[dropcap]Ш[/dropcap]яъбаннул арс ХIажимурад ХIусайнов увну ур 1948 шинал Вихьуллал шяраву. Мяйва класс къуртал бувну махъ увххун ур МахIачкъалаллал шяраваллил хозяйствалул техникумрал гидромелиорациялул отделениялийн.
Техникум къуртал байхту, 1971 шиная айивхьуну, 1997 шинайн ияннин зий ивкIун ур бригадирну, мастерну, геодезистну, прорабну. 1997 шиная махъ зий ивкIун ур Дарбантуллал ЖКХ-лул идаралий мастерну. ХIакьину ХIажимурад «Илчи» кказитрал Ккуллал райондалийсса корреспондентну зий ур, яхъанай ур буттал шяраву Вихьлив.
ХIажимурад цала асарду илданун ашкара буллай айивхьуну ур 1983 шиная махъ. Ванал хаварду ва насрулийсса шеърирду бивщуссар «Дусшиву», «Литературалул Дагъусттан», «ЦIубарз», «ЧIавалачин» журналлай ва «Илчи» кказитрай. Ванал цаппара асарду таржума бувну бур оьрус ва азирбижан мазурдийнгу.
Ва ур Аьрасатнал ва Дагъусттаннал Журналистурал союзирттал членгу.
ХIажимурад, щак бакъа, мукъуйнусса асарду ва суратру щаллу даврил чулийнмай биялсса гьунарданул бутIа буллусса инсан ур. Ванал дунияллухсса ябитаву философиялийн кIункIу тIисса поэзиялул зумунусса дур. Му бакъассагу, ванал дакIнил ва кIулшилул луртандалуву дур буса-учаймуниву цIу бусса, тIул-тIабиаьтрал авадансса Вихьуллал жяматрал дирхьусса оьрмулул дарсругу.
Вай гьантрай ХIажимурадлун хъанай дур оьрмулул 70 шин. ДакIнихтуну юбилейгу барча дуллай, чIа тIий буру жула дуснан, уртакьнан чIярусса буллугъсса шинну.
Ва «Адабиятрал лажингу» сакин дуллай буру ХIажимурад увсса кьинилул савлугъран.
ХIажимурад ХIусайнов
На бизар хъанай ура
Арснал Нариманнул аьпалун
[dropcap]Н[/dropcap]ай ура, шару чун ласласиссариввагу къакIулну. Ттул ххархру лахъигу шай, бияла бакъа кутIагу шай. Ца-ца чIумал ччанну къуркъуллулгу бугьай.
Кьадарданул рирщунни ттуйх мукун инсап дакъа, тIайланна симандалувух, дяиттату цIарал къаврду личин буллалисса кьяйдалийсса. Ттуй чурх къаливчIуннихха, хах ливчIунни. КъакIулли хьунссарив ттуща цIунилгу ва хахлия къаралти, къаралтилия къатта бан, чурх бан.
[dropcap]Б[/dropcap]уссия инттухунмай жул ларзнил кьанчуллулусса кюрттарайн бучIайсса читIугу. ЧIаххувщарнил чIивину бунува буллусса, паракьатсса, улу, шаппаминнал мазра-матIра тIисса гьим ласайсса, пуркIурал рангирайса читIугума, «лухIи хавар» баяннин ца-кIира кьинилул хьхьичI вайварттайх лавгун, бакъа-къатIа хьунни. Ларзнил мурцIув дикIайсса китай-тIутIивгу ца кьини кIюрххил чантI учиннин силул хьуну ляркъунни. ЧIивисса ттул пукьлул ца мурцIу багьну лавгунни.
![](http://ilchi.beget.tech/wp-content/uploads/2018/12/hghgg_1.jpg)
Арс даврийн лаглай ивкIсса кучардайсса шаттирдал санчиннах циксса уругларчагу, ганалми ссувссуну лавгссарив, цавагу янилун багьлай бакъар.
Кьинирдал хъирив кьинирдугу ккуру най, цIу-цIусса кIюрхругу дукIлай дур. Вил шанул ялун лархъсса ссятгу, гъурссатIи дурну, кьинирду канай дур. Щюлли хьунни цал ттигу Жалгъан-Зунттул ххинчурдайсса хIалурдугу. Бивунни ахъавусса кьюнукьигу. УчIайссияв ина, арс, жунма кьюнукьул бадрардугу бувцIуну. Дайссия жура гайннуяту мураппагу. Гьашинурив циняв банкарду ярав дагьнура лирчIунни. Кьиблалул баргъгу ккуру лавгунни цал ттигу зунттухун.
![](http://ilchi.beget.tech/wp-content/uploads/2018/12/hghgg_3.jpg)
Къаучай ттухь утти щилчIав семечкалух дулун къуруш дула увкунугу. Циван къаучайссия кIирарагу дула увкуну? Утти на щин дуллава къурушру? Баллай бакъар жанахIраву усру ликлакисса вил чIугу. МурчIи хьунни жула къатлул нузругу. Ттул оьрмулул кьинирдал дуламанттайн ина бигьашиврущал ялгъузшивугу дуртунни. Ттун укун тачIав къаччиссия!
ЖанахIрал мурцIний бивщусса мюрайн лавхсса «ккашилсса» сункригу бур базаллувун ласуннин вих ялугьлай. Вил бавагу дур, ШяъванхIажинал буллусса инигу урцIуву бявгъуну, гайннуяту къясру бувну, бявакъулттийх кIара дирхьуну, ина шавайн учIаннин ялугьлай.
![](http://ilchi.beget.tech/wp-content/uploads/2018/12/ilchi_people.jpg)
КIялазуруйн лачIун дансса вил сурат усттартурачIату шардайн ларсун нанисса чIумал, ттул иттату бияла бакъа мукьал нехру най дия. Га ччясса кIюрх дия, шагьрулул инсантал кьатIув буккан бувасса, мунияту ттуща бювхъуна, ххуллий хьунабавкьусса скамейкалийгу щяивкIун, дакIнил мукьал къюнари куклу бан. Га ула кIялазуруй лачIун дурсса кьинигу вил ссурвавран суратрайн ппай тIунсса багьуна. Шаппайн бучIайхтугу: «Буттай, уссил ххуйшиву, жу кIанайн ппай учарду», — тIий, ттуцIунгу лавчIун, яс тIивтIуна. Гайннал хъирив вил чIивимур буттарссугу гьуя-гьарай тIий дия: «Аллагь, цIийннасса на къаларсун, ттул уссил оьрчI цан уцав?» тIий, зума цIухлай дия.
![](http://ilchi.beget.tech/wp-content/uploads/2018/12/hghgg_5.jpg)
Пачливу бивхьусса бярацIух цIу ххуйну лачIуншиврул гайннул лях-карах дишин тIаннул лиссурду ххал дан чIаркIув уххайхтугу, магъулату суал буллалисса чIиви-кьивисса чIиникIрайн я щунни. Ххал барча, чIиникIрал зумардугу сситтул дуркуну ляркъунни. Ганих мякьсса Масттивсса зумахъугу силул хьуну, ччурччуну ляркъунни. Хьхьиязаннайсса хьхьирурив, гъуркIуннугу дуцлай, хъуруннал дянивсса ххюлубакIайн цачIун хьунни.
2002 ш.
ш. Дарбант
Бава
[dropcap]А[/dropcap]рхсса зунттавусса шяравалу. Чаривав га гакссара архссарагу? Уттисса чIумуя, оьрмулия, юхссагу жула дакIурдияту?. Гьарца чулухара къумасса чIун. КьурукIи, дардисаннал щарай, ялтту нанисса оьрмулул кьинирду. Муххал къяцIул хъап увкуну, чIуен дуллалисса дакI. Тирххандарал хьхьичIух дургьусса лухIисса пардав. Хьуссар утти ттуятугу ятин. Ттул арсгу ур ттаттал-бавах аьтIий, га уттудишайсса ялув къатлувусса лахъру-шанийгу щяивкIун. «Мунахь мааьтIра уча», — тIий ур ттулама буттауссу. Нама «АьтIутIу, ттул арс, цанни аьтIун къаикIайсса, тара ина яла аьтIунвагу тIисса. Хьунхьуви жула дакIру цахъисрагу куклу. Шяраваллил колхозрал кушурдал ца ттарцIъя вил ттаттал-бава. Амма, «чуртту» цIив бивхьунигу, БартIуарив уттудишайхтугу, шанма махъ учинсса духIин къархьуна шяраваллил хъуниминнал. Ва духьунссар жула цинярдагу бавахъал алши бакъашиву», — тIий ура ганахьгу, ттухьва навагу.
![](http://ilchi.beget.tech/wp-content/uploads/2018/12/hghgg_4.jpg)
[dropcap]А[/dropcap]ммаки микIларчIсса аьрщарайх, кувннал кувннайн яржа къабитлай, кулунгру ришлашисса шяраваллил жагьилтураллив ттул дакI кьияма паракьат дуруна. Я Раппий, я Аллагь, зун хIатталлил арнийсса кушурду чансса бакъа къахьуннав.
БакIрай лас унува, ина, бавай, ялгъузну оьрму бувтуна. Махъва-махъсса ссихIгу вин къумасса шагьрулул бетондалул къатлуву ласун нясив хьуна. Вагу жула бавахъал ялагу ца алши бакъашиву. Чурттуй дирхьусса вил нурчIигу ялун дуртсса виргъандалулу дуссарагу кIул къахъанахъива. Ттун ганиннин вил чурх муксса бухлавгсса къакIулссия.
АьтIутIу, ттул арс, утти къагьавантIиссарача, ттуккул кIиллавун урхьригу бивчуну, щинав. Пасат бансса ттуккунгу кIул хьуссияв цуппа ххишала къааьркин хъананшиву, баваяр хьхьичI чапур хьуну, бивкIуна. Цукссара цIакьсса диявав жулла бава, пасатсса цIуцIаврихьхьун кIира ссятрайсса бакъа рухсат къабуллуна. «На буттал къатрай аьгъусса уттулу канайра укун яхIлувсса ва сагъссагу», — тIун дикIайвав ина. Ххал дарча, яхIлил ларсун най, сакъат хьуну ляркъунна ина. Хьурдай тIий ливчIунна цахъис хIаллай ялагу цIийнна, хIурматвагу буван, ччимурдагу дулун. Вил цIуцIаврил хIукъумур анаварсса зунттал щинал бущилийсса бивкIун бия. Щин. ДакIнийрив, бавай, чIивисса чIумал, Паннаятусса щаращул щин ччай дур тIий, гьанаврутулущал дахьа марххала баслай байбивхьусса интнил кьинирдай щин ларсун увкIсса чIунгу. Нава яржакьянну усса чIумал, зунттава ларсун учIайсса яттил нисирал чIивисса ччатIилулгума ина ца ххари дайвавхха… Рязи шайвав ина цIивсса чIамулу ца кьатI бувсса, цагу вин ххал хьуншиврул бувцIунма бивтсса урттул дарвагирттаятугу. Амма инарагу къар чIирисса къалахъайва — я урттул, ягу ххалал.
Щинни, тари дакIния лагайсса укунсса, ца чIумал ттулла янин ккарксса, суратгу…
[dropcap]К[/dropcap]ъютихъал ттарацIувгу авцIуну, на уссияв ратIнил чулийнай ялугьлай. Га зунттаву яла даву дирсса, гунттувугума щин щаращисса чIун дия. Цакуну ттул янилун дагьуна хъинну дурурзуну дархIусса, гьанахсса ххуллийх ттула чулийннай нанисса «ххалал къар». Къурал лувату, цавай никирая ялавайми ччанну бакъа, цамур цичIав чIалай дакъая. Ххал дарча, га ина дияв, бавай. Къар щяв дишайхту, оьттугу щавчусса, гьухъалгу нанисса вил симандалийн я щайхту, ттун бувчIуна цуксса захIматсса буссарив жула зунттал хъамитайпалул кушурду.
Ссибивзни, рищун нанисса оьрчилугу канихьра дунура, вил мурччаву чантI учайсса пишлил гацIана духлаган дайва виясса нигьгу.
Гьай, ца хъинну рязи шайвавхха ина, бавай, на Ваччату навтлил гьанавруту ларсун увкIнигу. Къабиривну увкIнигу, ттисса нюжмардий бириянхьуви, ттул арс, куну, умуд бутайва ттувун. Гамур алхIаткьинирив цукун-бунугу навт къалявкъуну къабитайссия. Къабувсъссия вихь, Гъумук ттула ссурахъугу, навагу, ттукращал кьурукIинттул базаллуву ца цIуну буллалисса магъи дакъасса ттучандалуву гьантта бивкIссагу. Къабувсъссия вихь, райондалийсса шяраваллавух уклай, кIира кьини занайгу ивкIун, ачIа шавай нан къаччай, Валттуйн ияйхту, аьтIун ивкIсса чIумал, ттущаласса хъаннил цалва лавсъсса навтлия 5-6 литIра дуллусса чIунгу. Къабувсъссия, Щунуйн ттула ссурахъавращал лавгни, гайннал, ина куклусса ура тIий, лялух хьхьа бавхIуну, Аьли-Юсуплул-Ппалав учIан уллай икIавриятугу яла нава нигьа увсун, къаучIавриятугу. Вингу дардисан хьунссия. Къабувсъссия, вий 60-кусса шиннардий операция бувну, ина шагьрулий дуни, вийн чивчусса чагъар, маркIа дакъасса бивкIун, махъунмай зана бикIавриятугу.
Та ттул вищалсса цалчинсса личIи шаву дия. Уттирив къакIулли цуксса хIаллайссарив, бавай, ина ттуяту личIи хьусса. На вияту махIрум хьусса. Вихра ттинин къаккарксса цинияргу ца дунияллий нава вищал хьунаакьинтIишиврийн.
1992 ш.
ш. Дарбант
Пиш
Ца чIумал ура гъарал лекьан бувсса хъюнил чIира буллай. На чIирал усттаргу акъаяв, мунияту чара бакъашиврул ура чIирагу буллай. КIиссурайн чару багьну, гагу аццуй бавхIуну ура. Кушугу гьич инсаннан дакI дакьинну хъанай бакъая. Му чIумал, даву дуллалиманахь учайсса тIайлабацIугу къакуну, чIарах нанисса ца душнил увкуна:
-Ххуйну хъанай бур.
Нагу:
-Лажинни, янил арача, мукун матIра, — куссия.
-Ттул яруния оьрчIисса бакъар, янил ан, — увкуна, ккурккисса симандалувусса мурччава, кIюрххил бургъил тIивтIусса ххунххутIул чIапIив кунма, пишгу увкуну.
Гьа хьуна ттул, чIиви оьрчIал кунна, ччяни ххари шайсса дакIнин га пишгу, щала чIира баннин.
Ттаттал-бавал цулхъри
[dropcap]З[/dropcap]унттавусса шяравалу, ттаттал-бавахъал къатлул мурцIувсса тав. Ганиву кIара. КIарттуву ччатIмур тачIав къабайва. Цамур миллатраятусса ттаттал-бава аьдат къархьуну дия лакрал кIарттуву ччатI шахьлай. Амма…
КIарттул хьхьичIсса вилаххав цIаралу шахьайва царай цулхъри! Цулхъри шахьлахьисса тавалия кьалакьи дукьайхту, ца тунтсса, бусан захIматсса ччатIул кьанкь дикIайвахха, хIатта нялаглангума дикIайва. Тарт накIлил ялату ларсъсса бартний аьгъу дурсса цулхъри канивун дияйхту, къакъунттул оьрчIру кунна, кьуц-кьуцгу диркIун, цирда кьацIливун нан дикIайва.