Махъва-махъ хьусса Халкьуннал Мажлисрал сессиялий депутатътурал цIакь дунни «Дагъусттан Республикалий чIявуквартирартту бусса къатраву капитал ремонт даврил хIакъираву» тIисса ЗакондалуцIун дархIусса дахханашивурттал проект. Му документ хIадур бувссар, цаппара каши кIюласса инсантуран социал кумаг баву мурадрай.
ХIасан Аьдилов
Закондалул проект бакIрайра ххал диргьуну диркIссар Халкьуннал Мажлисрал Строительствалул, ЖКХ-лул ва транспортрал комитетрал батIаврий, мурадлувсса ведомстварттугу хIала-гьурттуну.
Республикалул строительствалул, архитектуралул ва ЖКХ-лул министр Ибрагьим Казибековлул бусаврийну, ва документ хIадур бувссар, федерал закондалул цIусса кьараллацIун бакьин бувну. Мунил чIалачIи буллалиссар цаппара журалул инсантуран капитал ремонтрахлу дуллалисса арцу лахъан хIукуматрал кумаг буллалишиву.
«Цивппа заллусса къатраву яхъанахъисса зукъазисса 70 шинавусса оьрмулул инсантуран 50% арцу лахъаву (компенсация) дуллантIиссар. Лахъаву дуллантIиссар 80 шинал оьрмулувуминнангу, мукунма кулпатраву цачIу яхъанахъисса, чувчIав зукъазисса пенсионертурангу 100%, — увкунни министрнал. Мукунсса нурмарду зий дуссар билаятрал чIявуми регионнай.
