Хамискьини А. Къапиевлул цIанийсса Лакрал паччахIлугърал музыкалул ва драмалул театрданул тIиртIунни 84-мур сезон.
Тамашачитуран ккаккан бунни дагъусттаннал цалчинсса драма – Гьарун Саэдовлул «Къалайчитал». Мунил премьера хьуссия июль зуруй, Гьарун Саэдов дунияллийн увккун 125 шин, аьщун ивзун 100 шин ва «Къалайчитал» пьеса чивчуния шиннай 105 шин шаврин хас бувну.
Зулайхат Тахакьаева
[dropcap]С[/dropcap]пектакль цIусса ххуллу-ххуттай бивхьунни Москавлиясса режиссер, Гьарун Саэдовлул ссил арснал душ ПатIи МахIачевал.
Пьесалуву аьч дурсса, XX-мур ттуршукулул дайдихьулий агьамну диркIсса, тема – ватандалухсса ччаву, социал-экономикалул буруккинтту, политикалул тагьар хIакьинусса кьинигу личIлай дур агьамнура. Мива буруккинтту гьануну лавсун бур цIусса ххуллу-ххуттай бихьлахьисса спектакльданувугу. Тара нукIузаманнай кунна, ттизаманнул оьрмулиягу батIул хъанай дакъар «хIалтIуханшиву». Маэшатрал хъирив щала дунияллийх кIама бивщусса жула ватанлувтуран дакIния дуклай дакъар ппухълуннал аьрщигу, ватангу.
[dropcap]С[/dropcap]пектакльдануву ишла бувну бур Аьрасатнал халкьуннал артист Ширвани Чаллаевлул музыка. Сценография – Дагъусттаннал лайкь хьусса художник Аскар Аскаровлул. Агьамми роллу дургьуну бия Дагъусттаннал халкьуннал артистал Аслан МахIаммадов (АхIмад), Луиза Шагьдилова, Дагъусттаннал лайкь хьусса артистал ПатIимат Давидова, Аьбдул Мурадов (Аьли), Зинаида Чавтараева, артистал
Ибрагьим Мусиев (Макьсуд), Адам Гайдаев (Кьурван), Ислам МахIаммадов (Камил), Малик Щамххалов (Илияс).
Актертурал дюхханну дургьусса роллал хьхьичI бацIан бувунни революция хьуннин хьхьичIсса рахIму бакъасса оьрму. Режиссернал агьаммур чIурчIав дурну дур жагьилтал чил миллатирттал дянив мархрая ябуцаврия. Спектакльданул ахирданий экрандалий ккаккан дурунни «Ттул мархри Лаккуйри бусса, кIай кьукьирча, на бяйкьусса кьурукьра» тIисса мукъурттищалсса Гьарун Саэдовлул сурат.
