[dropcap]В[/dropcap]ай гьантрай Костромаллал областьрай шадлугърал даражалий Дагъусттаннал культуралул кьинирду кIицI ларгун бувкIунни Дагъусттаннал паччахIлугърал халкьуннал инструментирттал оркестрданул артистътал.

Ва аьрххи хьунни Дагъусттаннал ва Костромаллал дянив дурсса машлул ва экономикалул, элмулул ва техникалул ва культуралул иширттаву хIала-гьурттуну зун дурсса кьутIилул лагрулий.

---

Имара Саидова
ДакIнийн бутанну, ларгсса шинал Костромаллал областьрал коллективрду авадансса творчествардал программарттащал бувкIун бивкIшиву Дагъусттаннайн.
Ва ххуллухсса аьрххилий Да­гъусттаннал делегациялул бакIчину ия ДР-лул культуралул министрнал хъиривчу Мурад ХIажиев. Мукунма шикку гьуртту хьунни Дагъус­ттаннал Культуралул министерст­валул ва ведомствардал вакилтал, республикалул музыкалул творчествалул ва хореографиялул коллективрду.

Костромалий хьусса Дагъус­ттаннал культуралул байрандалун хас дурсса концертрал дайдихьу дунни дунияллийх машгьур хьу­сса Дагъусттаннал ПаччахIлугърал академический ансамбль «Лезгинкалул» ва Республикалул халкьуннал инструментирттал оркестрданул артистътурал хорданийну. Мукунна ккаккан дунни Дагъусттаннал миллатрал артистътурал балайрдал концерт. Костромалий хьусса концертрай гьуртту хьунни Дагъусттаннал лайкь хьусса артисткахъул Загьидат Муслимова ва Индира Зайдиева.

«Костромалул агьлу ва тикку ялапар хъанахъисса дагъусттанлувтал жула балайрдах, музыкалух мякьну бушиву чIалай бия щапI куну тамашачитурал бувцIусса залданийн бувну. Концерт къуртал хьуну махъгу, жущал суратру ришлай, хъамалу оьвтIий, итакъабакьлай бивкIру. Кострома шагьрулул каялувчитурая, культуралул министрная тIайла хьусса бусравсса хъамал сахIналийн був­ккун, барчаллагь увкунни циняв­ппагу гьурттучитурахь», — тIий буслай бур Дагъусттаннал халкьуннал артистка Зоя Чунаева.

Аьрххилул лагрулий Кострома шагьрулийсса Романовский музейраву тIиртIунни Аь. Тахо-Годил цIанийсса Дагъусттаннал миллатирттал музейрал фондравасса выставка. Шикку Костромалул агьулдануща кIул хьун бюхълай бия Дагъусттаннал миллатирттал лаххи-ликкиялущал, ишла дуллай бивкIсса кьай-кьуйлущал, Дагъусттаннал заргалтурал дур­сса чIюлушиннардащал ва магьир­сса усттартурал каруннал бувсса ярагъуннищал ва цаймигу жула тарихрая бусласисса документациялущал.

Ва выставка цурдагу тIиртIуну дикIантIиссар ноябрь зурул 4-нин.
Дагъусттаннал ПаччахIлугърал музыкалул инструментирттал оркестрданул артистътал дакIнихтуну барчаллагь тIий бур асардал вибувцIусса ва ххаллилсса аьрххи сакин бан сипта хьусса ва чIарав бавцIусса ДР-лул культуралул министр Зарема Буттаевахь.