[dropcap]Э[/dropcap]кспортрал аралувусса ца яла агьаммур ишну хъанай бур Аьрасатнал Президент Владимир Путиннул майрал хIукму бартбигьиншиврул хIадур
дурсса «Дунияллул халкьуннал дянивсса кооперация ва экспорт» тIисса национал проект дузрайн дуккан даву.
Экспортрайнсса хъус-хъиншивруха зузисса компаниярттан кумагран итадакьлай бур уттинин тачIав къаитадаркьусса арцу – 956 млрд. къурушрал.
«Аьрасатнал экспортный центр» АО-лул гендиректор А. А. Слепневлущалсса
интервью
«Аьрасатнал экспортрал центр» (РЭЦ) АО-лул гендиректор Андрей Слепневлул пикрилий, ттигу-шилагу бяйкьу-шяйкьусса пикри бур чIявучил, ай, туну, Аьрасатнал дазул кьатIув так ца энергоресурсру (газ, навт) дахлай бур тIисса. Слепневлул тIимунийну, му къатIайласса пикрир. Цанчирча, кьатIув даххаймунил шанма бутIул ца бутIа, ханхъус дакъарча, дуккан дурсса хъус-хъиншивур. Так дукIу дазул кьатIув дарххуну дур сайки 151 млрд. къурушрансса хъус-хъиншиву. Жура дазул кьатIув даххайссар дукиялул сурсатру, махру, оьргъашивуртту, вацIлул промышленностьрал сурсатру, химиялул аралул сурсатру ва цаймигу затру.
Аьрасатнал компаниярттаву чIявусса бур дунияллул рынокрайн буккан бюхъансса. Амма миннул ишан хъунмурчIин ласлай бур Аьрасатнал регионнайн ягу яла гъанми билаятирттайн: Къазахъисттаннайн, Белоруссиянайн. Лапва чансса бур дунияллул глобал рынокрайн буккан ччисса.
-Дуссарив национал проект дузрайн дуккан даврил ккалли дансса хIасиллу?
-Му ххуллий дурссар къачансса давуртту. Масалдаран, июльданул 1-нния шинмай экспортрал давурттан ва хIаллихшиннан хасну зузи бувну бур НДС-рал нулданул ставка. Хасъсса дахханашивуртту дурну дур Налогирттал кодексраву РЭЦ-гу гьуртту хьуну. Аьрасатнал хIаллихшинну кьамул дуллалими дазул кьатIув бухьувкун, тIайлану бикIанссия экспортертал (дазул кьатIув хъус даххайми) НДС-рая мурахас баву.
Гьашину июньдалул 18-нний АьФ-лул премьер-министр Анатолий Медведевлул къулбас дурссар ПаччахIлугърал Думалувун валюталул ялув бацIаврил либерализациялул хIакъиравусса закондалул проектрай. Мукунма ишла буллан бивкIунни конкуренция духIаву лахъ дуллалисса корпоратив программартту бартдигьлагьисса компаниярттацIун паччахIлугърал кабакьаврил чаранну. Му программалуву гьурттусса компаниярттан банкирдал коммерциялул ставкартту ялавай бантIиссар 4,5 процентрал.
Миннуяр ххишалагу, РЭЦ-рал (Российский экспортный центр) Минпромторгращал ва Минэкономразвитиялущал цачIу сакин дуллай бур экспорт дазул кьатIув дуккан даврил ва АьФ-лул субъектирттай щурунсса Цасса система.
-Мунил мяъна-мурад цир?
-Му система зунтIиссар 52 билаятрай. ЦIана РЭЦ зий бур Мумбайнаву, Ташккантлив, Ханойрай. ЧIал къавхьуну ми тIитIинтIиссар Азиянал, Европанал, Гъанмур Машрикьуллал ва СНГ-лул билаятирттайгу. Му системалул Аьрасатнал регионну дахIлахIиссар кьатIаллил билаятирттацIун.
-РЭЦ-ралгу ЦПЭ-ралгу (Центр поддержки экспорта) дянив цукунсса дахIаву дуссар?
-2021 шинал буллантIиссар экспортрацIунсса кабакьулул центрду (ЦПЭ) Аьрасатнал циняв регионнай. ХIакьину ми бур 79. Уттигъанну АьФ-лул ХIукуматрал хъин чулий ккарккунни РЭЦ-рахьхьун ялув бацIаврил, мониторинграл ва ЦПЭ-рал давурттал анализрал ихтиярду дулун аьркиншиврул хIакъиравусса закондалул проект. Муния кумаг хьунтIиссар РЭЦ-рал ва регионнайсса ЦПЭ-рдал дянивсса интеграциялул ишру анавар буккан буван.
-Аьрасатнал ишбажаранчитал дазул кьатIувсса рынокирттай буккаврил давурттал тагьар ци дур?
-Дазул кьатIувсса билаятирттащал дахху-ласулул давуртту анаварну дайдишин бюхъайссар электрон машлул майданнайхчин (через электронные торговые площадки). Мунил барашин дуллай дур хъин чулийсса давурттал: Аьрасатнал розницалийсса экспортрал электрон машлул лагру лахъ хьуну дур шанма бутIул ца бутIаксса, цIана дур 746 млн. долларданул.
-Бизнесментал гьуртту хьунтIиссарив «Экспортер года» тIисса премиялий?
-Му премиялийнсса гъира хъунмасса бур. Муний гьуртту хьуншиврул уттира заявкартту дуллуну дур 800-лихъайсса компаниярттал. Цал бакIрай му премиялул ятIапру дурну дур Кьиблалул, Ухссавнил, Баргълагаваллил ва Ураллал федерал округирттай.
Ноябрьданий хьунтIиссар федерал финал. Микку «Аьрасатнаву дурссар» тIисса дунияллул халкьуннал экспортрал форумрал лагрулий яла хьхьичIунминнан (экспортрал чемпионтуран) ХIукуматрал Председательнал дулунтIиссар миннал хьун дурсса хьхьичIуннайшивурттахлусса наградартту.
ХIадур бувссар
ХI. Аьдиловлул
