Ассаламу аьлайкум, ххирасса лакрал жямат!
«Лакку билаятрал рухI» группалувуминнал цIунилгу баян бунни цаятува. ЦIунилгу вайннал гьунардая ва хьхьичIуннайшивурттая бусан ччай бур ттун зухь.
Андриана Аьбдуллаева
Москавлив Поклонная зунттуй сакин дурсса XVII-мур прессалул фестивальданул лагрулий хьунни чIярусса мероприятияртту ва творчествалул проектру. Шикку «Маленькое. Черное. Памяти Коко» тIисса цIанилусса коллекция ккаккан бувссар жула дизайнер-модельер Индира Бадиярдул каялувшиндарайсса Мюрщи кутюрьетурал школалул. Тамашачитуран мода ккаккан дуллалиминнавух бия жула Разитал душру Зухра ва Камилагу. Коллекция ххуй дирзсса тамашачитурал ми, гурну хъатру ришлай, кьамул буллай бия. Школа тIивтIуну хъунма хIал къавхьушивугу хIисавравун лавсун, ва хъунмасса тIайлабацIулун ккалли бан бучIиссар.
Ялагу, «Лакку билаятрал рухI» группалул администратортуравасса ца – Хъювхъатусса Тамара, гьарца фондрал дуллалисса давривух чялишсса гьурттушинна дайсса ва ччинийн бияйсса, зана хьунни Австриянал билаятрая авадансса асардащал.
Жущалгу кIибавчIунни чил билаятрай ккаркмур, ххуй дирзмур.
Чил билаятрайнсса аьрххилия гьавасрал виувцIуну зана хьусса Тамарал арс Шамил МахIаммадовлулгу ххари бунни группалувуми.
Дагъусттаннал гьузун бикIаврил чемпионатрай ванал кIилчинсса кIану бувгьунни.
На хьхьичIмур рубрикалий бувсъссия жула группалуву кIул хьусса жагьилтурал ташу бувшиву гъинттул. Уттигу мукунмасса ца ташу хьунтIий бур. Муниятугу, октябрь зурул 13-нний Москавлив хьунтIисса «Серебряный кувшин» цIанилусса Ккавкказуллал хьхьичIунсса артистурал концертраягу на зухь хъиривми номердай бусанна. Ва концерт сакин дуллалиссар АРТ- NARCISS компаниялул.
Шикку, «бартбисулул ххуллу» тIитIавривухгу гьуртту хьуну, язими артистуран наградартту дуллантIиссар жула Разита.
Ва ялагу, ттун баян бан ччива Дунияллул халкьуннал дянивсса миллатирттал культуралул ва искусствалул фестиваль-конкурс. World Folk Vision – Дагъусттаннаймур ятIап байбихьлахьишиву.
Оьвчаву дуллай буру гьуртту хьун ччисса мюрщиминнайн ва хъуниминнайн. Конкурсрал дикIантIиссар личIи-личIисса номинациярду: къавтIаву, балай, музыкалул инструментру бищаву, модалул дизайнертурал шоу, декоративно-прикладной искусство. Республикалул ятIапрай ххув хьуминнал гьурттушиву дантIиссар январь зурул 7-12-нний Сочилий хьунтIисса Аьрасатнал финалданий. Шикку язи бувгьуми тIурча Аьрасатнал регионнаясса делегациялуву гьантIиссар Саоьдуллал Аьрабусттаннайн.
Гьуртту хьун ччиминнаща аьрза гьан бан бюхъантIиссар ва электрон адресрай https://form.jotformeu.com/92751379308364.Ягу оьвчин бюхъантIиссар ва номерданий 8-926-383-88-88 Разита Мушидова, Ухссавнил Ккавкказуллал федерал округрайсса фестивалданул национал директор.
