Цалчинмур сентябрьданул кьини на лавгссияв Вихьуллал школалийн, дуккаврил шин дайдихьлахьисса байрандалух ябитан. Байрандалул сакиншинна дия ххуйну хIасул дурну. Исвагьисса, чIюлусса яннардаву бувкIун бия циняв дуклаки оьрчIру ва учительтал цала байрандалийн. Школалул директор МахIаммадов Аьлиллул бусаврийн бувну, дуклаки оьрчIал сияхI дусса дия дурагу 80 оьрчIая лирчусса. Ши­ккува учительну зузисса Щайхов Щайхлул бувсуна цува школалул директорну зий ивкIсса чIумал 700-ннийн бивсса дуклаки оьрчIру бивкIшиву школалий.

Буниялагу, пикри бансса зат­ру биялсса бур. Бухмур школалул чIаравва бур буллай бачIи хьу­сса школа. БувкIунни Вихьлив бувчIавурттал чIумал депутатътал хьун ччисса ва цайми къуллугъчитал. Гайнналгу ва школа бувну дузал буван аьркинсса арцу итадакьин дан кумаг буванну куна. Ларгунни ганияр махъ кIира шин, школалул чIирттавун щин дагьлай, вагу зия хъанай бур. ЦукунчIавсса сукку тIаву дакъар. Ттун дакIнийри мукунма 2013-ку шинал, Дагъусттаннал БакIчи Рамазан АьбдуллатIипов Ккуллал райондалийн увкIнива, школа къуртал бансса арцу итадакьинну куну бивкIсса махъру. Рамазан АьбдуллатIиповлулгу къуллугъ кьабивтунни. Утти къа­кIу­л­ли школалул иш-тагьар ссайн ду­кканссарив.
Шиккува аьч буван ччива ца ттула пикригу. Буниялагу, райондалийсса школарттайн заназисса оьрчIру шиная шинайн чан хъанай бур. Ва иширал сававрттугу личIи-личIисса дур. Ттула пик­рилий, жула инсантал хъинну курчIил хьуну бур. УрчIра-ацIра шинал хьхьичI дугьлай бивкIсса хъуру дугьлай ба­къар. Улу цанма букансса нувщивагу, чансса инсантурал бакъа, къабугьлай бур. Шикку, ттул пикрилий, хIукуматрал политикалуха лар­хьхьусса даву аьркинну дур, хIатта хIукуматрал инсантуран къаччисса давурттив дачин дурни, гай бакIуйн къадуккай­сса духьурчагу.
1861-ку шинал дукьан дурну диркIссар Аьрасатнал паччахI­лугърайсса «крепостное право». 1930-ку шиннардий, колхозру ду­ллалисса чIумал, шяраваллавусса инсантураща, шагьрулийн лавгун, даврийн буххан къахьуншиврул пас­портру къабуллай бивкIссар. Улу, дяъви къуртал хьуну махъгума дяъвилул талаталан увсса кIанайн зана хьун багьлай бивкIссар. БучIиссар ва иширайн «крепостное право» учин. Яла, Сталин ахиратравун лагайхту, амнистия бувну, итабавкьуну бивкIссар чIявусса дуснакьлувтал. Бусласаврийн бувну, миллиондалийн бивсса. Яла, Ссибирнаву вацIри кьукьлан­сса инсантал чан шайхту, дуккан дурссар «разнарядка» – шяраваллавусса колхозирттая шанма зуруйсса инсантал тIайла бук­лан багьлагьишиву вацIри кьукьлан. Му чIумал гайннахьхьун булай­сса бивкIссар шанма зуруйсса пас­порт. Амма шяраваллаву шинал ахирданий цал дакъа къадулайсса захIматрал кьинирдансса доходрах ялугьлайнияр, канихьхьун арцу дуллалисса давурттайва бацIлан ччан бивкIссар инсантуран. Гайра 1950-ку шиннардий дайдирхьуссар «гонка вооружений». Заводирттаву зун­сса, гай буллансса инсантал аьркин хъанан бивкIссар. Гана гай шиннардийри жула СССР-даний буллан бивкIсса цинявнна­хьхьун пас­портру. Колхозирттал зузалтрангу дурсса даврих буллан бивкIссар арцуйнусса харж. Шиккугу паспортру аьркинну бивкIссар подоходный налог ласуншиврул харжираяту. Вана ва чIумалли, жуллами хьуннав, чилми хьуннав, шяраваллу ххялтIа дук­лан диркIсса.
Уттигъанну шавату Ва­ччав даврийн най унува нава щяивкIсса машиналул залуннал ттухьхьун буллуна суал: «Ина журналист урахха, информация вичIа чIярусса дикIайхьунссар, ссайн дуккавивав жула райондалул иш-тагьар?» — тIисса. Ттун га инсаннал буллусса суал хъинну тIааьн бивзуна. Буниялагу, къуллугъчи акъасса, шяраву яхъанахъисса кулпат ябуван дуланмагъ дуллалисса инсантуран буру­ккин бур жула бучIантIимунил. Даргиял бугьайсса калан, къур, нувщи, чIикIунтIа циванни жура дугьлан къааьркинсса?
На ттула макьаларттавугу чIя­вуну кIицI бувара, райондалий зунсса кIантту чанну бушаврийн бувну, чIявусса жагьилтал шагьрурдайн най бур тIисса зат. Амма на тIимуний рязину акъая Ккуллал райондалул ца идаралул каялувчину зузисса гьалмахчу:
— Ургу, жучIара давурттив дакъа тIий, жагьилтал шагьрулийн най бур тIисса зат щала тIайлассагу ба­къассар. Учиннуча, школалий дук­лакийни, жува щияту буру эбрат ласлай? Учительная, инженерная, механикная, хIакинная ва жула зун­ттавусса пишакартурая. Амма чIаравва бур утти хъиннува цаймигу личIи-личIисса касмурдал зузалт хIадур байсса институтру. Нану пикри баннуча. ЦIана замана бур компьютерду ишла къабувну цичIав дуван къахъанахъи­сса. Мунияту ялун нанисса никиран ччай дур касмулущал къатта-къушливусса бигьашивурттугу. Ми бигьашивурттурив зунттаву­сса шяраваллаву дакъар. ТIайлар, дур таксса, ца-ца инсаннал цала хIасул дур­сса. ЧIявуминначIарив ми да­къар. Мунияту шикку дикIан багьлай бур, Швейцарияная рек­лама къадуллай, тайннал кунмасса зунттурду жучIавагу бухьувкун, ший яхъанансса инсантуран хIалурду хIасул дуллали­сса хIукуматрал программа. Яла бачинтIиссар махъунмай шагьрурдая зунттавунмай жула жагьилтал, — куна мунал.
Гара кьини, шавайн зана хьуну най, шяравун ивсса му­тталий, хьунаавкьусса ца гьалмахчунал: «Ший, жула Лаккуй, хъиннив, шагьрулий хъинъяв?» — тIисса суал буллуна. Ва суалданун на дуллу­ссия жаваб: «Ургу, гилу яхъана­хъийни, гилу хъинъя, ший яхъа­нахъийни, ший хъинни. Жула Лаккуй­сса тIабиаьт уттигу зия къархьу­сса, тасса-таривра хIасул хьусса куццуйсса дур. Ва хъинну марцIсса тIабиаьтри. Ший бакъар завод­ру, бакъар фаб­рикартту, улу, ба­къар асфальт бувай заводругума. ЖучIавасса гьава бур ссалчIав зия къабув­сса. Ялагу жучIарасса уртту-щин дур цукунчIавсса химикатирттал зия къадурсса. Мунияту жура цIурихьулуву ишла дувайсса дикI, хъурунная ласай­сса цинярдагу бакIлахъия, оьрус мазрайгу учин, «экологический чистый продукт» хъанахъиссар. Цала цува увгьуну икIарча, инсаннал оьрму жучIава шагьрулий яхъанахъиманаяр ххи­ссар», — тIисса жаваб дуллуссия на.
Ттула пикрилий, тIайласса жавабру хьуни куна ура шанмагу суалданун.