Учитель тIисса мукъул мяъна куртIсса дур. Амма дарсру цуксса ххуйну дихьлахьисса учитель ухьурчагу, предмет ххирасса дакъахьурча, чIявуми оьрчIан му дарс дихьлахьисса учительгу ххирасса къаикIай.
Укун учин къабюхъанссар чIярусса шиннардий Гъумучиял дянивмур даражалул школалий математикалул дарсру дихьлай ивкIсса учитель Маммаев Нураттин МахIаммадлул арсная.
Аьрххилий гьарчагу, хъатIуй, бивкIулий ухьурчагу, учительтурая ихтилат багьарча, тай шиннардий Гъумучиял дянивмур даражалул школалий дуклай бивкIсса оьрчIаву цуя-ца хьунакъаавкьуссар, вихну ура хьунагу къаакьинтIишиврийн, Нураттиннул цIа хIурматрай кIицI къалагансса, мунал бунагьирттал аьпа баннав къачинсса!
Къаххира хьунссагу акъая му. Гьарца дуклаки оьрчIачIансса гъан шаву дия мунал га оьрчIан цанна хасъсса. «Учитель от бога» учай. Мяйжаннугу, мукунсса угу-ия Нураттин МахIаммадович.
Жу дуклай буссияв ахттая махъ, 2-мур сменалий. Дия кIинттул чIун. Астрономиялул дарс дия махъра-махъмур. ЦIан ларкьуну дия. Жун баян бувна, Читтурув бивкIу хьуну, Нураттин МахIаммадович жижара бан лавгшиву ва дарс къадикIантIишиву. Дуклаки оьрчIру буру да, дарс дакъашиврия ххаригу хьуну, кувннал кув кьабитлай, кIилчинмур зивулия левчуну най. Хьулухун бияйхту хьунаавкьуна, бакIрай бишайсса цала кьяпух ненттабакIрайсса гьухъгу лихьлай, нанисса жула учитель: «Зана бикIияра, дарс дуссар», — куна ганал. Дарс къакьаритаву мурадрай, цала мушакъатсса ччаннащал Читтурату махъунай ахьтта увкIун ия Нураттин МахIаммадович.
Ххуйсса учитель акъассагу, му ия гьарца ишираву тIайлашиву дусса, иш багьсса кIанай, къуллугърал хъунама-чIивима къаувкуну, ттявх чин бувну махъ учайсса чув.
Ттун ттуннагу математика хъинну ххирая, гайминнулгу ххюварду бакъа къаласайссия. Жул выпускрай 120-нния ливчусса дуклаки оьрчIру бия. Мусил медаль ларсуна 2 оьрчIал. Выпускной вечерданий, ттухьхьун аттестатгу буллай, Нураттин МахIаммадовичлул увкуна: «Ученик ина гужсса ияв, нину-ппу вайннал гужсса бия», — куну.
Мунал ххуйшиврия, пишалул усттаршиврия чIявусса бусангу, чичингу бюхъанссар. ЧIявуну дакIнингу агьай, хасну школалул чIарах нанийни, архIал дуклакими хьунабавкьутари. На диндалул инсан акъара, амма гьарца чIумал, хIатталлил чIарах нанийни, ниятгу дурну, мунах алхIан къабувккуну къабитара.
Аь-ХI. Аьлишаев,
ш. Ххюлуссун
