«Анжи» футболданул командалул февральданул 20-нний хъамалу оьвкунни Дагъусттаннал журналистурайн. ФК «Анжилул» вакилтурал вице-президент Зайнуттин Жамбулатовлул, «Анжилул» директор Сяид Аьбдуллаевлул, «Анжи-Академиялул» хъунама МахIаммад Исяевлул ва ванал хъиривчу Шагьабуттин Микаиловлул, бувкIми хъамалугу бувну, ккаккан бувунни цукун хIадур хъанай буссарив футболистал гьашинусса футболданул сезондалийн.
Р. Къардашов
[dropcap]Л[/dropcap]авгру, бурувгру, ххал бигьарду тIуркIулул хьхьичI футболистал хIадур шайсса кIанттурду: физподготовкалул, массажрал, теориялул хIадур байсса, дукра дукайсса къатри. Лавгру «Академия-Анжилул» тренировкалийн. Шикку бия футболданий тIуркIу тIий 6 шинава 17-ннийн бияннинсса мюрщи оьрчIру ва чIаважагьилтал. Ссуттил 2000 шинал бувсса футболистурал командалул, ххув хьуну, лавсун бур РФС -рал Кубок. Гьашину ва команда гьуртту хьун най дур Европанал чемпионтурал Кубокрал турнирданий.
[dropcap]М[/dropcap]оскавлив Кубок РФС-рал финалданийн нанисса чIумал жу лавсъссия гиккунсса ва махъунмайсса авиабилетру жулва хIалданух бурувгун, группалул турнир къуртал хьуну махъ. Амма ххув хьуру группалул турнирданий, яла — четвертьфиналданий, полуфиналданий. Ахиргу ххув хьуссару Москавуллал
«Спартакраяр» финалданий. Москавуллал командарттал академияртту къалавсун, цачIу бишин ласунну «Краснодардал Академия». Вайннал ур чIава футболистурал сияхIрай 12 азара оьрчI, жула – 280. Мукун бухьурчангу, «Анжи-Академия» хьунни чемпион, бюхъай ялунчIил жучIанмагу бучIан чIава «Реал», «Барселона», «Челси», — буслай ия академиялул хъунаманал хъиривчу Шагьабуттин Микаилов.
«Анжи» командалул тагьардания бувсунни вице-президент Зайнуттин Жамбулатовлул. Команда хIадур хъанай дур, умудгу бур ялунчIилгу премьер-лигалуву личIансса. «Анжилул» директор Сяид Аьбдуллаевлул бувсунни гъинттулнин команда тIуркIу тIуншиву «Анжи» стадиондалий, яла чув дуклантIиссарив команда балжийну кIулну бакъар.
[dropcap]М[/dropcap]артрал 2-нний МахIачкъалалив «Анжилул» «Рубин» командалущал тIитIлатIиссар цIусса футболданул сезон. Бухьхьияра тIуркIулийн. Жува чIарав бацIарчан, умуд бур жула «Анжи», ччех лавгун, цалчинмур лигалувун къабагьанссар тIисса. Ахиргу, журналистал кьамул бунни «Анжи дустурал» командалувун ва пишкаш бувунни цала-цала цIанилусса «Анжилул» футболкартту.
