Мурчал гуж ва инсан

Ва дунияллий хьукъа­шай­сса ишру бакъар. Гуж­сса марчру (торнадо, ураган) бищай­сса Американал цумурдив-ца штатрай ялапар хъанай бивкIсса

Рене Трута тIисса хъамитайпа ца мукун гуж­сса мурчал ххурупIайлул, 240 метралул лахъшиврийн гьазгу бувну, цила къатлучIату 18 километралул архну экьиливчуну бур.

---

Ва иш хьуну бур 1997 шинал. Урагандалул хъамитайпа гьаз бувну, аьрщарайх бищуннин хьуну дур 12 минутI, чурххайсса щавурду дакъа­сса, бакIрай цурда ца чIарагу къалирчIун, ца вичIигу, кагу гъаргъун лявкъуну бур. Ванихава лавхьхьусса иш хьуну бивкIун бур 1984 шинал Германнал Франкфурт-на Майне тIисса шагьрулучIату арх бакъасса кIанайгу, гукунссава мурчал ххурупIайлул гьаваллавун 64 дуклаки оьрчI гьазгу увну, 100 метралул архнийн экьи ливчусса.

Къундалул авлахърайсса марафон

1994 шинал Сахара тIисса къундалул авлахърайхсса марафондалул чIумал, спортсментурал кьюкьлува акъа хьуну ур Италиянава­сса Мауро Проспери. Лявкъуну ур спортсмен 9 гьантлува. Марафондалул гьурттучитурая ва аьйкьуну ур цичIар къа­чIалачIисса къундалул марч гьаз хьусса чIумал. КIири­сса къундалул авлахърай МаурочIа кIива гьантлува къуртал хьуну дур, лахъи дуккан дуллай ивкIсса, канихьсса щинал шушагу. Цаппара гьантрава ванал пикри бувну бур, каний­сса туннурду кьувкьуну, цанма цала бувну, га аькьувалул ца бази бан. Му чIумалгу, щинах мякь бувксса ванал чурххаву­сса оь бунийва татлай, цичIав бан бювхъуну бакъар. Ва лявкъуну ур урчIулчинсса кьини авлахърай ялапар хъанахъи­сса цавай агьулданун. Ккашил ва мякьлил аьз увсса спортсмен 18 килорал илтIа хьуну ивкIун ур.
ХIадур бувссар З.АьбдурахIмановал

УрчIра ссятрай хьхьирил чIанулу

Хъунмасса талихI хьуну бур Американавасса кIива кулпатрангу. Баргъ бивтсса ца паракьатсса кьини вай, яхталийгу щябивкIун, океандалувун багьлагьисса Калифорниянал жазиралийх сайрданий бувккун бур. Цаппара хIаллава чарив къакIулну гьаз хьусса штормрал вайннал яхта чIан лавай бувтун бур. Га цаннал Сьюзен тIисса кулпат му хIалатраву каюталуву бивкIун бур. Палубалийсса шамагу щинавун багьну, яхтамур Сьюзеннущал жазиралул чIанулун лавгун бур. Цукун-бунугу гьузуй, яхI бувсса гай шамуннангу кIира ссятрава ялун бувкIсса ххассалбувултрал кумаг бувну бур. Яхталул каюталуву «ясирну» ливчIсса Сьюзенгу аквалангистътурал урчIра ссятрава ххассал бувну бур.

З. АьбдурахIманова