«ХIакьинусса кьинигу хъуттая бя буллай буру»

[dropcap]В[/dropcap]ана дуркIунни ЦIусса 2019-ку шин! Биялсса бигьагулавгун, бияйнийнгу бивну, бувккунни агьали давурттайн. 

На, ЧIяйннал шяравасса Аьбдуллаев Арсен, «Илчи» кказитрал муданасса дус хIисаврай, 

ттула цIаниягу, щала жяматрал цIаниягу дакIнийхтуну барча буллай ура ххирасса кказитрал зузалт! Зу яла ххаллилмиру, жула миллатрал кказитраха, лакраха зузисса буну тIий.
Ххирасса «Илчи» кказитрал зузалт. Гьарца шинал дайдихьулий зу кказитрай бищару жула машгьурсса инсантурал барча бавуртту. Ккуллал райондалий нагу булав личIисса идарарттай зузисса инсантурахьхьун «Цукунсса бур зул дакIний гьашину бартлавгун ччисса мурадру?» тIисса суал. Вайнна му суалданухьхьун­сса жавабру:

---

Аьлиева ТIутIи (Вихьул):
— ЦIусса шинаву ччива Вихьлия Ваччав ва махъунмай, гьарца кьини къазанарчагу, ляхвагу маршрутка занай. Цан учирча чIявумур чIумал бахьтта бачин багьай Ваччав даврийн — дякъивух, гъаравух.

Аьлилов ЦIаххуй (Сумба­тIул):
— ЦIусса шинаву ччива Аьра­сатнава архсса цайми-цайми паччахIлугъирттайнгума нани­сса газ жула лакрал щархъавунгу бувцуну.Му чIумал Ла­ккуя агьали шагьрулийн нанавугу чан хьунссия.

Шамхалова Светлана (Ча­къал):
— ЦIусса шинаву ччива ттула буттал шяравун, Чакъалив, шагьрулия агьали зана хьуну, цIусса къатри дуллай.Шяраву цивппалу ливчIсса ттул нитти-буттачIан буххаванссия, кIайгу бизар къахъананссия. Мукунна цIу лаглай ччива Ккуллал райондалул ваймигу щархъурду.

Рабаданов Арсен (Ккул):
— Ччива ЦIусса шинаву райондалий жагьилсса пишакартуран зузи кIанттурду хьуну. Зун­сса кIанттурду бухьурча, жула Лакрал щархъурдугу ххялтIа къадукланссия.

Арсен Аьбдуллаев (ЧIяй­ми):
— ЦIусса шинаву ччива Сириянаву, Украиннаву, багьана бакъа, мюрщисса оьрчIру, агьали литIлатIисса дяъви-къалмакъаллал ахир хьуну. Щалагу дунияллийн паракьатшиву дагьну ччива.

Ванатиева Кисаран (1-мур ЦIувкIул):
— Зувира шинни ттул 1-мур ЦIувкIрату Ваччав, кувни бахьтта, кувни биривсса машинарттай зун занай, ветлабораториялийн. Цимилагу бувхра райондалул бакI дургьуминначIан: «Ва­ччав ттунгу ца чIивиссавагу къа­тта булара», — тIий. Ччива ЦIусса шинаву мукунсса ца къатта буллуну.

ХIажиева Кубра (Ваччи):
— ЦIусса шинаву ччива райцентрданийн кIинттулгу микI къалачIайсса щин дурцуну, газ бувцуну. Мукунсса шартIру духьурча, агьали Лаккуйва бацIланссия, Лакку улча тIутIайх бичланссия.

Маммакьурбанова Аминат (ЧIяйми):
— ЦIусса шинаву ччива Ккуллал райондалий «оптовый база» тIивтIуну. Яла шичча шаван­ссия аьркинмур кьювкьусса багьлий машан ласлан. Лаххия, (на ххюва оьрчIал нину бура) дукия хъинну ххирану дахлай бур жучIавасса ттучаннай. Аьвзалзаманнай кунма, ччуччия, хъуттая бя бувну, ччучлай буру. Ччива жула шяравунгу газ бувцуну.

ХIадур бувссар
Арсен Аьбдуллаевлул