сахIналул изагура
[dropcap]Л[/dropcap]аргсса нюжмардий «Вейнерский сад» тIисса мюзикл-холлдануву хьунни, цинма ва цуппа ххирасса вичIидихьултгу, гъан-маччами ва дусталгу лагма лаган бувсса,ДР-лул халкьуннал артистка Луиза Шагьдиловал лакку балайрдал мажлис.
Залму АьбдурахIманова
Аьжаивну гъилисса ва тIааьнсса ссутнил хьхьуну Луизал увкуна илданун цакьнива ххира хьусса ва дакIнил лавсъсса язи-язими балайрду. МиннуцIун Луизал, тамашачитуран «бахшишран» кунма, цIусса балайрдугу хIадур бувну бия.
Луиза жунма кIулссар республикалулгу, мунил кьатIувсса театрдалгу сахIнардай дакIний личIансса, дюххансса роллайнугу. Ва бур, буниялагу, «сахIналул паччахIдуш».
«Лехху, ттул дакI» тIисса концертгу ванил хас дурну дия хьхьичI гьантрай кIицI ларгсса цила оьрмулул юбилейран. Га хьхьуну Луизал чIарав бия цуппа зузисса Лакрал театрданул коллективгу, театрданул каялувчи Бадрижат МахIаммадхIажиевагу ва хъунама режиссер Аслан МахIаммадовгу хьхьичIну. ВичIидихьултравух бия укунсса иширттал чIарав бавцIунмасса «Дараччи» клубрал душру-хъамигу.
Мажлисрай балайрду щаллу бувна лакрал эстрадалул цIанихсса балайчитал Саният Рамазановал, Залихха Катибовал, Арслан Шагьмандаровлул, Самед Буттаевлул, Ямлихан ХIажиевлул, Аьбдул Мурадовлул ва Аьли Абакаровлул.
Луизал юбилей барча дуллалисса махъру лавхъуна «Дараччи» клубрал хъунмур Гульшан Хасаевал, Бадрижат МахIаммадхIажиевал ва Аслан МахIаммадовлул.
Барчаллагьрай бия Луизагу гьарцагу цила концертрайн увкIнайн, ца кулпат кунма, циняв лагма лавгун, балайрдах вичIи дишин бувкIсса цила творчествалул уртакьтурайн. Хаснува цаппара цила балайрдавусса мукъурттил авторшиву дурсса жагьилсса шаэр Аминат Оьмариевайн ва цищала концерт хIадур давриву хъуннасса гьурттушинна дурсса Самед Буттаевлуйн, Ямлихан ХIажиевлуйн ва Арслан Шагьмандаровлуйн.
«ДакIнихтуну ххариссара ва барчаллагьрай бура ттула кьини лахъа-хъун дан чIун ляркъусса гьарнайн. Мудангу хиялданий бикIайссияв ляличIину укун тIааьнсса ккурандалул дянив ттула дакIнивасса язими балайрду щаллу бан. ЧIивисса бунугу, ва ца ттула хиялгу щаллу шаврия ххариссара», — тIий бия Луиза концертрая махъ.
Барчаллагь вингу, Луизай, лакрал культуралуву бихьлахьисса хъунмасса захIматрахлу! Барча вил исвагьисса юбилей!
