ЦIусса шинал хьхьичI гьант­рай лахъсса зунттаву дирхьусса жул ЧIурттащиял шяравун ххаришиву дуркIунни: Да­гъусттаннал республикалий хъунмасса хIаллай халкьуннал цIуллу-сагъшиврул ялув чялишну зузисса жул шяравучу,Хасайхъал АхIмад ЩайхмахIаммадлул арснан дуллунни «За доблестный труд, за вклад в развитие Дагестана» цIанилусса медаль.
Ва цIа ххи хъанахъиссар ванал ттинин ларсцири цIардал ххаллил­сса кьюкьлул ялун:
«ДР-лул элмулул лайкь хьу­сса ишккакку», «АьФ-лул лайкь хьусса хIакин», «ДР-лул халкьуннал хIакин», «СССР-данул цIуллу-сагъшиву дуруччаврил отличник», «Ларайсса категориялул кардиолог», медициналул элмурдал доктор, ва м.ц.
Увссар АхIмад ЧIурттащиял шяраву.
Ванал дуккаврил шинну: ЧIурттахь — 7 класс, Гъумук — 10 класс. Мединститут ккалакки­сса чIун, хъун дяъвилул ва мунияр махъсса яла захIматсса шинну диркIун дур. Ци-бухьурчангу, гьарца захIматшивугу дурхIуну, ххаллилсса пишакар-хIакин хьуну ур ваная. Зий айивхьуну ур Гергебиллал райондалийсса азарханалул хъунама хIакинну, яла увххун ур цIанихсса терапевт-профессор ХIажиев Хайруттиннул каялувшиву дуллалисса ординатуралувун – госпитал терапиялул кафедралийн. Муния махъ АхIмад зий ивкIун ур Буйнакскаллал горлечобъединениялий терапиялул отделениялул хъунаману, хъирив – Дагъусттаннал мединститутраву ассистентну, преподавательналмур давугу инсантал хъин буллалаврилмуницIун ва элмулулмуницIун дачин дурну. 1982 шинал Москавлив хьхьичIунну дурурччуну дур медициналул элмурдал докторнал диссертация. АхIмадлул нину Рукьижат ва ппу Щайх-МахIаммад хъинну бавкьу­сса, захIмат ххирасса тухумрал заллухъру бивкIссар. Арсная ххуйсса пишакар ансса хIарачатрай миннал хъунмасса захIмат бивхьу­ссар (аьпа баннав цал). АхIмадлул эбрат ласун­сса ниттиуссу ивкIссар Юсупхъал МахIаммад: Дагъусттанная хьхьичIа-хьхьичI Москавуллал «Красной профессуры» тIисса накIлил промышленностьрал институтгу бувккуну, технологну хъунмасса хIаллай зий ивкIссар МахIачкъалалив ва Буйнакскалий.
Аьрасатнава бувкIсса оьрус душ медсестра Валя миннаний цаннийва яхъанай бикIаврилгу АхIмадлуву хIакин хьунна тIисса цалчинсса асарду чантI чин був­ссар. Ванал кулпат Зайнав медсестрану хъунмасса хIаллай зий бивкIссар, арс Рашид – медициналул элмурдал кандидат; арснал щар Гулшан – щала къатлул хъар цила бакIрайн ларсъсса ва халкьуннал чIарав бацIайсса ишбажаранчи, «Дараччи» клубрал гьурттучи ва яхIлув; хъунмяммаха чIалачIин дакъасса ва му хъинну ххирасса арсная бивзми. Хасай­хъал архсса мархри Къабардиннава нанисса бур. ЦIанагу гикку «Хасай ХIабла», яъни Хасайхъал мина тIисса кIану бусса бур.
Жула лакран акъа, цайминнангу ка-кумаг буллалисса, жула кьянкьасса чул бищай чIира, цува ччучлай, цайминнан чани буллалисса, Дагъусттаннай акъа, Аьра­сатнавугу бусравсса Хасайхъал АхIмадлухь барча хьуннав тIий ура ина ларсъсса хъуннасса наг­рада. ЦIуллуну итаннав ина вила уманащал уттигу цимирагу шинай!

ХIусайн Давыдов,
Дагъусттаннал халкьуннал кIулшиву дулаврил отличник
ш. ЧIурттащи