![](http://ilchi.beget.tech/wp-content/uploads/2019/02/IMG_0364.jpg)
ярггу дуллай дия Ниттил мазрал байран
Лап ххуйсса даражалий хьунни ххуллункьини Лакрал театрдануву Лакрал жагьилтурал ккурандалул сипталийну бувсса ниттил мазрай шеъри буккаврил конкурсрай ххув хьуминнан бахшишру дуллалисса шадлугъ. Цувгу хьунни Дунияллул халкьуннал дянивсса Ниттил мазурдил кьинилун хасну.
Зулайхат Тахакьаева
Дурусну кIира шинал хьхьичI Аьли Къаяевлул цIанийсса фондрал каялувчи Амучи Амуттиновлул сипталийну Дагъусттаннал паччахIлугърал педагогикалул университетраву хьуссия лакку мазрал масъаларттан хас бувсса ккуркки стол. Миккува хIукмугу хьуссия февраль зурул 16-мур кьини кIицI лагаван Лакку мазрал байранну. Ва шадлугъгу хьуссар Лакку мазрал байрандалул лагрулий. Байрангу, туну, хьунни унгу-унгусса. Чиллу-чухъравусса ва бузмардавусса мюрщултрал чIюлу бувну бия зал.
![](http://ilchi.beget.tech/wp-content/uploads/2019/02/IMG_0382.jpg)
Конкурсрал сиптачитурацIун кабакьу бувну бия: Лакрал театрданул; ДР-лул Культуралул, Миллатирттал иширттал, Жагьилтурал, Информатизациялул ва связьрал министерстварттал; лакрал шаннагу райондалул бакIчитурал; Аьли Къаяевлул цIанийсса фондрал; М. Илиясовал цIанийсса «Дараччи» фондрал; Дагъусттаннал ниттил мазурдил ва литературалул учительтурал ассоциациялул (каялувчи Зугьра ЯхIияева).
![](http://ilchi.beget.tech/wp-content/uploads/2019/02/IMG_0281.jpg)
[dropcap]Ш[/dropcap]адлугърай гьуртту хьунни ДР-лул жагьилтурал иширттал министр Камил Саидов, культуралул министрнал хъиривчу Мурад ХIажиев, миллатирттал иширттал министрнал хъиривчу Александр ХIажиев, Ккуллал райондалул бакIчи Шамил Рамазанов, Аьли Къаяевлул цIанийсса фондрал каялувчи Амучи Амуттинов, «Дараччи» фондрал каялувчинал хъиривчу Тарият Къапиева.
ДакIнийн бутанну, конкурс «Агь, лакку маз, ниттил маз, дакIнивасса щаращий!» баян бувну буссия декабрь зуруя январь зурул ахирданийннин.
Конкурсрал шартIирдайн бувну, гьуртту хъанахъиминнал шеърирду дакIних ккалаккисса ца минутIрайсса роликру дирхьуну дия Инстаграм ва Фейсбук соцсетирдайсса лакрал жагьилтурал ккурандалул лажиннай. Ххув хьуману ккалли хъанай ия яла чIявусса лайкру бавтIма.
Конкурсрай гьуртту хьуну бур 3 шинал оьрмулия 95 шинал оьрмулийн бияннинсса мукьттуршуннийн бивсса инсантал. Му бавчIуну бия 3 номинациялийх: 16 шинал оьрмулийн бияннинсса; 16 шиная 30 шинайн бияннинсса; 30 шиная ливчусса.
![](http://ilchi.beget.tech/wp-content/uploads/2019/02/IMG_0323.jpg)
Ттунна ва конкурсрай яла дакI дакьинсса иш хьунни, так хьхьичIунсса кIанттурду бувгьуминнан дакъассагу, 16 шинал оьрмулийн бияннинсса гьурттучитуран, цуя-ца личIи къаувну, чIири-хъунсса духьурчагу, бахшиш дулаву. Ми цирдагу дуллай бия шадлугъ дайдишин хьхьичI театрданул фойераву Лакрал жагьилтурал ккурандалул вакилтал ва МахIачкъала шагьрулул 11-мур школалул зузалт-волонтертал.
Шадлугъ дайдирхьуна «Аьрщи ва агьлу» передачалул автор Карина Далиевал Лакрал жагьилтурал ккурандалул дурсса давурттая бусласисса ролик ккаккан даврия. Хъирив, Лакрал театрдануву цIакь хьусса аьдатрайн бувну, артистурацIун цинявппа лавай бивзун, тамашачитуралгу бахIлай, увкуна Лакрал гимн.
[pullquote]Конкурсрал хIасиллу:
16 шинал оьрмулийн бияннинсса гьурттучитурал дянив
цалчинмур кIану бувгьунни ХIасанова Муслиматлул (7 шин, ш. Ккул); кIилчинмур кIану – Юсупова Гуларал (3 шин, Ккул-Хъусращи); шамилчинмур кIану – Аьлиева Умаматлул (3 шин, ш. Ккул) ва ХIажиева Амирал (4 шин, ш. Гьамиящи).
16 шиная 30 шинал оьрмулийн бияннинсса гьурттучитурал дянив цалчинмур кIану бувгьунни Кьурбанова Дианал (ш. Гьамиящи), кIилчинмур кIану – Амир АхIмадлул (Индия, ванал нину дур 1-мур ЦIувкIратусса), шамилчинмур кIану – Гаппаев Жамалуттиннул.
30 шиная ливчусса гьурттучитурал дянив цалчинмур кIану бувгьунни Щамххалова Бахттуннул (95 шин, ш. Ккул), кIилчинмур кIану – Абакаров Аьлил (ш. Чаравали), шамилчинмур кIану – Зуллиева Сиянатлул (ш. Ккул).[/pullquote]
Дачин дурну бия шадлугъ Дагъусттаннал халкьуннал артистал Аслан МахIаммадов ва Саният Рамазанова. Муния махъ бавтIми Лакку мазрал байрандалущалгу барча бан, конкурсрал мурадрая ва шартIирдаягу бусан сахIналийн бувккуна Лакрал жагьилтурал ккурандалул хъунама Давуд Атаев, Ккуллал райондалул жагьилтурал ккурандалул хъунама МахIаммад Билалов, ЦIуссалакрал райондалул жагьилтурал ккурандалул хъунама Жамал Гаппаев ва Лакку мазрал учительтурал ассоциациялул хъунмур, МахIачкъала шагьрулул 16-мур школалий дарсру дихьлахьисса ПатIимат Аьлиева.
КIира шинни ДГПУ-лул лакку мазрал отделениялий хьхьичIунну ккалаккисса студентътуран Амучи Амуттиновлул цала жиплува Аьли Къаяевлул цIанийсса стипендия буллай (5000 къ. зуруй). Гьашину му стипендиялун лайкь хьунни Дибирова Марина.
Чялишсса гьурттушинна ва байрандалий дурунни Лакрал театрданул артистурал. Ккаккан бувунни «Хан-Муртазааьли», «Ккурккуллал Щаза», «Ччаву ва макь» спектакллавасса бутIри, увкунни балайрду.