Апрельданул 10-нний МахIачкъалалив «VISIT DAGESTAN 2019» тIисса II Халкьуннал дянивсса гастрономиялул туризмалул фестиваль тIиртIунни. Шадлугъ тIитIаврий гьуртту хьунни Дагъусттан Республикалул БакIчи Владимир Васильевгу.
Залму АьбдурахIманова
Фестивальданул гьурттучитуравух ия 31 эксперт ва Азирбижаннавасса, Арманинавасса, Сербиянавасса, Словениянавасса, Хорватиянавасса, Эстониянавасса, Исландиянавасса, Украиннавасса, Македониянавасса, Германнавасса, Франциянавасса, Грузиянавасса, Аьрабнал Эмиратирттаясса, Италиянавасса 123 конкурсант.
Дунияллийх цIа ларгсса дукра-къюссул фестиваллай гьуртту шайсса ва халкьуннал дянивсса бяст-ччаллал судьяшиву дувайсса Николай Баратовлул фестиваль тIитIлай, кIицI лавгунни шиккун бувкIсса хъамал махIаттал-хIайран бувну бушиву жула базардавусса дуки-хIачIиялул, ахъулсса-ахънилсриннул аваданшиврул.
«Барчаллагьрай буру дагъусттаннал ризкьи ябуллалиминнайн ва ахъулсса-ахънилсри, уртту-щин ххяххан дуллай, захIмат бихьлахьиминнайн. Ва бакъасса, хIайран бувну ливчIунну зул накIлил продукциялул, хаснува маслил, тартнакIлил нахIушиврул», — увкунни ванал.
Фестивальданийн бувкIсса хъамаллуравух бия жула республикалийн ваниннингу цимилагу бувкIсса, шиккусса кафе-рестораннал хIал-тагьар кIулсса, жула дукра-къюссул тIин-тIааьн кIулсса цIигьурталгу.
Аьрасатнал ресторатортурал Федерациялул вице-президент Леонид Гилетберманнул кIицI бувунни, Дагъусттан хъинну къулайсса, чIявусса миллатирттал культурарду, багьу-бизурду цачIун хьусса кIану бушиву укунсса журалул фестиваллу, шадлугъру дуллан.
Республикалул БакIчи Владимир Васильевлулгу, цала чулуха хъамаллурахь ва сакиншинначитурахь барчаллагьгу куну, кIицI бувунни Дагъусттан хъамал ххирасса ва ми кьамул бан кIулсса, дуки-хIачIиялул, дукру-къюссул авадансса, буллугъсса кIану бушиву.
«Дагъусттаннайн цал увкIма кIилчингу учIан мюхтажна лагайссар шичча. Жул халкь хъамал ххирасса, хъамаличу цала кулпатрал ца чув куна ххарину кьамул айсса халкьри», — увкунни ванал.
Фестиваль нанисса кIирагу-шаннагу кьини МахIачкъалаллал личIи-личIисса кафе-рестораннаву дукрарду дуллай, цала усттаршиву ккаккан дуллай бивкIунни гьурттучитал. Вай гьантрай мукунма най бивкIунни дукрардан хасъсса ккуркки столлу, личIи-личIисса проектирдал гастрономиялул презентацияртту ва мастер-классру.
Мукунма фестивальданул лагрулий сакиншинначитурал хIадур бувну бия вайннан республикалий ва мунил кьатIув цIаларгсса кIанттурдайн туристал буцайсса экскурсиялул аьрххигу. Бивунни вай Дарбантлив, Сулакьрал къуманивун ва ЧиркIайннал ГЭС-райн.
