­лицарттаву бакIлахъия гьарзану ласаврил ххуллурдая.

ХIадур бувссар
ХI. Аьдиловлул