Лакку билаятрал кьянатшиврия чирчусса макьаларттал, кьиссардал, шеърирдал ахир-зума дакъар. Буниялагу, кьянатссаривкьай жулла Ватан? На къавихра му иш мукун бушиврийн.Ттуща учин хьунссар, нагу мунийн ххюра шинал хьхьичI вихну икIайссияв. Амма нава 20I3-ку шинал «Илчи» казитрал Ккуллал районналийсса корреспондентну зун ивкIния махъ, бувчIунни валлагь-биллагь, жула Лаккуй аьрщарал, цахъис бухьурчагу циха къуллугъ буварча, гьарца зат дулайсса душиву. Хъуру къадугьлагьисса иш, ца жучIава зунттаву бакъагу, бур щалава Аьрасатнал билаятрай. Ялагу, щин къаччан бикIарчагу, жула инсантал бур курчIил хьуну захIмат буллан къаччай.![](http://ilchi.beget.tech/wp-content/uploads/2018/09/linia_2.jpg)
На ца-кIира шинал хьхьичI лавгссияв 2-мур ЦIувкIуллал шяраву ишбажаранчинал МахIрамов Аьвдулмажидлул дурсса гъаттарал пирмалия макьала чичин. Тикку зунсса инсантал бакъар тIий бия. Гъаттарал ппалавсса давурттив дуллай ия оьрус миллатрал адимина. Ганал кулпатгу бур тIива тикку зий. Ккулув, ЧIяв бур мукунма зузисса оьруснал миллатрал инсантал.
[dropcap]Я[/dropcap]ла нава махIаттал хъанахъисса иш ци бур учирча, шяраваллаву бур бакIрайн багьлай цала къатрал хьхьичIсса ахъувусса мурхьирдал лув кьатI увкусса гьивч къабатIлатIисса тагьар.
Ттун дакIнийри, нава чIивисса чIумал Вихьуллал шяраву бикIайва хъинну дирисса Заби тIисса хъамитайпа. Га хъамитайпалул ахъулссаннул щаллу байвав жу, оьрчIру. Заби, ттуккуйн хъурзирттугу дирчуну, ЦIахъардал чулийнмай лавгун, гиха вацIлува хъюрт, кураг бувну бучIайва. Яла гай баххайва кIира къалмул банкалух ца ахъулссаннул банкану. Хъюртуйн жул Вихьуллал «ссурссу дуккилт» чайва. Гай кIукIлу хьуннин къаритарча, буниялагу кьакьарттуй дацIлай, дукан къашайсса дикIайва. Къатрал магъулун лавхъсса Бархъаллал оьрттулувун дичайва кIукIлу хьуннин. Яла, нацIу хьуну, ницI кунна шайва. ОьрчIан буллу мурад муяхха.
Нанияра утти пикри баннуча, «ЦIусса Америка» къатIитIлай, хIакьинусса кьини чIявусса харж-хуржгу буккан къабувнува, жучIара ласун бюхъайсса бакIлахъиялуя. Ми дур: нувщи, къур, лухIи хъюрув, чIикIунтIа. Уттигъанну Вихьуллал ккурчIав хьуна качар байми чIикIунтIалун хас бувсса ихтилат: «Лаккуй нацIу чIикIунтIа дургьуну, миннуя качар буллансса цех тIитIирча, хъинну чIявусса инсантуран давурттив хьунссия», — тIисса. ЖучIанма бур качар Краснодардал крайрая букIлай.
[dropcap]Б[/dropcap]учIияхха, тихун лавгун, тайннал качар бувай заводрал ца цех жучIавагу тIитIара учин. СССР дусса чIумал Аьрасатнавусса заводирттал буссия жучIава мукунсса цехру тIивтIуну. Му хъанай бия хIукуматрал цала агьалинаха ургъил бушавуну. Яртал, акъассарив лакрал миллатрал инсантураву цаягу ишбажаранчи ва иширал ялув пикри бансса? Дуварча укунсса даву, тарихраву личIантIиссар му инсаннал цIа. Нувщи, чIикIунтIа, къур дугьаврил давурттив хьунссия механизациялул хьун дуван. Утти итадакьлай дурхха чIявусса хъувсса операцияртту бувайсса ца тракторгума.
Ца ппурттуву, нувщи бугьаврин хас бувсса ихтилат буллалисса кIанттай, ца ккуличунал куна: «Нувщи цивппа шайссар. Инсаннан дурагу ряхра кьинир аьркинсса гайннуха зун. Цал, пара бивчуну, гай ппив буван, кIилчин гъайучин, шамилчин нувщи бугьан, мукьилчин аьрщи диян дан, ххюлчин биххан».
ЛухIи хъюрув инсаннал чурххан хъинну бузсса ххяххия душаврия буслан бикIай. Амма дакIния лаган бувунни жул Вихьуллал хъюрув дугьаву. ЛухIи хъюруврал «родина» Вихьулли. Хъюруврая жул Вихьуллал дувайва кIинттул кьаркь дикIущал накь дувансса ххякри. Да, дикIайвахха царай нахIусса накь! Циванни къабучIисса, ми лухIи хъюрурал ххякри, механизациягу ишла дурну, ттучаннайн даххан дуллан? Дахлай бурхха магъарда хъюруралми ххякри. Гайннуяр лухIи хъюрувралми нахIуссар.
Гьай-гьай, на щиячIавгу кьюлтI буллай акъара, на реклама дуллай ура Лакку билаятрал аьрщарал буллугъшиву. Шикку анжагъ икIан багьлай бур дакI-лякьа цIуцIисса каялувчи ва сакиншинначи.
Укунсса пикрирдачIан кIункIу увунав на ттула хъуватусса нувщи бивххун увкIсса кьини.
ХI. ХIусайнов
ш. Вихьул