[dropcap]А[/dropcap]прель зурул 14-нний Лаккуй Ккуллал шяраву хъарас щаврил байран дурунни. Га кьининин даруну диркIсса дуниял, ссавницIун аьрщи цачIун дуллай, кIусу-кIутIу тIий, марххала буллалисса дия. ТIабиаьтрал хасиятрах къабурувгун, дуруна байран. Гьашину хъарас щаврил сиптачину ия Ккуллал райондалул бакIчинал буржру биттур буллалисса Шамил Рамазанов.
ХIажимурад ХIусайнов
[dropcap]Б[/dropcap]айран тIитIлай, райондалул Жяматийсса палаталул председатель Маммаев Рамазаннул чIа увкуна: «Хъарас щаврил кьинилуцIун цинявннал къатравун аваданшивуртту дучIаннав, кувннан кув бувчIлай личIаннав, гьарца кIанттайгу нахIу-хIалимшивуртту хьуннав», — куну.
[dropcap]Я[/dropcap]ла цинявннал гьура-гьайталущал тракторданух Цалчинсса Хъарасрал ща бивхьуна. Дия га кьини личIи-личIисса тяхъашивуртту, тIуркIурду: дучри ххяххан баву, лечаву, тIанкI учаву, чару, гира личаву, алхъан кIункIу даву. Ххув хьуминнан Ккуллал райондалул бакIчи Шамил Рамазановлул буллуна дипломру ва арцущалсса конвертру.
Ккуллал жямат барча буллалисса махъру лавхъуна Оьмаров Шяъваннул, Кьурбанов Чупалавл ва цайминналгу.
[dropcap]Б[/dropcap]айрандалийн бувкIминнан Спорткомплексраву тIивтIуну бия авадансса ссупра. Шиккура ккаккан дуруна райондалул культуралул зузалтрал ва Дагъусттаннал балайчитурал концерт. Тяхъашивуртту лахъи ларгуна ахттакьуннин.
Умуд бур укунсса байраннал ва мажлисирттал хъирив шяраваллал инсантурал хъуругу дугьланссар тIисса.