Ильдардул арс Илиясов Эмран

Хъун бакъасса хIаллай къашавайгу ивкIун, захIмат-жапасса цIуцIаврища ххассал къавхьуну, оьрмулул 66 шинаву аьпалухьхьун лавгунни ххаллилсса багьу-бизулул адимина, дакI-аьмал уздансса,гьарцаннащал хIал бавкьусса инсан, захIматрал ветеран, АьФ-лул Профессионалсса дуккаврил министерствалул хIурмат лавайсса зузала, техникалул элмурдал кандидат, Чи­ттурдал шяраватусса Илдардул ва ПатIимал арс Эмран.
Эмран увссар Читтурдал шяраву 1953-ку шинал. Мусил медальданий къуртал бувссар Гъумучиял дянивмур даражалул школа. Мукунма, ЯтIул дипломгу хъиривну, бувккуссар Дагъусттаннал политехинститутрал радио-техникалул факультет. Армиялул буржгу лавхъун увкIун махъ 1976-ку шиная шинай цала махъва-махъсса гьант­райннин Эмран зий уссия университетраву доцентну, кафедралул каялувчину, факультетрал деканну, проректорну. Цинявннал дянив ванал хIурматгу, кьиматгу хъунма­сса буссия. Яла захIматми давур­ттугу тапшур дайссия ванайн, ми лажин кIялану бартдигьин кIулсса уну тIий. Кьурахъул шиннардил мутталий Эмран уссия университетравун кьамул бай комиссиялул председательнугу.
Ва ия ас-намусрал даража лахъсса, мяърипатрал урувччусса, лавайсса аькьлу-кIулшиврул инсан. Мунияту Читтурдал жяматрангу хъинну ххирасса ия. Бакъахьун­ссар Читтурув агьлу, ванал цIа цалла мюрщи-хъунисса мурадирттал ххуллий ишла къадурсса, ванайн барчаллагь бакъасса.
Эмраннул ва мунал кулпат Зарипатлул цанма лайкьну хъуни бувну бур кIива душ ва ца арс. Хъунмур душнил дурурччуну дур экономикалул элмурдал кандидатшиврул цIа, гамур душгу, арсгу ккалай бур мукунма аспирантуралуву.
Эмран жуятува личIи шаврил пашманшиву кIидачIлай, дакI­нихтунусса жижара буллай буру ванал кулпатрахь, оьрчIах, ­уссихь Илияслухь, ссурахъаврахь ва махъсса гъан-маччанахь.
Ванал рухI хъинний дишиннав, алжаннул ххари аннав.

Читтурдал жямат

 

Закирдул арс ХIажиев АхIмади

Февральданул 11-нний, захIматсса цIуцIаврища ххассал къавхьуну, барз ва бачIиннул хьхьичI ахиратравун лавгсса цала чIивима уссил ХIусманнул гьаттайсса аьрщи лаяннин, аьпа­лухьхьун лавгунни ххаллилсса лаккучу ХIажиев АхIмади Закирдул арс.
АхIмади увну ур 1951 шинал Кьукуннал шяраву Закирдул ва Аслил кулпатраву. Кьукнив мукьва класс, Къянив мяйва, Вихьливгу 10 класс къуртал бувну, цала армиялул буржгу биттур бувну, телевизорду бакьин байсса пишагу лавхьхьуну, му сянатрай зий уссия Къарабудахккантлив. Муния махъ зий уссия МахIачкъалаллал ТЭЦ-рай, шагьрулувун гъилишиву итадакьайсса цехраву машинистну.
Махъсса сайки 20 шинал му­тталий зий уссия Каспийскаллал «Горгазрай», цал – диспетчерну, яла – мастерну.
АхIмади уссия дакI аьчух­сса, гьарцаннал дянив бусрав­сса, хIал бавкьусса, хъинну дустал ххирасса ва ми ябангу кIулсса гьалмахчу. Дустуралгу кка­ккан бунни ва цувагу цукунсса хIурматрай ивкIссарив – сайки кьурахъул шяраваллавасса дустал бувкIун бия Кьукнив му махъва-махъсса ххуллийн тIайла уккан.
АхIмадил дикIайва гьарца чулухуннайсса итххяххаву – ччарчан спортрал, ччарчан музыкалул. Цимилагу гьуртту хьу­ссия Лакрал ва Ккуллал районнайсса спортрал бяст-ччаллавух. Му усса мажлисрай дикIайссия мудан тяхъашиву, ххуйну бищайссия гармун, учайссия балай, мунияту муначIан кIункIу тIун бикIайва дустал, къатлуву чан къашайссия хъамал, гава­ссят ванал аьзизсса кулпатрал Сяидатлул тIитIайссия ссупра, мунияту Анжилив хьхьичIва му яхъанай ивкIсса къатрайн чай­ссия «штаб-квартира» куну.
АхIмадил ляличIиссара ччаву дикIайва жула лакрал улклух, буттал шяраваллих. Шяраву дуллалисса чIири-хъунсса давурттавух хIала уххайссия цалчин, сант дагьайхту уккайссия Лаккуйнай, шяраву бивзун буссия къатри дуллансса гьанугу.
Къаивтунни чIяву-чIявусса хияллу бартбигьин, гьаксса, ссихI буссаксса, талай уссия лавмартсса цIуцIаврищал, цибанссар, духьунссия Аллагьнал чичру!
АхIмадил бивкIулул кьур­чIишиву дакIнихтуну кIидачIлай, жижара буллай буру ванал кулпатрахь, арснахь, душваврахь, ссурахъаврахь ва махъсса цинявппагу гъан-маччанахь. Ванан къабуллусса оьрму зун булуннав, оьрмурдай барачат бишиннав!
АхIмадилгу бунагьирттал аьпа баннав, гьав нурданул дуцIиннав, рухI алжаннул ххари даннав.

Кьукуннал жяматралгу,
дустуралгу чулуха
Нурислан Хавчаев

Забибуллагьлул арс Сулайманов Якьув

Февраль зурул дайдихьулий, оьр­мулул 61-чинсса шинаву жуятува личIи хьунни дугърисса зунттал чув, Забибуллагьлул ва Ххазинатлул арс Сулайманов Якьув.
Якьув увну ур ГьунчIукьатIрал шяраву учительнал кулпатраву. Бу­ттал шяраву школагу къуртал бувну, лавгун ур аьрали бурж лахъан. Армиялия увкIун махъ цаппара шиннардий зий ивкIун ур Дагъусттаннал геолого-разведочный партиялуву. Хъирив зий ивкIун ур Мангишлакрай, цIанасса Актау шагьрулий, навт буккай организациялий.
Якьувлул цала кулпатращал, цивппа кунма, захIмат ххирасса, хъуниминнал хIурмат бусса арс ва душ тарбия бувну, хъуни бувунни.
Ва ия цума-цагу шяравучунан кумаг байсса, ас-намус бусса адамина, хIурматрай ия.
Цибанссар, Аллагьнал чичру укунсса диркIун дур.
Якьувлул бивкIулул кьур­чIи­шиву кIидачIлай, жижара буллай буру ванал кулпатрахь, арснахь, душнихь, ссурваврахь, цинявппагу гъан-маччаминнахь.
Цал бунагьирттал аьпа баннав. Алжаннул ххари аннав, гьав нурданул дуцIиннав.
Ванан бакъасса оьрму оьрчIан, кулпатран, махънан булуннав.
ГьунчIукьатIрал
ва КIямашрал жямат

Ибрагьиннул душ МахIаммадова Нажават

Вай гьантрай, цилва душругу, душварал оьрчIругу хъирив хъювхъу тIутIи бувну, дунияллия лавгунни КIямашрал шяраваллил ца яргсса цIукуну бивкIсса, цуппа чил шяраватусса, (Гьухъалияту­сса) бунугу, жулва шяравуминнаяр хьхьичIунсса хIурматран лайкьсса хъамитайпа, Ибрагьиннул душ МахIаммадова Нажават.
Ванийн жул жяматрал Наида учайва. Наида хъинну ахIвал-хIал бавкьусса, дан-дитан кIулсса, инсаннахь насихIат бусан хьхьичIунмай шайсса, цищава шайсса хъинбала инсаннан буван анавар буккайсса бия. Ванил нину Каццаева Аьйшат тамансса хIаллай «Илчи» кказит тIивтIусса шиннардий редакциялий зий бикIайссия. Наидагу бия ванил ца бакъа-бакъасса душ, янил чани. Цибанссар, оьрму кутIасса бивкIун бур Наидал.
Наида бувну бур 1951 шинал. Шагьрулий яхъанай, школданий дуклай хъунма хьуну бур ни­ттищал. Шагьрулийн дуклан-зун увкIсса Сайдуннул ябавцIухьунссия хIурулъэн кунмасса душний, бувцуну бур цанма щарну. Вайннал бу­ссия ххаллилсса кулпат, кIива душ, душварая бивзми. Чув, ци даврий зурчагу, ххишала бакъа хIурматрай бикIайва Сайдун ва Наида.
Жун, КIямашрал шяраваллил жяматран, хъинну кьурчIи бивзунни Наида жуятува личIи шаву. Ганилгу, аьпабивул, тачIав цуппа цамур шяраватуссара къаучайссия, нажагь, асаналухун агьну цIухлахисса акъахьурчан.
Лавгунни жул хIурмат лавай­сса Наида, къарахIму бувунни дарув бакъа цIуцIаврил ганий. Утти вил душварахьхьун, Жамила­хьхьун, Залинахьхьун ва вайнная бивзминнахьхьун булуннав вин бакъасса оьрмулул бутIа хъунасса Заннал. Жува дунияллий буссаксса ина жун дакIний бикIантIиссара, мудангу пиш тIий бакъа зумакъабахъай­сса Наидай!
Наидал бивкIулул къумашиву кIидачIлай буру Мусихъал ПатIиматлул ва Каццаева Аьйшатлул агьлу-авладрахь. Махънал оьр­мурдай барачат бишиннав.
КIямашрал жямат

СантIуева Сагьзада Оьмардул душ

Ца нюжмардийсса шанийнгу багьну, оьрмулул 88 шинаву жуятува лавгунни 1-мур ЦIувкIратусса Оьмар­дул душ СантIуева Сагьзада.

Сагьзада бувну бур 1930-ку шинал ва хъунма хьуну бур Оьмардул ва Ххадижатлул кулпатраву. Лавайсса даражалий 1-мур ЦIувкIрав школагу бувккуну, муния мукьах колхозраву личIи-личIисса давурттай зий бивкIун бур. Яла Хъун дяъвилия увкIсса хIаписар СантIуев Аьли­ллун щар хьуну бур. Цала дянив хьусса ца душния, лавайсса даражалул хIакин бувну бур.
Сагьзадал щала оьрму лавгун бур цила лас – хIаписарнащал жула паччахIлугъ ядуллай личIи-личIисса аьрали кIанттурдай. Пенсиялийн бувккун махъсса оьрму миннал лавгун бур МахIачкъалалив.
Сагьзада бия дакI хъинсса, маччами, шяравуми, чIахху-чIаравми ххирасса, хъамаллурая рязисса, халкьунная ххуймур бакъа къаучайсса хъамитайпа.
Ятинну ливчIунни утти 1-мур ЦIувкIрав ца акъа къаливчIсса Хъун дяъвилул ветеран, мунил лас полковник СантIуев Аьлилгу.
Сагьзадал рухI алжаннаву дишиннав, аьпа баннав, укунсса инсантал жула дянив гьарза баннав.
КьурчIишиву кIидачIлай, жижара буллай буру Аьлиллухь, душнихь, куявнахь, миннал наслулухь, ссихь Аьишатлухь, циняв гъан-маччаминнахь.
Хъунмасса барчаллагьрай буру чIявусса гьалмахтурайн, шяраваллил жяматрайн, ва бивкIулул чIарав бацIан бувкIсса. Зу мукьахунмай ххаришиврийн батIаваннав. Ваксса къавхьуну цучIав къаивчIаннав!
1-мур ЦIувкIуллал жямат

Рамазаннул арс Чаллахъал Аьлил

Оьрмулул 76 шинаву, цакуну инсульт хьуну, дунияллия лавгунни Хъусращиял шяраватусса ххаллилсса адамина, захIматрал ветеран, Рамазаннул арс Чалла­хъал Аьлил.

Увссар Аьлил 1941 шинал Хъусращиял шяраву. Школагу къуртал бувну, увхссар дуклан Ленинградрайсса цIа дурксса фармацевтикалул институтравун. Та чIумал ва институт къуртал бувсса специалистал Дагъус­ттаннай хъинну чансса бивкIссар. Провизорнал сянатгу лархьхьуну, зун айивхьуссия Дагъусттаннал аптекардал управлениялий. Хъунма хIал къалавгун, ивтуна МахIачкъалаллал 23-мур аптекалул хъунаману. КутIасса чIумул мутталий Аьлил зузисса аптека лавхъуна шагьрулул хьхьичIунсса аптекарттал сияхIрайн. Ванал даву чIалай, управлениялул хъуниминнал ва ивтун ивкIссар хъинну жаваблувсса, шагьрулул 2-мур азарханалучIасса аптекалул хъунаману. Махъсса шиннардий зий уссия 117-мур аптекалул хъунаману. Аьлил лайкь хьуну ия чIярусса грамотарттан, хIукуматрал бахшиширттан.
Ва ия цала даву хъинну куртI­ну кIулсса, цаманан кумаг бан хьхьичIунсса инсан. Шярава, райондалия бувкIсса къашайшалт хьхьичIва-хьхьичI, духтуртурачIан бияннин, АьлиллучIан бияйссия, ванал кумаг бансса кIулну. Даруртту лякъин захIматсса заманнай Аьлиллул цачIава бакъасса даруртту къашайшалтран бучIан байва Москавлия ягу цайми билаятирттая.
Гьарца чIумал хIала уххайссия шяраваллил иширттавухгу, чIарав ацIайссия чIявусса къашайшалт­рал, каши дакъанан кумаг бай­ссия ххирасса дарурттайну.
Аьлил дунияллия лагаврил кьурчIишивугу кIидачIлай, дакI­нихтунусса жижара буллай буру ванал кулпат Фиалкахь, оьрчIахь Мирзахь, Булатлухь, душнихь Саидахь, Чаллахъал Шир­ванинахь, МухIуттиннухь, Жабраиллухь ва махъсса цинявгу гъан-маччацириннахь. Аьлил алжаннул ххари аннав, рухI паракьатний дишиннав.
Хъусращиял жямат