[dropcap]М[/dropcap]ахIачкъалалий республикалул ортопед-травматологиялул центрданий хьунни травматологтурал ва ортопедтурал Ассоциациялул цалчинсса съезд. Ва батIаврий ххал бивгьунни республикалул ортопедиялул ва травматологиялул къуллугърал даву хьхьичIуннай шаву мурадрайсса ххуллу-чаранну. Шикку гьуртту хьунни республикалул травматологтал ва ортопедтал.

---

Имара Саидова
[dropcap]С[/dropcap]ъездрай хьхьичIва-хьхьичI кIицI лавгунни, азарханардай къашайшалтран цалчинсса кумаг буллалийни, ччя-ччяни итабакьайсса гъалатIру ва республикалийсса 12-хъул медициналул идарарттайсса травматологиялул, реанимациялул хирургиялул къуллугъирттал тагьарду цукун ва ци даражалий ду­ссарив.

Республикалул ортопедтурал ва травматологтурал хьхьичI бивхьусса яла агьаммур ма­съалану хъанай бур инсантурал оьрмурду ххассал баву. Мунияту пикрилий бур республикалул медициналул идарарттай захIматсса тагьарданувун багьсса къашайшат хъин буллансса блокру тIитIин. Вай блокру тIивтIуну махъ гуж­сса цIунцIияртту хьусса, анаварсса мутталий медициналул кумагру аьркин багьлагьисса къашайшалтран кумаг бансса чаран ххишала хъанахъиссар.

КIицI лаганну, Травматологиялул центрданий мукунсса къашайшалтран тIайласса медициналул кумаг баврил опыт хъунмасса бушиву. Ва центрданий дуссар цал архIал чIявусса къашайшалтран медициналул кумаг ва операцияртту бансса цинярда шартIру дузал дурну. Цуксса хIайпнугу, Республикалий катастрофардавун, ххуллул апатIирттахьхьун багьну, личIи-личIисса цIунцIияртту хьу­сса къашайшалт чан хъанай ба­къар. ХIакинтурал кIицI лавгунни, апатIру хьусса инсантал центрданийн медициналул кка­ккан дурсса тIалавшиннардайн бувну биян къабаврийнугу къашайшалтран ххишаласса зарал хъанахъишиву.

Республикалул ортопед-травматологиялул центрданул медициналул информациялул ва аналитикалул центрданущал цачIуну пикрилий бур медициналул идарартту цачIун бан, цинярдагу журалул цIунцIияртту архIал хъин дуллан. Ва даву даврийну РОТЦ-лул хIакинтураща бюхъантIий бур видеосвязьрайхчIин циняв­ппагу республикалул азарханардайн багьсса къашайшалтрал ялув бацIан ва гихунмай аьркин багьлагьисса кумаг буллан. Ва телемедицина хьхьичIуннай шаврил ца ша хъанай бур.

Му бакъассагу, РОТЦ-рал хирургтал, ччя-ччяни командировкарттайн лавгун, кIул хъанай бур кIантту-кIанттурдай зузисса коллегахъал даврищал. Шинал ахирданийнин вайннал ххал бигьин аьркинну бур 12 медициналул идара.