![](http://ilchi.beget.tech/wp-content/uploads/2019/06/sde343.jpg)
Июньдалул 20-нний Ваччав хьунни ирглийсса фольклорданул фестиваль.
[dropcap]И[/dropcap]юньдалул 20-нний Ваччав хьунни ирглийсса фольклорданул фестиваль. Вара кьини хьунни мукунна 1-мур ЦIувкIуллал шяравасса, дунияллийх цIа ларгсса, Аьрасатнал артистурал цIардан лайкь хьусса, Рабадан Абакаровлул ва Ярагъи ХIажикьурбановлул цIарду абад дуллалисса «Пагьламан» цIанилусса муххал маразрай гьунарду ккаккан бавугу.
![](http://ilchi.beget.tech/wp-content/uploads/2019/06/dwe24ewe2.jpg)
[dropcap]Ф[/dropcap]естивальданий гьуртту хъанай бия, Ккуллал райондалул шяраваллал коллективрду бакъагу, цайми районнал коллективругу: Лакрал, Дахадаевуллал, Щаржавуллал, Шамиллул, Аьхьхьахъиял, Агъуллал, УнцIукIуллал, Рутуллал, ЦIуссалакрал районнал, Буйнакск шагьрулул.
![](http://ilchi.beget.tech/wp-content/uploads/2019/06/dsewew434342.jpg)
[dropcap]В[/dropcap]аччавсса майданнив циняв шяраваллал тIивтIуну бия къатта-къушру. Къур бувну бия дукрардал ссупрарду. Гьай-гьай, цинявгу бия цала шяраваллан хасъсса къищусса яннардаву.
Цал циняв коллективрду цачIун хьуна райондалул Культуралул къатрал хьхьичI. Мичча, цала-цала шяраваллал цIарду чирчусса улттигу гьаз дурну, балайрдащал, къавтIавурттащал, зюннав-дачIулущал бавчуна майданналул чулийнмай. Кьюкьлул хьхьичI най бия балчаннуй щябивтсса жалин. ЧIяйннал жяматрал аьдатрай жалин дурцуну нанисса куц ккаккан буллалисса кьюкьлул хьхьичIгу най бия райондалул бакIчи Шамил Рамазанов, хIурмат лавайсса хъамал – Лакрал райондалул бакIчи Юсуп МахIаммадов, Госдумалул депутат Аьбдулмажид МахIрамовлул кумагчи АьвдурахIман Адамов, Дагъусттаннал Халкьуннал Мажлисрал депутат Аьбдулла Расулов ва цаймигу.
![](http://ilchi.beget.tech/wp-content/uploads/2019/06/ede2ewew.jpg)
[dropcap]Р[/dropcap]айондалул бакIчи хьхьичIну хъамал ялтту бувккуна къатта-къушал. Ххал дуруна шиккусса жула цIурихьулул дуки-хIачIия. Дия шархьсса хъюрув, хьхьахьхьари, буркив, личIи-личIисса ххункIру, кIарттул ччатI, аьрайнгьавккури, гьай-гьай, дукьрахIангу, чIярусса цайми дукрардугу.
Мунияр махъ Ккуллал райондалул пагьламантурал ва МахIачкъалаллал маразрайх лахъултрал школалул, ккаккан бувуна цала гьунарду. Хъирив официалнайну тIиртIуна фестиваль. Барча баврил махъру лавхъуна Юсуп МахIаммадовлул, АьвдурахIман Адамовлул, Аьвдуллагь Расуловлул.
[dropcap]М[/dropcap]уния гихуннай ккаккан дурна фестивальданий гьуртту хьун бувкIминнал программа.
Цалчинсса, кIилчинсса тIий, кIанттурду бачIлай бакъая. Амма Дагъусттаннал Культуралул министерствалул чулуха ва райондалул администрациялул чулуха дуллай бия грамотартту ва бахшишру циняв гьуртту хъанахъиминнан.
Аьрасатнал культуралул зузалтрал профсоюзрал чулуха грамотартту дуллуна чIярусса шиннардий культуралул давурттай зузисса ва захIмат буллалисса зузалтран: ДР-лул лайкь хьусса артистка РайхIанат ХIажиеван, Ваччиял шяраваллил Культуралул къатлул худрук Суллуев Муслимлун, Ккуллал шяраваллил Культуралул къатлул зузала Аьлилов Аликлун, райондалул Культуралул къатлул зузала Аьлибеков Кьурбаннун, Ккуллал райондалул Культуралул управлениялул каялувчи Ибрагьимова Маринан.
![](http://ilchi.beget.tech/wp-content/uploads/2019/06/43de334.jpg)
Дагъусттаннал культуралул зузалтрал профсоюзрал чулухасса грамотартту дуллуна Хъусращиял шяраваллил Культуралул къатлул каялувчи Ванатиев Гришан, Вихьуллал шяраваллил Культуралул къатлул худрук Оьмариева Камилатлун, райондалул Культуралул къатлул зузала Рамазанова Гулжагьран, ЧIяйннал Культуралул къатлул каялувчи Алхасова СалихIатлун.
Тяхъашивуртту лахъи ларгуна ахттая махънин. Гъаралуннил лихъан къабувссания, ялагу лахъи лаганссия.
ЦIуллу баннав зу, ирс ябуллалисса культуралул зузалт!
Репортаж хIадур дурссар
ХIажимурад ХIусайновлул