Щалвагу Аьрасатнаву пионертурал сакиншиннарду ядурсса школартту чансса бакъар. ЦIуссалакрал райондалий хIакьинусса кьинигу, ххуй — ххуйсса давурттугу дуллай, чялишну зий бурЦIуссалакрал райондалул Пионертурал ва дуклаки оьрчIал къатта. 2001 шиная шинмай ванил директорну зий бур Гъаппаева Пакият.
П. Рамазанова
[dropcap]А[/dropcap]ьрасатнал аьмсса кIулшиву дулаврил бусравсса цIанин лайкь хьусса ПатIимат МахIаммадовна бур чара бакъа оьрчIру дарсирдая мукьахгу ссахун-бунугу, мюнпатсса иширттахун машхулну бикIан аьркинссар тIий. ДукIу, май зурул 20-нний, райондалул пионер организациялул ветерантурайнгу оьвкуну, лахъа-хъунну дурну дур вайннал пионер организация хIасул дурну 95 шин шаврил юбилейгу. ДукIу, февраль зуруй, ЦIуссалакрал Пионертурал ва дуклаки оьрчIал къатлул коллективращал ва дуклаки оьрчIащал лавгссияв нагу Каспийскаллал детдомрайсса мушакъатсса оьрчIачIан. Хъинсса ссайгъатирттащал бувкIсса хъамаллурал хIадур дурну дия хъуннасса концертгу. Оьннасса чIун оьрчIал хайрну гьан дулланшиврул Пионертурал къатлул коллективрал хIасул дурну дур тамансса кружокругу. Аьдатравун дагьну дур райондалул конкурсругу. Ттигъаннугу хьунни «Магьирсса кару» тIисса конкурс. Пакият МахIаммадовнал бувсунни му конкурсрай гьуртту хьушиву райондалул 12 идара, конкурсрал журардугу личIи-личIисса бивкIшиву: тIаннул скульптурарду дуваву, лепка, щащаву, дарзитурал-дизайнертурал касму, сурат дишаву.
«ЦIуссалакрал райондалий пагьму-гьунарду бусса ва творчествалул давурттаха зун гъирасса оьрчIру чIявусса бур, жул педагогтурал мурадгу ми оьрчIавусса гьунарду итххяххан кумаг бувавур. Конкурсирттай гьуртту хьуми ххари буваншиврул, дулару бахшишру ва хIурматрал грамотартту. Ттуща ца педагогная цIа дурну, цама лях гьан итан къахьунссар, буниялану оьрчIру ххирасса, оьрчIал бучIантIимуний дакI цIуцIаву дусса, хIурмат бусса учительтал зий буссар жучIа, — тIий бур Пакият Гъаппаева. ОьрчIал нитти-буттахъулгу рязину бур, ххал-ххалаххул давурттая тIайла хьуну, оьрмулуву дучIи хьунмур цала оьрчIан лахьхьин дуллай бушиврий ва ми оьннасса чIун цанна хайрну гьан дуллай бушиврий.