Ттул буттал шяравун, Ппаласмав, гьаз хьуну нанисса ххуллиява итталун багьайссар лахъисса ларзнил мукьва-ххюва кIаланггу яхьусса, магъигу вив дагьсса, Бухарихъал къатрал цIувцIу чарил чIиртту.

Вайннул залуннал цIагу ттун цалчин чIивинийва, аьпа биву, буттал ниттил хавардава бавссия. Мугу нажагь дакъа къахьунадакьайсса цIа дуну тIий дакIний лирчIсса ххай бура.
Щарнил хъуни агьулданул бусаврийну, Бухарихъул бивкIун бур шама-мукьа уссил захIматрайну чIявусса ятту-гъаттарагу, хъу-лухччигу дусса, Мукьархъиял махIлалий махъ нанисса агьлу-авлад . Бухари акъасса, вайннал ялагу Жавраил, МахIаммад ва Аьйшат ва Тамари тIисса ссурвалгу бивкIун бур.

Амма Совет хIукуматрал гьанурду цIакь буллалисса заманалийн тIайла бавцIусса вайннал кьадардугу, танисса хъинну чIявусса халкьуннал кунма, мугьалттул лавсун, Ссивирнавух, Къазахъисттаннавух – тива-тихунмай ппив бувну кьабивтун бур. Бувагу 3 класс аьрабрай къуртал бувсса Бухари ва ванал кулпат, мугьругу бивщуну, «политзаключенный» тIисса цIагу дирзун, шярава бувцуну лавгун бур. Махъунмай зана хьун хIукуматрал ихтияр дуллусса 1947-ку шинал Бухари ва ванал кулпат Аьйшат цала оьрчIащал, ххишала Ппаласмавгу зана къавхьуну, Щурагь миналулгу хьуну, гиккува цачIу буччингу нясив хьуну бур.

ЦIана цила арсурваврачIа шагьрулий ялапар хъанахъисса Бухарихъал Сакинатлун оьрмулул 86 шин дур. Амма ванин цала агьулданул ялун дирсса тай захIматсса чIунну хъинну ххуйну дакIний дур. ДакIний дур ванин, шин хьусса-къархьусса цила ссу Зугьрагу хьуву бивхьуну нанисса цила ниттил гьухъул мицIгу бувгьуну, цайра дакI-лякьа цIуцIисса щарнил агьлу цивппа ххуллийн тIайла буккан бувксса чIунгу. Му диркIун дур, багьана бунугу-бакъанугу, хъунмасса цIухху-бусу къабувну, мухлукь минардацIа, къатта-къушацIа буллалисса 1937 шин. Сакинат му чIумал 4 шин хьусса-къархьусса чIиви душ бивкIун бур. Аьйшатлун, ва заназисса, аькьлу-кIулши дусса душ бурча куну, цила ниттичIа кьабитангума ччай бивкIун бур, амма «ккулактурал мархха-ххун духлаган дан» кьаст лархIуминнал цукунчIавсса ихтияр дуллуну дакъар душ бавачIа кьабитан.

Шярава бувккун, бахьтта Гъумукун, ги­ччагу хъами-оьрчIру аьраварттай щябивтун, шанма-мукьва гьантлул дянив Щурагьун бивну бур. Гиккугу диркIун дур, цивппа кунма, аь-къаналий буккан бувну нанисса халкьуннал дуниял. Гиччагу вай, гъаттара кунма, хъус духхай поездравун бавкьуну, Ураллайн бивчуну бур.
Ттущалсса ихтилатраву Сакинатлул цила гъавгъсса майгу, вичIилул махъ куртIсса щаву диркIсса кIанугу ттун ккаккан бай. Вагондалул ялувсса шачIанттуя багьну, чIарав хIакингу акъа, чапа тIий оьттул ливцIун нанисса чIиви душ, цичIав кумаг бангу къабювхъуну, къювурдай цукун-бунугу хъингу хьуну, гания мукьах ххуйну вичIилун чIугу къабаллай ливчIун бур.

Ураллай Бухари вацIа кьукьлакьисса хъинну жапасса давурттай зий ивкIун ур. Хъунмасса мурхь ялун багьну, бакIрайн захIматсса щаву дирну, ивчIавайсса кIанава увккун ур. Сакинатлул бусаврийну, цух увкусса балугърал кьанкь дусса щин хIачIан къашайсса оьккисса кIану бивкIун бур. Ца­ппара хIаллава цингалул азарданул гьантлун 40-50 инсан ивчIайсса чIунну ялун дирну дур. Цурдагу кьутIлатIисса дякъил ццихь бусса ссутнил чIун диркIун дур. Му ппурттуву, ххуллийхва бявкъуну, азарданул бувгьуну бивкIсса Зугьра тIимур душгу бивкIуну, тиккува буччин багьну бур. КIанттул хъанай-къахъанай вайннал тикку дурусну ца шин дурну дур. Хъиривмур шинал, цIунилгу батIин бувну бузагу, мува хъус духхай поездравун бавкьуну, Къазахъисттаннал аьрщарайн бичлачисса баян бувну бур. КIия уссин цачIу чIарав ялапар хъанан къабучIиссар тIий, Бухаринал хъунама уссу Жавраил тIайла увккун ур Къиргъизнавун.

ЦIусса кIанайгу, 1929 шиналва бизан бувсса, цала кунмасса кьадарду бусса халкь яхъанахъисса кIану лявкъуну бур. Буттан най дуна колхозрал дучраппалав даву хьуну дур. Аьмсса тагьар-низамгу бявкъусса Ураллал аьрщарайнияр цахъи бигьасса, ризкьи ябан, къатта-къуш бачин бан ихтияр дусса кIану бивкIун бур. Сакинатлун дакIний дур цачIанма хъамалу зуруй, кIива зуруй цал Кузбассрай лухIи хъуручIул шахтардаву зий бивкIсса Ппаласматусса ПаттахI, МахIаммад-Аьли, Аьвдуллагьхъал МахIаммад тIисса жагьилтал бувкIун, ниттил гай хъамалу бан кьаркь дикIухун гайннан ла­кку ххункI буллалисса ва буттащал лахъисса хьхьурдай хавардай бивкIсса чIуннугу.

Гикку Сакинат лавгун бур цалчинмур классравунгу. Школа бивкIун бур вай яхъанахъисса кIаная 2-3 километралул архну. Ги­ккува бувну бур ванил ссу ПатIимат ва уссурвал ХIасан-ХIусайн, МахIаммад ва ХIажигу. Дяъви нанисса 1944 шинал вай бусса кIанайн бизан бувну бувкIун бур чачан-чаргаснал халкьгу. Гай бучIаврищал, захIматшивурттугу чIяру хьуну, цурк, къача-къучшивуртту дагьну дур. 1947 шинал Бухаринахьхьун ихтияр дуллуну дур махъунай Дагъусттаннайн зана хьун­сса. Ихтияр дулурчагу, варив кулпатращал, оьрчIащал Жавраил тIима уссу яхъанахъисса Фрунзелийн гьан дакIнийну ивкIун ур. Ванал кулпат Аьйшат тIурча, цила уссурссунначIан Дагъусттаннайн кIункIу тIий бивкIун бур.

Пик­рирдал ца бази бангу савав хьуну бур, вайннал ужагърайн къачагътал ххявххун, гуж-къия дурну, хъямала бувсса иш. Му иширая бавну, Дагъусттанная Сакинатлул Закир тIима ни­ттиуссу увкIун, маз-кьаз бивхьуну куявнахьгу, ссу ватандалийн буцинмур бувну бур.
Щурагь Бухаринал, къаттагу машан лавсун, цIунилгу къушлил гьану бизан­сса хIарачат бувну бур. Ликкурттал сакъатну уну, ччаннал къювурдай ивкIнугу, оьрмулул 94 шинаву ахиратрал хьуну ур.
ЦIусса миналийн бучIаврищал Сакинат ва ванил 17 шинавусса ПатIимат тIимур ссу кьамул бувну бур консерварттал заводрайн. Хъунма хIал къалавгун, чурххайн гуж багьну, вагу накьлу хьуну бур. Мува заводрай зий бивкIун бур уссурвал МахIаммад ва ХIажигу.

Буллалисса захIматрахлу кIиягу уссу лайкь хьуну бивкIун бур заводрал каялувчитурал чулухасса барчаллагьрал чагъардан ва ХIурматрал улттуй суратру лахъан. Сайки ххюцIалла шинай гикку зийгу бивкIун, Сакинат пенсиялийн бувккун махъгу Щурагьиял Агропромышленный комплексрай зий бивкIун бур.
Цила оьрмулул дусгу ванин лявкъуну ур Щурагь. Ва щар хьуну бур Ххунзахъиял райондалул ЦIада тIисса шяраватусса Юсуп тIисса жагьилнан. Вайннал дянивгу хьуну бур ца душ ва кIия арс. Вайннаягу бивзун бур ххуйсса, Сакинатлул дакI ххари дансса наслу.

Залму АьбдурахIманова