Август зурул 28-нний Ккуллал райондалул культуралул къатрал залдануву хьунни аьдатравун дагьсса кIулшиву дулаврил зузалтрал конференция.
Учительтал конференциялущал ва цIусса дуккаврил шинащал барча бувуна райондалул бакIчинал Рамазанов Шамиллул.
«Кьамул дара ттул чулухасса гъилисса, дакIнихтунусса барча баву августрай дувайсса конференциялущал ва шанма гьантлува дайдишин тIисса дуккаврил шинащал. Жува яхъанахъисса кIанттурдал хIалкьазия муданмагу бавхIуну буссар кIулшиву гьарзасса дикIан багьаврищал. Багьу-бизу ххуйсса, культура дусса инсанталну ялун нанисса ник тарбия дуван хьусса чIумалли жунма паракьатну шанан бучIисса. КIулшиву дулаврил ишру бавхIуну бур яла агьамми социал ва экономикалул иширттащал. Мунияту ялун нанисса ник цукун тарбия дуврив, мукун хIукуматирттал ишругу бачинтIиссар», — куна.
Учительтал барча бувна школалул оьрч1алгу.Райондалийсса школарттай кIулшиву дулаврил тагьар цукун дуссарив доклад бувуна УО-лул каялувчинал Альбина ХIаммакуевал. Ванил кIицI бувна Ккуллал райондалул УО шанна шинал хьхьичI Дагъусттаннал республикалий 52-мур кIанттай бивкIхьурча, хIакьину 28-мур кIанттай бушиву.
![](http://ilchi.beget.tech/wp-content/uploads/2018/09/Тилиев-Камиль-УО-лул-цIусса-каялувчи-276x300.jpg)
Уттинин УО-лул каялувчину зий бивкIсса ХIаммакуева Альбина цамур даврийн най бушаврийн бувну, конференциялийн бувкIмий кIул бувуна цIусса УО-лул каялучи Тилиев Камиль МахIаммадлул арснащал.
ХI. ХIусайнов