Жул Новостройрайсса Аьхъар­­дал дянивмур даражалул школалий бур дуклай 150-нния ливчусса личIи-личIисса миллатирттал оьрчIру ва душру, чIаравсса ва архсса дачардай ялапар хъанахъисса.

Ми оьрчIру школалийн буцингу, школалия ша­ппайн биян бангу лагайссар школалул автобус-вахта. ТIайлассар, жул вахта ччя-ччяни зия шай, чIявуну бензин бакъагу личIару. Ва лавгсса декабрь зурул гай яла бявкъуми гьантрай вахта зия хьуна, бакъая бензингу, бензиндалух дулунсса арцугу. Нюжмар ххишалагу хьуна оьрчIру буцин гьансса автобус бакъа. Ца кьини, ца лахъ-лахъсса, сахIибулхайр дусса жагьил увкIун: « Вай зул автобус бакьин бансса арцур, вайгу – бензиндалух дулунсса», — куну, столданий арцул чагъарду бивхьуна. Укунсса иш ттун ттула оьрмулуву цалчинни ккаклакисса.
— Ина цура, часса ура?
— Ттуйн учайссар Шамил. На ура «Строитель» ва «Автомобилист» тIисса с/о председательну. Ттун хъинну язухъ хьунни га щалагу «Кривая Балкалийх» чIа хьуну, машинартту бацIан къабуллай, дякъил кьарчI бикIан був­сса оьрчIай.
Гания шинмай мадара хIал хьуна жун Шамил къаккавккун. Амма увкIуна ялагу мукуна хар-хавар бакъа. УвкIуна, ЦIусса шин барча дан, гьарца школьникнан ца-ца кьуцуру нацIу-кьацIуртталгу лавсун. ХьхьичIунну дуклакисса оьрчIан бахшишрунугу – «Имам Шамиль» тIисса луттирду. Барча бувна муаьллимталгу, тIивтIуну ххуйсса ссупрагу.
КъакIулли цукунсса мукъур­ттийну учинтIиссарив вихь, Шамил, барчаллагь…
Дулун хъанай, бюхълай ли­чIаннав ина!
Барчаллагь хьуннав вингу, ина хъунагу увну, мукунсса тарбия дуллусса вил нитти-буттангу! Щали­хханнин итаннав ина вила оьрмулия!
Цинявппагу дуклаки оьрчIал ва учительтурал цIания Аьхъардал школалул директор

Раисат ХIасанаьлиева